រឿង ៥ យ៉ាងអំពីជីវិត​ មិន​គួរ​យកទៅពាក់​ព័ន្ធជាមួយ​នឹង​​ប្រាក់

លុយពិតជាសំខាន់ តែមាន​រឿង​ខ្លះ ​អ្នក​មិន​បាច់​ខ្វល់​ជា​មួយ​លុយនោះទេ។ គេថា “មានលុយ មានអ្វីគ្រប់យ៉ាង”! យ៉ាងណាមិញពាក្យនេះជួនកាលត្រឹមត្រូវមែន​ ប៉ុន្តែជួនកាលមិនប្រាកដថាត្រូវឡើយ។ រឿងរ៉ាវ ៥ ខាងក្រោម ទោះគ្មានលុយក៏ដោយ ក៏អ្នកអាចបង្កើតវា ដោយមិនចាំបាច់ពាក់ព័ន្ធជាមួយប្រាក់នោះទេ។

១. សេចក្តីស្រលាញ់

​ក្តីស្រឡាញ់​ មិន​អាច​យកប្រាក់​មកទិញ​នោះទេ ព្រោះវាជារឿងមនោសញ្ចេតនានិងបេះដូង។ ក្តី​ស្រឡាញ់​ពិតមិន​ត្រូវ​ការ​ប្រាក់​ទេ វា​ត្រូវ​ការ​តែភាព​ស្មោះ​ត្រង់ប៉ុណ្ណោះ លើកលែងក្ដីស្រឡាញ់នោះជារបស់ក្លែងក្លាយ។ ដូច្នេះកុំ​យក​ប្រាក់​មក​ពាក់ព័ន្ធ​នឹង​ក្តីស្រលាញ់​​ ព្រោះវាមិនមែនទំនិញសម្រាប់ទិញដូរឡើយ។

២. ការលើកទឹកចិត្ត

បង្កើតលទ្ធផលការងារល្អ មិនមែនមកពីតែពីប្រាក់មួយមុខនោះទេ។ វាបានមកពីការ​​លើក​​ទឹក​​ចិត្ត ហើយការលើកទឹកចិត្តក៏ចាំបាច់ប្រើតែ​ប្រាក់​ដែរ។ ជាញឹកញាប់ការលើក​ទឹក​ចិត្ត​ដល់មនុស្សជុំវិញដែលជួបបញ្ហា ឬបុគ្គលិកឱ្យខិតខំធ្វការ កើតឡើងដោយពាក្យសម្ដីនិងកាយវិការខ្វាយខ្វល់ពីគ្នា។

៣. ភាពជោគជ័យ​​

ការ​យកប្រាក់ទៅ​​ប្រៀប​​ធៀប​​ជា​​មួយ​​អ្នក​​ដទៃថាមនុស្សម្នាក់ជោគជ័យជាងមនុស្សម្នាក់ទៀត ជារឿងខុសទាំងស្រុង។ វា​​ជាការគិតមិន​​ត្រឹម​​ត្រូវ ព្រោះជោគជ័យឬបរាជ័យ មិនមែនយកប្រាក់មកវាស់នោះទេ។ មានរឿងច្រើនណាស់ ដែលលុយមិនអាចវាស់វែងបាន។

៤. សុភមង្គល

ប្រាកដណាស់ មានលុយនឹងមាន​​សុភ​មង្គល តែមានសុភមង្គលមិនមែនសុទ្ធតែមកពីលុយឡើយ។ តាម​​ពិត​​ទៅ​​សុភមង្គលរមែងកើតឡើងពីចិត្ត និងការយោគយល់អធ្យាស្រ័យពីសមាជិកក្នុងផ្ទះឬក្នុងចំណោមមិត្តភក្តិ។ លុយអាចទិញវីឡាស្កឹមស្កៃ ឡានទំនើប ទូរសព្ទថ្មី តែលុយមិនអាចទិញសុភមង្គលពីនរណានោះទេ។​​ 

៥. សុខភាពល្អ

មានលុយ អាចទិញអាហារល្អ ម្ហូបថ្លៃ តែបើចង់បានសុខ​ភាពល្អ លុះណាតែអ្នកចេះថែខ្លួន។ លើលោកនេះ មានសេដ្ឋីប៉ុន្មាននាក់ដែលអាចយកប្រាក់វាល់លានរបស់ខ្លួនទៅទិញសុខភាព កុំឱ្យឈឺ? គ្មានទេ! ដូច្នេះលុយនិងសុខភាព មិនអាចយកមកផ្ដោះប្ដូរគ្នាឡើយ៕

ប្រែសម្រួល៖ សន្យា

ប្រភព៖ Bright Side

ចុចអាន៖ ទាល់តែមានលុយច្រើន ទើបហៅថា «ជោគជ័យ» ?

ចុចអាន៖ ទស្សនៈអវិជ្ជមានពីលុយ បង្អាក់មនុស្សមិនឲ្យខំរកប្រាក់