ទោះផឹកកាហ្វេត្រឹមកន្លះពែងក្នុងមួយថ្ងៃ ក៏ស្ត្រីមានផ្ទៃពោះបង្កហានិភ័យខ្លាំងដល់ទារកដែរ

លទ្ធផលពីអ្នកស្រាវជ្រាវអាមេរិកបង្ហាញថា ស្ត្រីមានផ្ទៃពោះដែលផឹកជាតិកាហ្វេអ៊ីនជាប្រចាំនឹងធ្វើឱ្យទារកកើតមកមិនពេញលក្ខណៈ ឬខ្វះទម្ងន់។

ពួកគេបានរកឃើញថា ស្ត្រីនិយមផឹកកាហ្វេដែលមានជាតិកាហ្វេអ៊ីនស្មើនឹងកន្លះកែវក្នុងមួយថ្ងៃនឹងធ្វើឱ្យទារកកើតមកតូចខុសប្រក្រតី បើប្រៀបធៀបនឹងស្ត្រីមានផ្ទៃពោះដែលមិនទទួលទានភេសជ្ជៈដែលមានជាតិកាហ្វេអ៊ីនសោះ។

ចំណែកទារកដែលកើតមកតូចអាចធ្វើឱ្យពួកគេមានហានិភ័យខ្ពស់នៃជំងឺធាត់ ជំងឺបេះដូង និងទឹកនោមផ្អែមនៅពេលក្រោយ។ ដោយសារ​បញ្ហានេះ​អ្នកជំនាញណែនាំឱ្យស្ត្រីមានផ្ទៃពោះបញ្ចៀសទាំងស្រុងពីភេសជ្ជៈដែលមានជាតិកាហ្វេអ៊ីនដូចជា កាហ្វេ តែ​ សូដា និងភេសជ្ជៈប៉ូវកម្លាំងផ្សេងទៀតជាដាច់ខាត។

NHS អាមេរិកនិយាយថា ស្ត្រីមានផ្ទៃពោះអាចផឹកជាតិកាហ្វេអ៊ីនបាន ប៉ុន្តែមិនលើសពី ២០០ មីលីក្រាមក្នុងមួយថ្ងៃឡើយ ហើយប្រសិនអ្នកម្ដាយចំណូលភេសជ្ជៈមានជាតិកាហ្វេអ៊ីន ត្រូវតែពិគ្រោះជាមួយគ្រូពេទ្យអំពីការទទួលទានជាតិកាហ្វេអ៊ីនអំឡុងពេលមានផ្ទៃពោះជាមុនសិន។

ការទទួលទានជាតិកាហ្វេអ៊ីនលើសកម្រិត ត្រូវបានអ្នកជំនាញជឿថា បណ្តាលឱ្យសរសៃឈាមនៅក្នុងស្បូននិងសុកមានភាពតឹង ដែលនាំឱ្យពិបាកដល់ការផ្គត់ផ្គង់ឈាមដល់ទារក និងរារាំងការលូតលាស់របស់ក្មេងក្នុងផ្ទៃ។

ដោយឡែកការសិក្សាថ្មីមួយទៀតបានបង្ហាញថា ការទទួលទានជាតិកាហ្វេអ៊ីនខ្ពស់ជាប្រចាំក៏មានហានិភ័យចំពោះការលូតលាស់នៅក្នុងផ្ទៃ កើតមកទម្ងន់ស្រាល ក៏ដូចជាប៉ះពាល់អវៈយវៈមួយចំនួនថែមទៀតផង។

បើប្រៀបធៀបស្ត្រីដែលមិនទទួលទានកាហ្វេអ៊ីននិងស្ត្រីដែលមានកម្រិតកាហ្វេអ៊ីនក្នុងឈាមខ្ពស់ ទារកកើតជាមួយម្ដាយផឹកកាហ្វេអ៊ីនមានទម្ងន់ស្រាលជាងទារកធម្មតា ៨៤ ក្រាម អវៈយវៈខ្លីជាង ០,៤៤ សង់ទីម៉ែត្រ ទំហំក្បាលតូចជាង ០,៣២ សង់ទីម៉ែត្រ។

តាមរយៈការសិក្សាខាងលើ អ្នកជំនាញបានទូន្មានស្ត្រីមានផ្ទៃពោះគ្រប់រូប គួរចៀសវាងជាតិកាហ្វេអ៊ីនដាច់ខាតដើម្បីជាប្រយោជន៍ដល់សុខភាពទារកនិងខ្លួនឯងផងដែរ៕

ប្រែសម្រួល៖ សន្យា

ប្រភព៖ Daily Mail

ចុចអាន៖ ស្រាយ​ចម្ងល់​! សំឡី​អានាម័យអាច​​​បណ្ដាល​​ឲ្យ​កើត​ជំងឺ​មហារីក​?

ចុចអាន៖ ក្មេងក្តៅខ្លួន ឬផ្តាសាយ ចំថ្ងៃត្រូវចាក់វ៉ាក់សាំង អាចចាក់បានអត់?