សុខភាព

វេជ្ជបណ្ឌិតកាល់ម៉ែត-គន្ធបុប្ផា សង្គ្រោះជីវិតក្មេងស្រីម្នាក់ មានឡើងខាន់លឿង និង រលាកថង់ប្រមាត់ធ្ងន់ធ្ងរ

បានផុស

២ ខែ មុន

នៅ

ថ្ងៃចន្ទ ៣ កុម្ភៈ ២០២៥

ដោយ

ក្រុមវេជ្ជបណ្ឌិត នៃមន្ទីរពេទ្យកាល់ម៉ែត និង មន្ទីរពេទ្យគន្ធបុប្ផា ជួយសង្គ្រោះអាយុជីវិតក្មេងស្រី អាយុ ១១ ឆ្នាំ ម្នាក់ ដែលឈឺចុកពោះរយៈពេល ០១ ខែ ដោយចុងក្រោយឡើងខាន់លឿង ហើយមកដល់មន្ទីរពេទ្យគន្ធបុប្ផា ក៏បានរកឃើញមានជំងឺដុំគ្រួសស្ទះបំពង់បង្ហូរទឹកប្រមាត់ បណ្ដាលឲ្យរលាកថង់ប្រមាត់យ៉ាងធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈផេកហ្វេសប៊ុក Dr.Beat Richner បានបង្ហោះកាលពីថ្ងៃទី ០២ ខែកុម្ភៈ ឆ្នាំ ២០២៥ ម្សិលមិញនេះ ឲ្យដឹងថា ក្មេងស្រី អាយុ ១១ ឆ្នាំ ម្នាក់ ឈឺចុកពោះ ០១ ខែ ចុងក្រោយមានឡើងខាន់លឿង មកដល់មន្ទីរពេទ្យគន្ធបុប្ផា រកឃើញមានជំងឺដុំគ្រួសស្ទះបំពង់បង្ហូរទឹកប្រមាត់ បណ្ដាលឲ្យរលាកថង់ប្រមាត់ធ្ងន់ធ្ងរ។

ផេកហ្វេសប៊ុក Dr.Beat Richner សរសេរបន្តថា មន្ទីរពេទ្យគន្ធបុប្ផា អរគុណ លោកសាស្ត្រាចារ្យ គី វុត្ថា ប្រធានផ្នែកឯកទេសថ្លើមក្រពះពោះវៀន ដែលបានសម្របសម្រួលឲ្យ លោកវេជ្ជបណ្ឌិតឯកទេស លី គីមឈន់ , លោកវេជ្ជបណ្ឌិត អ៊ុង បូរ៉ាត់ចក្រា និង សហការី នៃមន្ទីរពេទ្យកាល់ម៉ែត សហការជាមួយក្រុមឯកទេសក្រពះពោះវៀនមន្ទីរពេទ្យគន្ធបុប្ផា ដឹកនាំដោយលោកវេជ្ជបណ្ឌិត អ៊ា វីរៈ ធ្វើការព្យាបាលឆ្លុះទាញយកដុំគ្រួសប្រមាត់ តាមបច្ចេកទេសឆ្លុះទាញទំនើប (ERCP) ដោយពុំចាំបាច់វះកាត់បានដោយជោគជ័យ។

ទន្ទឹមនេះ មន្ទីរពេទ្យគន្ធបុប្ផា បានកោតសរសើរ និងអរគុណដល់ ក្រុមវេជ្ជបណ្ឌិត នៃមន្ទីរពេទ្យកាល់ម៉ែត និង មន្ទីរពេទ្យគន្ធបុប្ផា ដែលជួយសង្គ្រោះជីវិតក្មេងស្រីខាងលើ។

ជាមួយគ្នានេះ មន្ទីរពេទ្យគន្ធបុប្ផា ក៏បានអរគុណដល់មូលនិធិគន្ធបុប្ផាកម្ពុជា និងមូលនិធិគន្ធបុប្ផាស្វីស ព្រមទាំងសប្បុរសជនគ្រប់ៗ រូប ដែលតែងតែគាំទ្រគន្ធបុប្ផាផងដែរ។