អ្នកជំងឺជិត ៧ ពាន់នាក់ បាន​ទទួលសេវាព្យាបាលឥតគិតថ្លៃ ពី​គ្រូពេទ្យស្ម័គ្រចិត្ត​សមាគមសុខាភិបាល​ខ្មែរអាមេរិក

អ្នកជំងឺប្រមាណជិត ៧ ពាន់នាក់ បានមកទទួលសេវាព្យាបាលជំងឺដោយឥតគិតថ្លៃ ពីក្រុមគ្រូពេទ្យស្ម័គ្រចិត្តរបស់សមាគមសុខាភិបាលខ្មែរអាមេរិក នៅតាមមន្ទីពេទ្យបង្អែក ចំនួន៣ ក្នុងខេត្តក្រចេះរយៈពេល៥ថ្ងៃ គិតចាប់ពីថ្ងៃទី១០ ដល់ថ្ងៃទី១៥ ខែកុម្ភៈ ឆ្នាំ២០២៥។

ប្រធានមន្ទីរសុខាភិបាលខេត្តខេត្តក្រចេះ លោក វេជ្ជបណ្ឌិត ងី ប៊ុន ឡែន បាន​ឲ្យ​ដឹងថា ក្រុមគ្រូពេទ្យសមាគមសុខាភិបាល​ខ្មែរនៅអាមេរិក (CHPAA) សហការជាមួយក្រុមគ្រូពេទ្យនៃមន្ទីរសុខាភិបាលនៃរដ្ឋបាលខេត្តក្រចេះបានចុះពិនិត្យព្យាបាលជំងឺ ដោយឥតគិតថ្លៃជូនដល់បងប្អូនប្រជាពលរដ្ឋក្នុងខេត្តក្រចេះរយះពេល ៥ ថ្ងៃ គឺមានអ្នកជំងឺចំនួន ៦ ៧១១ នាក់ បានមកទទួលសេវាព្យាបាល។

លោកវេជ្ជបណ្ឌិតបន្តថា ក្នុងរយះពេល ៥ ថ្ងៃ ក្រុមគ្រូពេទ្យបានចុះព្យាបាលនៅតាមមន្ទីរពេទ្យបង្អែកចំនួន ៣ នៅក្នុងខេត្តក្រចេះរួមមាន មន្ទីរពេទ្យបង្អែកខេត្តក្រចេះ  មន្ទីរពេទ្យបង្អែកស្រុកឆ្លូង និងមន្ទីរពេទ្យបង្អែកស្រុកសំបូរ ដែលមានអ្នកជំងឺ​មកទទួលសេវាព្យាបាលសរុបចំនួន ៦,៧១១ នាក់។ ក្នុងនោះមានអ្នកជំងឺវះកាត់ចំនួន ១៤៥ នាក់ ជំងឺភ្នែកចំនួន​២៧៥ នាក់ ជំងឺធ្មេញចំនួន ៩៤៣ នាក់ និងអ្នកជំងឺទូទៅចំនួន ៥ ៣៤៨ នាក់។ ក្រៅពី នោះក៍មានចាក់ម្ជុលវិទ្យាសាស្ត្រ និង​ចែកវ៉ែនតា​ជូនចាស់ៗ និងវ៉ែនតាការពារកម្ដៅថ្ងៃផងដែរ៕

អត្ថបទ៖ ប្រុញ វិធិន