តើអ្នកដឹងទេ ជំងឺមហារីកឆ្អឹង មានអាការៈបែបណាខ្លះ?

បើតាមមន្ទីពេទ្យ កាល់ម៉ែតដែលបានផ្សាយនៅលើហ្វសប៊ុក ជំងឺមហារីកឆ្អឹង គឺជាជំងឺសាច់កាចដែលកើតនៅលើឆ្អឹង ភាគច្រើនកើតលើក្មេងជំទង់អាយុចន្លោះពី១៣ ទៅ១៦ឆ្នាំ តែករណីខ្លះក៏អាចកើតមានលើមនុស្សពេញវ័យផងដែរ។ ជំងឺមហារីកឆ្អឹង ច្រើនកើតនៅលើឆ្អឹងវែងដូចជា ឆ្អឹងដើមដៃ ឆ្អឹងភ្លៅ និងឆ្អឹងស្មងជើងជាដើម។

ចំពោះ រោគសញ្ញាទូទៅនៃជំងឺមហារីកឆ្អឹងមានដូចជា ឈឺចាប់នៅកន្លែងដុំមហារីក, ហើម ឬឡើងដុំពកឆ្អឹងបន្តិចម្ដងៗ, ពិបាកធ្វើចលនា និងងាយបាក់ឆ្អឹង (បាក់ដោយឯកឯង រឺនៅពេលប៉ះទង្គិចតិចតួច)។ បើតាមប្រភពដដែល ដើម្បីធ្វើរោគវិនិច្ឆ័យជំងឺមហារីកឆ្អឹង គឺត្រូវច្រឹបយកជាលិកាដែលសង្ស័យយកទៅវិភាគ។ បន្ទាប់មក ត្រូវធ្វើការវិភាគអមវេជ្ជសាស្រ្តមួយចំនួន ដើម្បីកំណត់ទីតាំង ទំហំ និងការរីករាលដាលនៃជំងឺដូចជា ការថតវិទ្យុសាស្រ្ត ស្កែននែរ (Scanner) និង អ៊ីអែអិម (IRM)ជាដើម។

សម្រាប់ការព្យាបាលជំងឺមហារីកឆ្អឹង ត្រូវព្យាបាលដោយចាក់ថ្នាំគីមី និងធ្វើការវះកាត់ដោយវេជ្ជបណ្ឌិតជំនាញ។ ការព្យាបាលមានប្រសិទ្ធិភាពខ្ពស់បំផុតនៅពេលជំងឺស្ថិតក្នុងដំណាក់កាលដំបូង មិនទាន់មានការរីករាលដាលទៅសរីរាង្គដទៃ និងទទួលបានការវះកាត់ត្រឹមត្រូវ។ ប្រសិនជាអាណាព្យាបាលមានរោគសញ្ញាសង្ស័យ ដូចរៀបរាប់ខាងលើ ត្រូវនាំកូនៗលោកអ្នកមកពិគ្រោះប្រឹក្សាយោបល់ ជាមួយក្រុមវេជ្ជបណ្ឌិតឯកទេសជំនាញ ផ្នែកជំងឺមហារីកនៃមន្ទីរពេទ្យកាល់ម៉ែត ដើម្បីធ្វើរោគវិនិច្ឆ័យ និងព្យាបាលអោយទាន់ពេលវេលា៕