កុំរំលង! សំណុំក្ដីថ្មី ក្នុងស្នាដៃទី៦របស់សំណេររឿង “អាពាហ៍ពិពាហ៍​ក្រាលឈាម”

រឿង “អាពាហ៍ពិពាហ៍​ក្រាលឈាម” ស្នាដៃទី៦ របស់ក្រុម សំណេរ ទើបតែចេញផ្សាយថ្មីៗនេះ កំពុងទាក់ទាញអ្នកអានខ្លាំង តាមរយៈចំណងជើងនិងក្រប ជាពិសេសគុណតម្លៃដែលបានបង្កប់មកជាមួយសាច់រឿង។

ប្រលោមលោកឃាតកម្ម “អាពាហ៍ពិពាហ៍​ក្រាលឈាម”  ជាការតាក់តែងរួមគ្នារបស់អ្នកនិពន្ធ ទឹកសន្សើមនិងវាយោ ហើយជារឿងមួយដែលបានលើកយកនូវទំនៀមទម្លាប់ពិធីរៀបការរបស់ដូនតាខ្មែរមកបរិយាយដើម្បីបង្ហាញពីប្រពៃណីដ៏ផូរផង់នេះទៅកាន់មហាជន។

ដំណើរដើមទងមុនពេលចាប់​ផ្តើម​សរសេររឿងនេះ ត្រូវបានអ្នកនិពន្ធបង្ហើបថា ដំបូងឡើយអ្នកនិពន្ធទាំងពីររូបគិតអំពី concept (គំនិតផ្ដួចផ្ដើម) ទាក់ទងនឹងអាពាហ៍ពិពាហ៍​ បូកជាមួយសំណុំក្ដីឃាតកម្ម​ ដោយចង់​បង្កើត​ជាសាច់រឿងប្រភេទថ្មីដែល សំណេរ មិនធ្លាប់ធ្វើពីមុនមក។

បន្ទាប់ពីនោះ ការផលិតសៀវភៅនេះ អ្នកនិពន្ធចង់លាតត្រដាងអំពីពិធី​អាពាហ៍ពិពាហ៍​ខ្មែរ​ដល់អ្នកអានឱ្យមកងាកចាប់​អារម្មណ៍លើប្រពៃណីរបស់ជនជាតិកម្ពុជាយើង​ ហើយទម្រាំបានបោះពុម្ភផ្សាយ អ្នកនិពន្ធមានការ​ស្រាវជ្រាវ​ជាច្រើនលើក​ច្រើនសារ​ ទាក់ទងនឹង​ពិធីមួយនេះផងដែរ។ បន្ទាប់ពី​ប្រមូលបាន​ឯកសារជាច្រើនមក​ វាយោនិងទឹកសន្សើម ក៏សហការគ្នាចាប់ផ្តើម​បង្កើតឆ្អឹងរឿង​ និងតួអង្គ។ រីឯចំណងជើងពីដំបូងក៏មានច្រើនជម្រើសដូចជា​ អាពាហ៍ពិពាហ៍​ក្រហម​, មង្គលការ​កម្រាលឈាម, អាពាហ៍ពិពាហ៍​ក្រាលឈាម​។ល។ ដោយហេតុថាចង់ជ្រើសរើសឱ្យពិធី​មង្គលការ​ប្រែក្លាយជា​បុណ្យ​សព​ អ្នកនិពន្ធក៏សម្រេចចិត្តដាក់ចំណងជើងសៀវភៅមួយក្បាលនេះថា “អាពាហ៍ពិពាហ៍​ក្រាលឈាម​” តែម្តងទៅ។

ដោយឡែក “អាពាហ៍ពិពាហ៍​ក្រាលឈាម​” ក៏ចង់បង្ហាញនូវគុណតម្លៃសម្រាប់អ្នកអានគ្រប់គ្នា តាមរយៈសាច់រឿងនេះដែរ។ រឿងក្ដីឃាតកម្មនេះ ក្រៅពីបានលើកយកពិធីសំខាន់ៗមួយចំនួនក្នុង​អាពាហ៍ពិពាហ៍​ខ្មែរ​​មកពណ៌នាហើយ វាក៏ផ្តល់នូវសារ​អប់រំ​ជាច្រើនទៀត ដែលមិត្តអ្នកអានមិនគួររំលង។ យ៉ាងណាមិញគោលគំនិតសំខាន់ជាងគេនៃប្រលោមលោកនេះគឺ ពេលខ្លះការពិតមួយចំនួន មិនមែនសុទ្ធតែជាការពិតនោះទេ​ វាគ្រាន់តែជាការ​បំភាន់​ភ្នែកប៉ុណ្ណោះ​៕

អត្ថបទ៖ សន្យា

ចុចអាន៖ “សំណុំឯកសារ Z22” ក្លាយជារឿងមានអ្នកអានច្រើនជាងគេក្នុងចំណោមសំណុំក្ដីរបស់ សុភាប្រុស

ចុចអាន៖ ចំណុចពិសេស ៣ នៃរឿង “មកតាមសន្យា” ដែលនឹងបង្ហាញវត្តមានឆាប់ៗនេះ