KPT+

ការប្រយុទ្ធប្រឆាំងកូវីដ គឺជាកាតព្វកិច្ចយើងទាំងអស់គ្នា ត្រូវអនុវត្តដាច់ខាត បើចង់ឲ្យស្ថានភាពមកដូចធម្មតា

បានផុស

៣ years មុន

នៅ

ថ្ងៃចន្ទ ១២ កក្កដា ២០២១

ដោយ

កូវីដ ១៩ កំពុងរស់នៅក្បែរយើងគ្រប់គ្នា នេះមិនមែនជាសេណារីយ៉ូដូចក្នុងកុនភាគឡើយ។ មនុស្សទាំងអស់ត្រូវប្ដូរទម្លាប់រស់នៅ ការគិត ការហូបចុក និងគ្រប់យ៉ាងទាំងអស់ដែលធ្លាប់មានពីមុនមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួយ៉ាងបុគ្គលិកគ្រប់ជាន់ថ្នាក់ ដែលបានឈរជើងជួរមុខ លោកកំពុងតែហត់នឿយធ្វើការមិនគិតយប់ថ្ងៃ ដើម្បីការពារសុវត្ថិភាពពលរដ្ឋនិងកាត់បន្ថយហានិភ័យនៃជំងឺកូវីដ ដែលកំពុងតែឆ្លងរាលដាលក្នុងសហគមន៍កាន់តែច្រើនឡើងៗ។

ក្នុងនាមជាប្រជាពលរដ្ឋ ទោះមិនបានជួយអ្វីដល់រដ្ធាភិបាល តែបើយើងគប្បីស្ដាប់តាមអនុសាសន៍របស់រដ្ឋាភិបាលឬក្រសួងសុខាភិបាល នេះមិនខុសអីពីយើងបានជួយជាតិរបស់យើងដូចគ្នាដែរ។

យុទ្ធនាការប្រយុទ្ធប្រឆាំងការរីករាលដាលកូវីដ គឺជាកាតព្វកិច្ចរបស់យើងទាំងអស់គ្នា បើទោះបីយើងជាពលរដ្ឋសាមញ្ញ ក៏ត្រូវចូលរួមឲ្យសកម្ម ជាមួយរាជរដ្ឋាភិបាលក្នុងការបង្ការ ទប់ស្កាត់ ជំងឺដ៏កាចសាហាវមួយនេះដែលកំពុងរាតត្បាតពេញផ្ទៃប្រទេស។

ជាពិសេសពលរដ្ឋត្រូវតែ អនុវត្តនូវវិធានការ ៣ការពារ ៣កុំរបស់សម្តេចតេជោ ហ៊ុន សែន និងបន្តចូលរួមធ្វើចត្តាឡីស័កសម្រាប់អ្នកពាក់ព័ន្ធឲ្យបានម៉ឺងម៉ាត់បំផុត។ សូមកុំបន្តចម្លងទៅអ្នកផ្សេង ជាពិសេសបងប្អូនឪពុកម្ដាយចាស់ៗរបស់យើង។ សូមកាត់បន្ថយកន្លែងត្រូវទៅ ដែលមិនចាំបាច់ កុំដល់ពេលនាំរោគហើយស្ដាយក្រោយ។

ការអនុវត្តវិធានការ វិធានការ ៣ការពារ រួមមាន ពាក់មាស់ លាងដៃ រក្សាគម្លាតសុវត្ថិភាពសង្គម គម្លាតសុវត្ថិភាពបុគ្គល ចាប់ពី១ម៉ែត្រកន្លះ ឡើងទៅ ឲ្យបានគ្រប់គ្នានិងគ្រប់ទីកន្លែង។ ចំណុចបីការពារនេះសំខាន់ខ្លាំងណាស់ ធ្វើដូច្នេះទើបអាចយកឈ្នះលើកូវីដ បានដោយជោគជ័យ។

ចំណែកវិធានការ៣កុំរួមមាន ៖កុំចូលទៅកន្លែងបិទជិត គ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក។ កុំទៅកន្លែងមានមនុស្សច្រើនកុះករ។ កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំអោបគ្នាជាដើម។

ដោយឡែកពាក់ព័ន្ធនឹងករណីខាងលើនេះដែរ អគ្គនាយកនៃអង្គការសុខភាពពិភពលោក (WHO) លោកTedros Adhanom Ghebreyesus បានចែករំលែកវិធី ៥ យ៉ាងដល់ប្រជាជនទូទាំងពិភពលោកឲ្យអនុវត្តដើម្បីរក្សាសុខភាព និងចៀសឆ្ងាយការឆ្លងអំឡុងជំងឺរាតត្បាតកូវីដ នេះ ៖

១. ញ៉ាំអាហារដែលមានគុណភាព សុវត្ថិភាព និងសំបូរទៅដោយសារធាតុបំប៉ន និងជីវភាព ។

២. កំណត់ទៅលើការទទួលទានគ្រឿងស្រវឹង និងបញ្ចៀសភេសជ្ជៈដែលមានជាតិស្ករច្រើន ។

៣. ហាមជក់បារី ព្រោះការជក់បារី អាចជួយបង្កើនគ្រោះថ្នាក់នៃការចម្លងជំងឺកូវីដ ១៩ ។

៤. ត្រូវហាត់ប្រាណឲ្យបានច្រើន ។

៥. ថែរក្សាសុខភាពផ្លូវចិត្តឲ្យបានល្អ ដើម្បីបញ្ចៀសភាពតានតឹងនៅក្នុងអារម្មណ៍នាអំឡុងពេលនៃការរីករាលដាលនៃជំងឺកូវីដ ១៩ ៕

អត្ថបទ៖ សាង ស្រីល័ក្ខ

ចុចអាន៖៥ វិធី ដោះស្រាយបញ្ហានៃវិបត្តិកូវីដគ្រប់ប្រភេទ ដែលមនុស្សគ្រប់គ្នាកំពុងភ័យខ្លាច បានយ៉ាងប្រសើរ

ចុចអាន៖មេ WHO ចែករំលែកវិធី ៥ យ៉ាងដល់ប្រជាជនទូទាំងពិភពលោកអនុវត្ត អំឡុងជំងឺកូវីដ ១៩

Related Topics: