KPT+

កូនយំចង់បានរបស់អ្វីមួយ ប៉ាម៉ាក់មិនចង់ឲ្យ តើត្រូវបដិសេធបែបណាមានប្រសិទ្ធភាព

បានផុស

៤ years មុន

នៅ

ថ្ងៃសុក្រ ១៣ វិច្ឆិកា ២០២០

ដោយ

ម៉ាក់ប៉ាតែងបដិសេធនឹងកូនពេលកូនចង់ធ្វើអ្វីមួយ ហើយការឮម៉ាក់ប៉ានិយាយថា “ទេ” យូរៗម្ដងគឺជាការល្អសម្រាប់ក្មេង។ ការបដិសេធក្មេងអាចជួយកំណត់ព្រំដែនច្បាស់លាស់ ហើយការប្រើសម្រាប់ស្ថានការណ៍ដែលសក្ដិសមបង្ហាញថាម៉ាក់ប៉ាយកចិត្តទុកដាក់លើកូន។ ប៉ុន្តែតើម៉ាក់ប៉ាអាចធ្វើយ៉ាងណាក្នុងការបដិសេធកូនឲ្យមានប្រសិទ្ធភាព?

១. ឲ្យចម្លើយដល់កូនច្បាស់ៗ

ការដែលម៉ាក់ប៉ាឲ្យចម្លើយកូនមិនច្បាស់ដូចជា “ចាំមើលសិន” ឬ “ប្រហែល” អាចនឹងធ្វើឲ្យក្មេងមានអារម្មណ៍មិនសប្បាយចិត្ត ហើយពេលខ្លះពួកគេនឹងទទូចអង្វរដើម្បីឲ្យម៉ាក់ប៉ាប្ដូរចម្លើយ។ ដូចនេះហើយពេលម៉ាក់ប៉ានិយាយថា “ទេ” គួរនិយាយឲ្យបានម៉ឺងម៉ាត់ដើម្បីបង្ហាញដល់ពួកគេថាយើងពិតជាមានន័យបែបនេះមែន។ យ៉ាងណាមិញ នៅពេលខ្លះម៉ាក់ប៉ាអាចនឹងឲ្យចម្លើយ “ប្រហែល”តាមស្ថានការណ៍។ ក្នុងករណីនេះ ម៉ាក់ប៉ាគួរពន្យល់កូនឲ្យច្បាស់ថាមូលហេតុអ្វីបានជាឲ្យចម្លើយមិនច្បាស់បែបនេះ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២. ផ្តល់ការពន្យល់ខ្លីៗ

ការពន្យល់ខ្លីៗថាហេតុអ្វីបានជាយើងបដិសេធ ដែលការពន្យល់នេះអាចធ្វើឲ្យការបដិសេធក្លាយទៅជាបទពិសោធន៍ក្នុងការរៀនសូត្ររបស់កូន។ ប្រសិនជាម៉ាក់ប៉ាបដិសេធកូនទៅលើរឿងអ្វីមួយដែលគេចង់ធ្វើដោយមិនប្រាប់ពីមូលហេតុ កូនអាចគិតថាម៉ាក់ប៉ាចិត្តអាក្រក់។ ហេតុនេះហើយម៉ាក់ប៉ាគួរប្រាប់មូលហេតុឲ្យច្បាស់ក្រោយពីបដិសេធកូន ព្រោះនៅពេលកូនយល់ពីមូលហេតុនេះ ពួកគេនឹងមិនធ្វើអ្វីដែលអាចបង្កគ្រោះថ្នាក់នៅពេលម៉ាក់ប៉ាមិនអនុញ្ញាតទេ។

៣. មិនត្រូវប្ដូរចម្លើយ

មិនថាកូនទទូចអង្វរ ឬយំយ៉ាងណាទេ កុំចុះចាញ់ព្រោះការប្តូរចម្លើយទៅយល់ព្រមតាមពួកគេអាចធ្វើឲ្យកូនគិតថាម៉ាក់ប៉ាមិនបានប្រាកដនឹងអ្វីដែលបាននិយាយទេ។ ពេលខ្លះម៉ាក់ប៉ាអាចនឹងឮកូនតវ៉ាថាក្មេងដទៃអាចធ្វើរឿងបែបនេះបាន យកល្អម៉ាក់ប៉ាមិនគួរប្តូរចម្លើយទៅយល់ព្រមទេ ប៉ុន្តែគួររម្លឹកដល់កូនថានេះជាច្បាប់របស់យើង និងបញ្ចប់ការសន្ទនានេះដើម្បីចៀសវាងជម្លោះ។

៤. ដោះស្រាយអារម្មណ៍ឲ្យបានល្អ

ម៉ាក់ប៉ាមួយចំនួនអាចនឹងមិនបដិសេធកូនព្រោះមិនចង់ឲ្យកូនគិតថាខ្លួនចិត្តអាក្រក់ ខណៈម៉ាក់ប៉ាមួយចំនួនទៀតអាចនឹងមានអារម្មណ៍ខុសនៅពេលដែលកូនមិនសប្បាយចិត្ត។ ប៉ុន្តែយកល្អម៉ាក់ប៉ាគួរដឹងពីអារម្មណ៍របស់ខ្លួនពេលដែលបដិសេធកូនដើម្បីដោះស្រាយជាមួយអារម្មណ៍ទាំងនេះ។ ម៉ាក់ប៉ាអាចរម្លឹកខ្លួនឯងថានេះមិនមែនជាបញ្ហាទេនៅពេលកូនមានអារម្មណ៍មិនល្អ និងមិនសប្បាយចិត្ត។ តាមពិតទៅ ការបដិសេធសំណើរបស់កូន គឺផ្តល់ឱកាសដល់ពួកគេក្នុងការរៀនដោះស្រាយជាមួយអារម្មណ៍របស់ពួកគេបានល្អ។

៥. ប្រាកដថាមិនបដិសេធកូនគ្រប់ពេល

ការបដិសេធកូនគ្រប់ពេលអាចនឹងផ្ដល់ផលប៉ះពាល់ដល់កូន។ ក្មេងត្រូវការឱកាសក្នុងការសិក្សា និងរៀនពីអ្វីៗថ្មី ដូចនេះហើយការអនុញ្ញាតឲ្យកូនធ្វើរឿងដែលល្អសម្រាប់ពួកគេអាចជួយដល់ការលូតលាស់របស់ពួកគេ។ នៅពេលម៉ាក់ប៉ាបដិសេធកូនគ្រប់ពេល គួរសួរខ្លួនឯងថាមកពីមូលហេតុអ្វី។ ការបដិសេធពេលខ្លះអាចមកពីម៉ាក់ប៉ាមិនចង់ឲ្យធ្វើ ប៉ុន្តែយកល្អមិនគួរតឹងតែងពេករហូតក្លាយជាទម្លាប់ទេ៕

អត្ថបទផ្ដល់សិទ្ធិដោយ៖ Hellokrupet

Related Topics:កូនៗ