មេរៀនធំ ២ ដែលមហាសេដ្ឋី Bill Gates និងភរិយាកំពុងបង្រៀនកូនៗ

កាលពី មហាសេដ្ឋីលោក Bill Gates និងភរិយាលោកស្រី Melinda បានចូលរួមក្នុងកម្មវិធីជំនួបសិស្សវិទ្យាល័យមួយនៅទីក្រុងញូវយ៉ក លោកបានថ្លែងប្រាប់អ្នកចូលរួមពីរបៀបបង្រៀនកូនដែលគ្រួសារមហាសេដ្ឋីនេះតែងតែអនុវត្ត។ ក្រៅពីធ្វើជាគំរូល្អដល់កូនៗ គូស្វាមីភរិយាមួយគូនេះមានមេរៀនសំខាន់ពីរដែលកំពុងចែកដល់កូនរបស់ពួកគេជារឿយៗ។

១. រៀបការជាមួយមនុស្សដែលត្រឹមត្រូវ ៖ លោកស្រី Melinda ភរិយារបស់លោក Bill Gates និយាយថា មេរៀនមួយដែលអ្នកទាំងពីរកំពុងបង្រៀនកូនញឹកញាប់បំផុតនោះគឺ ប្រសិនបើពួកគេជ្រើសរើសដៃគូជីវិត ត្រូវជ្រើសរើសឱ្យបានត្រឹមត្រូវ ព្រោះវាជាការសម្រេចចិត្តដ៏សំខាន់បំផុតនៅក្នុងជីវិត។ លោកស្រីបន្ថែមថា  រឿងគូស្រករសំខាន់ជាងអ្វីដែលរៀននៅសាលាឬមហាវិទ្យាល័យ ហើយវាក៏សំខាន់ជាងការងារទៅទៀត។ ជាការពិតការជ្រើសរើសដៃគូជីវិត វាពិតជាមានសារៈសំខាន់ណាស់ ពីព្រោះក្នុងនាមជាដៃគូជីវិត គឺអាចជួយគ្នាទៅវិញទៅមកគ្រប់កាលៈទេសៈបាន ហើយពួកគេក៏ជាកម្លាំងចិត្តមួយផ្នែកដែលអាចធ្វើឱ្យដៃគូក្លាយទៅជានរណាម្នាក់ដែលមិននឹកស្មានដល់ ។ ហេតុដូចនេះហើយទើបលោកស្រី Melinda បានបញ្ជាក់បន្ថែមថា ត្រូវព្យាយាមជ្រើសរើសគូជីវិតដោយប្រុងប្រយ័ត្ននិងដោយប្រាជ្ញាបំផុត។

២. ភេទមិនមែនជាអ្វីដែលយើងយកមកកំណត់ជម្រើសរបស់យើងទេ ៖ លោកស្រី Melinda បានសរសេរនៅក្នុងទស្សនាវដ្តីថាមស៍ក្នុងឆ្នាំ ២០១៧ ថា “ Bill និងខ្ញុំតែងតែរំឭកខ្លួនក្នុងនាមជាឪពុកម្តាយដែលនឹងចិញ្ចឹមកូនៗរបស់យើងដោយឱ្យពួកគេជឿថា ពួកគេអាចធ្វើអ្វីៗបានដោយគ្មានការកំណត់ពីភេទរបស់ពួកគេ មិនថាពួកគេជាស្រី ឬជាប្រុសនោះទេ” ។ លោកស្រីបានបន្តថា “ ឪពុកម្តាយរបស់ខ្ញុំបានបង្រៀនខ្ញុំនិងប្អូនស្រីថា ពួកយើងអាចធ្វើអ្វីៗទាំងអស់ដែលបងប្អូនយើងអាចធ្វើបាន” ។ ទាំងនេះជាមេរៀនដ៏មានតម្លៃហើយនាងនឹងចែករំលែកវាទៅដល់កូនៗរបស់នាងដូចគ្នា។

លោក Bill Gates ជាស្ថាបនិកក្រុមហ៊ុន Microsoft ដែលជាក្រុមហ៊ុនបច្ចេកវិទ្យាលំដាប់ពិភពលោកនិងជាមហាសេដ្ឋីលំដាប់ទី ២ លើពិភពលោកផងដែរ។ មហាសេដ្ឋីមានទ្រព្យសម្បត្តិវាល់ពាន់លានដុល្លាររូបនេះ និងភរិយាអ្នកស្រី Melinda បច្ចុប្បន្នមានកូនស្រី ២ នាក់ និងកូនប្រុសម្នាក់៕

ប្រែសម្រួល៖ សន្យា

ប្រភព៖ CNBC

ចុចអាន៖ អ្នកណា​នៅ​ពី​ក្រោយ​សកម្មភាព​ សប្បុរសធម៌​នៃ​មហាសេដ្ឋី BILL GATES?