សុខភាព

ជំងឺ ៥ ប្រភេទ កំពុងក្លាយជាបញ្ហាសុខភាពសាធារណៈរបស់កុមារកម្ពុជា

បានផុស

៣៦ វិនាទី មុន

នៅ

ថ្ងៃអង្គារ ៨ មេសា ២០២៥

ដោយ

លោកវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ បានមានប្រសាសន៍នៅព្រឹកថ្ងៃទី ៨ មេសានេះថា បច្ចុប្បន្ន ជំងឺ ៥ ប្រភេទ កំពុងក្លាយជាបញ្ហាសុខភាពសាធារណៈរបស់កុមារកម្ពុជា ដែលទាមទារឱ្យមាតាបិតាយកចិត្តទុកដាក់ និងថែទាំចំពោះបុត្រធីតារបស់ខ្លួនឱ្យបានខ្ជាប់ខ្ជួនជាទីបំផុត សំដៅចូលរួមកាត់បន្ថយអត្រាឈឺ និងស្លាប់របស់កុមារកាន់តែធ្លាក់ចុះជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត បានបន្តថា ជំងឺសម្រាកពេទ្យនាំមុខចំនួន ៥ ប្រភេទ ក្នុងនោះរួមមាន ៖ ទី១.ជំងឺរលាកបំពង់កឆ្នាំ ២០២៤ មាន ៦.៧៤០ ករណី កើនជាងឆ្នាំ ២០២៣ មាន ៤.០៧៥ ករណី។ ទី២.ជំងឺរលាកកូនទងសួត ឆ្នាំ ២០២៤ មាន ២.២៦៨ ករណី ថយចុះជាងឆ្នាំ ២០២៣ មាន ៣.៨៩២ ករណី។ ទី៣.ជំងឺរាកគ្រប់ប្រភេទឆ្នាំ ២០២៤ មាន ៣.២១១ ករណី ថយចុះជាងឆ្នាំ ២០២៣ មាន ៣.២៥០ ករណី។ ទី៤.ជំងឺគ្រុនឈាមឆ្នាំ ២០២៤ មាន ២.៨៩៣ ករណី កើនជាងឆ្នាំ ២០២៣ មាន ២.៨៧១ ករណី និង ទី៥.ជំងឺទារកតូចឆ្នាំ ២០២៤ មាន ២.៦០៨ ករណី ថយចុះជាងឆ្នាំ ២០២៣ មាន ២.៧៨៩ ករណី។

លោកវេជ្ជបណ្ឌិត បានបន្តថា ក្រៅពីជំងឺទាំងនេះ មន្ទីរពេទ្យ ក៏បានវះកាត់កុមារចំនួន ៦.៧០៦ នាក់ នៅឆ្នាំ ២០២៤ កើនឡើងជាងឆ្នាំ ២០២៣ មាន ៦.៥៥៥ នាក់។

លោកវេជ្ជបណ្ឌិត បានបន្តទៀតថា ចំពោះការថែទាំ និងព្យាបាល ឆ្នាំ ២០២៤ មន្ទីរពេទ្យទទួលបានអតិថិជនមានការកើនឡើងបើប្រៀបធៀបទៅនឹងឆ្នាំ ២០២៣ ក្នុងនោះ ការពិនិត្យពិគ្រោះជំងឺក្រៅ ឆ្នាំ ២០២៣ មាន ១៩២,៣៦៤ ករណី ឆ្នាំ ២០២៤ មាន ២០៨,១៧៨ ករណី បានកើនឡើងចំនួន ១៥,៨១៤(៨%)។ អ្នកជំងឺសម្រាកពេទ្យ ឆ្នាំ ២០២៣ មាន ៣៧,៣៦៧ ករណី ឆ្នាំ ២០២៤ មាន ៣៨,៦៥២ ករណី បានកើនឡើងចំនួន ១,២៨៥(៣%)។ អត្រាប្រើប្រាស់នៅមន្ទីរពេទ្យឆ្នាំ ២០២៣ មានអត្រាប្រើប្រាស់គ្រែ ១៦១% ដោយមានគ្រែសម្រាប់អ្នកជំងឺ ៣៥០ គ្រែ ឆ្នាំ ២០២៤ មានអត្រាប្រើប្រាស់គ្រែ ១០៥% ដោយមានគ្រែសម្រាប់អ្នកជំងឺ ៤០០ គ្រែ និងអត្រាមរណភាពក្នុងមន្ទីរពេទ្យ ឆ្នាំ ២០២៣ មាន ០.៦៩% និងនៅក្នុងឆ្នាំ ២០២៤ បានថយមកនៅត្រឹម ០.៦៦%។

លោកវេជ្ជបណ្ឌិត បានបញ្ជាក់ថា បើទោះបីជាទទួលបានជោគជ័យជាទីមោទនៈក៏មន្ទីរពេទ្យប្រឈមបញ្ហាខ្វះខាតមួយចំនួនដែរ ដូចជា សម្ភារៈបរិក្ខារឯកទេសសម្រាប់បំពេញការងារទៅតាមកំណើនរបស់អតិថិជន។ ចំពោះគុណភាព គឺ សមត្ថភាពបុគ្គលិកជាទូទៅនៅមានកម្រិតនៅឡើយ ជាពិសេសសមត្ថភាពឯកទេសដែលទាមទារឱ្យមានការបណ្តុះបណ្តាលបន្ថែម និង កែលម្អចាំបាច់មួយផងដែរ។

លោកវេជ្ជបណ្ឌិត បានប្ដេជ្ញាថា ដើម្បីចូលរួមឆ្លើយតបទៅនឹងការប្តេជ្ញាចិត្តរបស់រាជរដ្ឋាភិបាល និងក្រសួងសុខាភិបាលក្នុងការលើកកម្ពស់គុណភាពលើវិស័យសុខាភិបាល ថ្នាក់ដឹកនាំ ព្រមទាំងបុគ្គលិកមន្ទីរពេទ្យកុមារជាតិទាំងអស់ សូមធ្វើការប្តេជ្ញាចិត្តយ៉ាងក្លៀវក្លាក្នុងការចូលរួមលើកកម្ពស់សេវារបស់មន្ទីរពេទ្យកុមារជាតិ ទាំងបរិមាណ និង គុណភាព ដោយផ្តោតជាពិសេសទៅលើក្រមសីលធម៌វិជ្ជាជីវៈ ដើម្បីពង្រឹងសេវាមន្ទីរពេទ្យកុមារជាតិឱ្យឈានទៅដល់កម្រិតបទដ្ឋានមួយផ្តល់នូវទំនុកចិត្តខ្ពស់ពីប្រជាពលរដ្ឋ៕

អត្ថបទ ៖ សំអឿន