ក្រសួងសុខាភិបាល ពង្រឹងការគ្រប់គ្រង ម៉ាស៊ីនផលិតអុកស៊ីសែនខ្នាតធំ តាមបណ្ដាខេត្ត

សាស្ត្រាចារ្យ ឡឹម តារា រដ្ឋលេខាធិការក្រសួងសុខាភិបាល បានអញ្ជើញដឹកនាំកិច្ចប្រជុំពិភាក្សាដើម្បីពង្រឹងការគ្រប់គ្រង ម៉ាស៊ីនផលិតអុកស៊ីសែនខ្នាតធំ (PSA Plant) ជាពិសេសម៉ាស៊ីនទាំង១២ តាមបណ្ដាខេត្ត ដែលបានផ្តល់ជូនដោយសម្តេចមហាបវរធិបតី ហ៊ុន ម៉ាណែត ក្នុងអំឡុងពេលជំងឺកូវីដ-១៩ រាតត្បាត។

សាស្ត្រាចារ្យ ឡឹម តារា លើកឡើងថា ម៉ាស៊ីនផលិតអុកស៊ីសែននោះ មានលទ្ឋភាពផលិតអុកស៊ីសែនចែកចាយទៅដល់មន្ទីរពេទ្យក្រោមឱវាទខេត្តនីមួយៗដើម្បីអាចប្រើប្រាស់អុកស៊ីសែនឱ្យមានប្រសិទ្ធភាពខ្ពស់។ តាមរយៈការគណនាផ្នែកបច្ចេកទេសបានរកឃើញថា ក្នុងមួយបំពង់អាចចំណាយអស់ត្រឹម ៦,៨៨ ដុល្លារ (ថ្លៃភ្លើង ការជួសជុល បុគ្គលិក ថ្លៃប្រេងម៉ាស៊ីនសម្រាប់ម៉ាស៊ីនបូមខ្យល់) បើប្រៀបធៀបតម្លៃទីផ្សារនឹងចំណាយអស់ ១៣ ដុល្លារ ដូច្នេះ ការប្រើម៉ាស៊ីនផលិតអុកស៊ីសែនខ្នាតធំ (PSA Plant) អាចសន្សំថវិកាបានចំនួន ៥០%។

ជាចុងបញ្ចប់ សាស្ត្រាចារ្យរដ្ឋលេខាធិការបានផ្តល់មតិផ្តាំផ្ញើដល់បណ្តាខេត្តនានាត្រូវធ្វើការថែទាំ និងជួសជុលម៉ាស៊ីនផលិតអុកស៊ីសែនខ្នាតធំ (PSA Plant) តាមលក្ខណៈបច្ចេកទេស រៀបចំផែនការគ្រប់គ្រងម៉ាស៊ីន ធ្វើការបណ្តុះបណ្តាលអ្នកប្រើប្រាស់ និងសូមរៀនសូត្រពីការប្រើប្រាស់គំរូ Hub & Spoke តាមមន្ទីរសុខាភិបាលខេត្តកំពង់ចាម ដើម្បីជាជំនួយដល់ការថែទាំម៉ាស៊ីនឱ្យបានត្រឹមត្រូវ។

គួរបញ្ជាក់ថា កិច្ចប្រជុំនេះរៀបចំ នៅថ្ងៃទី២៣ ខែសីហា ឆ្នាំ២០២៤ នៅទីស្តីការក្រសួងសុខាភិបាល ដោយមានការចូលរួមពីសំណាក់ ប្រធានមន្ទីរសុខាភិបាល អនុប្រធានមន្ទីរសុខាភិបាល ដែលអញ្ជើញមកពីខេត្ត បាត់ដំបង ខេត្តកំពង់ចាម ខេត្តសៀមរាប ខេត្តបន្ទាយមានជ័យ ខេត្តព្រៃវែង ខេត្តក្រចេះ និងខេត្តព្រះវិហារ៕