មុនចង់បង្ហោះកាតចាក់វ៉ាក់សាំងកូវីដ-១៩ នៅលើបណ្ដាញសង្គម អានផលវិបាកទាំងនេះសិន

ក្រោយពេលចាក់វ៉ាក់សាំងបង្ការកូវីដ-១៩ អ្នកប្រហែលជាចង់ប្រកាសប្រាប់អ្នកដទៃឱ្យបានដឹងដោយចែកចាយវានៅលើបណ្ដាញសង្គមរបស់ខ្លួន។ ប៉ុន្តែមុនពេលចែកចាយរូបថត Selfie ឬថតកាតវ៉ាក់សាំងបង្ហោះជាសាធារណៈលើប្រព័ន្ធផ្សព្វផ្សាយអ៊ីនធើណិត សូមដាក់កាតវ៉ាក់សាំងចុះ ហើយពិចារណាបន្តិចសិន។

យោងតាមក្រសួងសុខាភិបាលសហរដ្ឋអាមេរិកបានឱ្យដឹងថា “រូបភាពនៃកាតវ៉ាក់សាំងបង្ការកូវីដ-១៩ មិនគួរត្រូវបានចែកចាយនៅលើបណ្តាញសង្គមនោះទេ។ ការបិទផ្សាយមាតិកាដែលរាប់បញ្ចូលថ្ងៃ ខែ ឆ្នាំកំណើត ព័ត៌មានលម្អិតអំពីសុខភាពឬព័ត៌មានផ្ទាល់ខ្លួនដែលអាចកំណត់អត្តសញ្ញាណបានអាចត្រូវបានប្រើដើម្បីលួចអត្តសញ្ញាណរបស់អ្នក”។ កាលណាបង្ហោះកាតវ៉ាក់សាំង បានន័យថា អ្នកកំពុងបង្ហាញព័ត៌មានសំខាន់ៗផ្ទាល់ខ្លួនទៅកាន់ជនខិលខូចមួយចំនួន។ ព័ត៌មានលម្អិតទាំងអស់នៅលើកាត អាចធ្វើឱ្យអ្នកងាយរងគ្រោះពីការឆបោក និងការលួចអត្តសញ្ញាណជាដើម។

នៅស្រុកខ្មែរ ករណីឆ្លៀតឱកាសឆបោកបន្លំកាតវ៉ាក់សាំងដើម្បីលក់យកប្រាក់ មិនទាន់កើតមាននោះទេ។​ ទោះយ៉ាងណា បើអ្នកបានបង្ហោះរូបថតកាត ហានិភ័យលួចបន្លំផ្សេងៗអាចកើតឡើងនៅពេលណាមួយមិនខាន។

នៅបរទេស មានអ្នកបោកប្រាស់ដែលគេស្គាល់ថា បានឆ្លៀតយកប្រយោជន៍ពីតម្រូវការវ៉ាក់សាំងបង្ការកូវីដ-១៩ ហើយទទួលបានអត្ថប្រយោជន៍ពីការរាតត្បាត។ ពួកគេអាចប្រើព័ត៌មាននៅលើកាតរបស់អ្នក សូម្បីតែឈ្មោះពេញ និងថ្ងៃខែឆ្នាំកំណើតរបស់អ្នកដើម្បីបង្កើតកាតចាក់វ៉ាក់សាំងក្លែងក្លាយ ឬបើកកាតឥណទានក្នុងឈ្មោះរបស់អ្នកទៀតផង។

ជំនួសឱ្យការចែករំលែកអំពីព័ត៌មានសុខភាពក្នុងអនឡាញជាមួយពិភពលោក អ្នកអាចថតតែរូបខ្លួនឯងបង្ហោះទៅបានហើយ!

ប្រែសម្រួល៖ សន្យា

ប្រភព៖ Women’s Health

ចុចអាន៖ សារៈសំខាន់នៃកាតចាក់វ៉ាក់សាំងកូវីដ-១៩ យើងអាចមិនទាន់ដឹង

ចុចអាន៖ លោក​ជំទាវ ឱ វណ្ណឌីន ប្រាប់ឱ្យអ្នកចាក់វ៉ាក់សាំងរួចរក្សាទុកកាតកុំឱ្យបាត់