សមាជិក ប.ស.ស. អាចសម្រាកព្យាបាលនៅមន្ទីរពេទ្យ ហ្លួង ម៉ែ ដើមឆ្នាំក្រោយ

មន្ទីរពេទ្យ ហ្លួង ម៉ែ ដែលជាមន្ទីរពេទ្យថែទាំសុខភាពដ៏លេខធ្លោមួយ បានជូនដំណឹងឱ្យដឹងថា បងប្អូនប្រជាពលរដ្ឋដែលមានបណ្ណ​ ប.ស.ស និង បណ្ណសមធម៌ អាចសម្រាកព្យាបាលនៅមន្ទីរពេទ្យដើមឆ្នាំក្រោយនេះ។

មន្ទីរពេទ្យ បានចាប់ផ្តើមបើកដំណើរការដំណាក់កាលដំបូងលើការពិនិត្យ និងពិគ្រោះជំងឺក្រៅ គិតចាប់ពីថ្ងៃទី ១៦ ខែកញ្ញា ឆ្នាំ២០២៤ ជារៀងរាល់ថ្ងៃ ចន្ទ ដល់ថ្ងៃអាទិត្យ ពីម៉ោង ៨ព្រឹក ដល់ ៥ល្ងាច ដែលមានទីតាំងនៅក្បែសាលាសង្កាត់ព្រៃស ខណ្ឌដង្កោ រាជធានីភ្នំពេញ។

ស្ថិតក្នុងដំណាក់ដំបូង មន្ទីរពេទ្យ ប្រកាសទទួលពិនិត្យ និងព្យាបាលតាមដំណាក់កាល និងស្ថានភាពរបស់អ្នកជំងឺ ដែលមានបណ្ណ ប.ស.ស. ប៉ុន្តែមន្ទីរពេទ្យនឹងបើកទទួលអ្នកជំងឺឱ្យសម្រាកនៅពេទ្យដើមឆ្នាំក្រោយ។

ការទទួលពិនិត្យ និងពិគ្រោះជំងឺនៅ មន្ទីរពេទ្យ ហ្លួង ម៉ែ បានបង្ហាញពីការពង្រីកវិសាលភាពរបស់ បេឡាជាតិសន្តិសុខសង្គម ប.ស.ស. កាន់តែទូលំទូលាយ ដើម្បីឱ្យសមាជិករបស់ខ្លួន កាន់តែមានភាពងាយស្រួលស្វែងរកទីតាំងដែលនៅជិតៗសម្រាប់ទទួលបានសេវាថែទាំសុខភាព។

បច្ចុប្បន្ន ក្រៅពីបុគ្គលិកដែលស្ថិតក្រោមក្រុមហ៊ុន សហគ្រាស, បុគ្គលស្វ័យនិយោជន៍ ពោលអ្នកដែលប្រកបរបរសេដ្ឋកិច្ចក្រៅប្រព័ន្ធ ដូចជាអ្នកលក់ដូ អ្នកមានអាជីវកម្មផ្ទាល់ខ្លួន អ្នកលក់បាយ កាហ្វេ ក៏អាចស្នើសុំចុះបញ្ជីជាសមាជិក ប.ស.ស. បានដែរ ដោយចំណាយត្រឹមតែ ១៥ ៦០០ រៀលក្នុងមួយខែ។

អត្ថប្រយោជន៍ដែលសមាជិកនឹងទទួលបាន គឺការថែទាំសុខភាព ២៤ ម៉ោង លើ ២៤ ម៉ោង នៅគ្រប់មន្ទីរពេទ្យដៃគូ ប.ស.ស. ទូទាំងប្រទេស ព្រមទាំងទទួលបានអត្ថប្រយោជន៍ផ្សេងៗ៕