KPT+

ប្រយ័ត្ន! ជំងឺដ៏សែនគ្រោះថ្នាក់មួយ តែងកើតនៅកន្លែងធ្វើការដោយអត់ដឹងខ្លួន

បានផុស

៤ years មុន

នៅ

ថ្ងៃពុធ ១៩ ឧសភា ២០២១

ដោយ

ជំងឺ “នឿយហត់ផ្លូវចិត្ត” អាចកើតលើអ្នកធ្វើការគ្រប់គ្នា មិនថាមេ ឬបុគ្គលិកធម្មតាទេ។ អារម្មណ៍តប់ប្រមល់ តានតឹងក្នុងខ្លួនក្នុងរយៈពេលយូរមួយ ជាសញ្ញាបញ្ជាក់ថា យើងកំពុងមានជំងឺនឿយហត់ផ្លូវចិត្ត នៅកន្លែងការងារហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នឿយហត់ផ្លូវចិត្ត អាចធ្វើឲ្យយើងមិនទុកចិត្តអ្នកដទៃ ព្យាយាមដកខ្លួនពីសកម្មភាពនានាជុំវិញខ្លួន មានអារម្មណ៍ថាខ្លួនឯងអសមត្ថភាព ឬធ្វើអ្វីក៏អត់សម្រេច។ ពេលមានជំងឺនឿយហត់ផ្លូវចិត្ត យើងមិនអាចធ្វើការបានដូចធម្មតាឡើយ។ រឿងគ្រោះថ្នាក់ គឺស្ថានភាពបែបនេះ អាចកើតគ្រប់ពេល ក្នុងការងារ។ ហត់កម្រិតណា? អាចចំណាំតាមចំណុចណាខ្លះ? “Hello គ្រូពេទ្យ” បកស្រាយខាងក្រោម៖

សញ្ញាសំខាន់ៗគួរឲ្យសម្គាល់៖

១- គិតតែរឿងអវិជ្ជមាន

ក្នុងស្ថានភាពនឿយហត់ផ្លូវចិត្ត យើងអាចមានអារម្មណ៍ឆាប់ស្រងាកចិត្ត ខកចិត្ត និងខឹងច្រើន។ អារម្មណ៍ទាំងនេះអាចជះឥទ្ធិពលដល់ការងារ គម្រោងនានា ឬប៉ះពាល់ដល់ក្រុមការងារ។ ពេលមានអារម្មណ៍មិនល្អ ក្នុងក្បាលរវើរវាយ គិតតែរឿងអត់ល្អប៉ាតណាបាតណី។ ភាគច្រើន ពួកគេតែង៖
– ចង់នៅតែឯង ជាជាងនៅសប្បាយក្នុងក្រុម
– គិតអត់ល្អចំពោះនរណាម្នាក់
– ឆាប់ច្រណែន ថ្នាំងថ្នាក់ចិត្តច្រើនជាមួយក្រុមការងារ ឬកូនក្រុម។

២- ពិបាក និងមានសម្ពាធ

អ្នកមានជំងឺនឿយហត់ផ្លូវចិត្ត មានអារម្មណ៍ពិបាកដោះស្រាយបញ្ហា ឬការងារផ្សេងៗ និងតែងមានសម្ពាធជានិច្ច។ ទោះបីជាតាំងចិត្តខ្ពស់ ថាធ្វើម៉េចក៏ដោយ ឲ្យការងារហ្នឹងចប់ រួចស្រេចបាច់នៅប៉ុន្មានថ្ងៃ ឬប៉ុន្មានម៉ោងបន្ទាប់ តែជារឿយៗធ្វើមិនហើយ ឬហើយទាំងមិនប្រាកដក្នុងចិត្តថាល្អ។

៣- គេងមិនលក់

អាចមិនចាប់អារម្មណ៍ ព្រោះដំបូងៗ យើងអាចមានអារម្មណ៍ថា “ប្រហែលពិបាកគេងប៉ុន្មានយប់ប៉ុណ្ណោះ” តែយូរៗទៅ បញ្ហានេះកើតសឹងរាល់យប់ច្រើនថ្ងៃ។ ទោះបីជាពេលខ្លះ អស់កម្លាំង ហត់ខ្លាំងក៏ដោយ ក៏នៅតែគេងអត់លក់។

៤- ប៉ះពាល់ខួរក្បាល

អារម្មណ៍អត់មូល រកផ្ចង់ធ្វើអីមិនកើត ថ្លោះធ្លោយ ភ្លេចភ្លាំងច្រើន បង្កកំហុសឆ្គងច្រើន ខួរក្បាលស្ពឹកស្រពន់ ធ្វើអីមិនរហ័សដូចមុន។ ទាំងនេះហើយ ជាសញ្ញាដំបូងនៃជំងឺនឿយហត់ផ្លូវចិត្តនៅកន្លែងធ្វើការ។ បើស្ថិតក្នុងស្ថានភាពអ៊ីចឹងៗយូរទៅ អាចឈានដល់ដំណាក់កាលប៉ះពាល់គុណភាពការងារ។

ដំណោះស្រាយខ្លះៗ៖

១- កំណត់ជំងឺឲ្យចំ

តើអ្វីនៅកន្លែងធ្វើការ ដាក់សម្ពាធយើងឲ្យស្ថិតក្នុងស្ថានភាពបែបនេះ? ពេលជួបបញ្ហា ការផ្ដើមគំនិតដោះស្រាយបញ្ហា មិនចាំបាច់ទាល់តែមេ ឬអ្នកដទៃបោះគំនិតឲ្យរហូតទេ ប៉ុន្តែពេលខ្លះ ការចាប់ផ្ដើមពីខ្លួនឯង ថាតើគួរធ្វើម៉េចដើម្បីដោះស្រាយបញ្ហាដែលកំពុងមាន? ស្ត្រេសពេក? ត្រូវការឈប់សម្រាកប៉ុន្មានថ្ងៃអត់? ដោះដោយរបៀបណា? ស៊ីពេលប៉ុន្មាន? ត្រូវមានអ្នកណាជួយខ្លះ?

២- ដាក់ថ្នាំ

អត់មានថ្នាំណាសម្រាប់លេបឲ្យរោគ “នឿយហត់នៅកន្លែងធ្វើការ” ជាសះបាត់ទេ។ ស្វែងរកជំនួយ ជារឿងសំខាន់ ដូចជាត្រូវការជជែកជាមួយមេ ប្រធានផ្នែកធនធានមនុស្សជួយ ឬរកក្រុមការងារណាមកប្រឹក្សា ឬជួយសម្របសម្រួល ជាដើម។

បើដឹងខ្លួនថាមានបញ្ហាហើយ ត្រូវតាំងចិត្តធ្វើជា “អ្នកដោះស្រាយបញ្ហា” កុំបណ្ដែតបណ្ដោយឲ្យសុខភាពផ្លូវចិត្តកាន់តែទ្រុឌទ្រោម ៕

អត្ថបទផ្ដល់ដោយ៖ Hello Krupet

ចុចអាន៖ការសិក្សាបារាំង៖ ធ្វើការលើសម៉ោងយូរ អាចដាច់សរសៃឈាមខួរក្បាល

ចុចអាន៖មូលហេតុដែលការរិះគន់តែង បណ្តាលឲ្យប៉ះពាល់ដល់ផ្លូវចិត្តធ្ងន់ធ្ងរ