KPT+

កាតវ៉ាក់សាំងសំខាន់ណាស់ ចុះបើបាត់ គួរធ្វើយ៉ាងម៉េច?

បានផុស

៣ years មុន

នៅ

ថ្ងៃសុក្រ ៨ តុលា ២០២១

ដោយ

Sonya

កាតវ៉ាក់សាំងកូវីដ-១៩ ប្រៀបបានដូចជាលិខិតបញ្ជាក់ថា អ្នកបានចាក់វ៉ាក់សាំងរួចរាល់ដែលក្នុងនោះមានផ្ទុក ឈ្មោះ ថ្ងៃខែឆ្នាំកំណើត ប្រភេទវ៉ាក់សាំង និងពេលវេលាដែលអ្នកទទួលបានវ៉ាក់សាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រសិនគ្មានកាតវ៉ាក់សាំងនោះទេ ការធ្វើដំណើរទៅកន្លែងសំខាន់ៗមួយចំនួននឹងមិនត្រូវបានអនុញ្ញាតឡើយ។ ជាក់ស្ដែងថ្មីៗនេះ រដ្ឋបាលរាជធានីភ្នំពេញ បានចេញសេចក្ដីណែនាំ ស្ដីពីការបង្ហាញបណ្ណចាក់វ៉ាក់សាំងកូវីដ-១៩ ឬបណ្ណចាក់វ៉ាក់សាំងបង្ការជំងឺកូវីដ-១៩ ឬលិខិតបញ្ជាក់ការចាក់វ៉ាក់សាំងបង្ការជំងឺកូវីដ-១៩ រាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មដ្ឋាននានា ក្នុងរាជធានីភ្នំពេញ។

ដោយឡែក កាលពីពេលកន្លងទៅ មន្ត្រីជាន់ខ្ពស់ក្រសួងសុខាភិបាល បានអំពាវឱ្យប្រជាពលរដ្ឋដែលចាក់វ៉ាក់សាំងរួច ត្រូវរក្សាទុកបណ្ណចាក់វ៉ាក់សាំង ឱ្យបានល្អត្រឹមត្រូវ កុំឱ្យបាត់បង់ ដើម្បីបង្កភាពងាយស្រួលក្នុងការចាក់វ៉ាក់សាំងការពារកូវីដ-១៩នៅដូសបន្ទាប់។

ចំពោះអ្នកចាក់វ៉ាក់សាំងដូសទី១រួច ត្រូវមានបណ្ណចបង្ហាញទៅគ្រូពេទ្យ ពេលទៅចាក់ដូសទី២។ ចំណែកអ្នកចាក់ទាំងពីរដូសពេញលេញរួចហើយ ត្រូវមានកាតវ៉ាក់សាំងដូចគ្នា ទើបអាចចាក់ដូសទី៣ បាន។

មួយវិញទៀត កាតវ៉ាក់សាំងពិតជាមានសារៈសំខាន់សម្រាប់ការធ្វើដំណើរក្នុងប្រទេស ក្រៅប្រទេស ចេញ-ចូលស្ថាប័ននានា ការហោះហើរ ក៏ដូចជាការត្រឡប់ចូលសាលារៀនវិញចំពោះលោកគ្រូ អ្នកគ្រូ និងសិស្សានុសិស្សទាំងអស់ផងដែរ។

ដូច្នេះ បន្ទាប់ពីទទួលបានកាតហើយ ត្រូវរក្សាទុកវាឲ្យបានល្អ ចៀសវាងការច្រឡំកន្លែងដាក់ ឬបាត់កាតបញ្ជាក់ពីការចាក់វ៉ាក់សាំងកូវីដ-១៩នេះ។

លោកស្រីវេជ្ជបណ្ឌិត ឱ វណ្ណឌីន ថ្លែងថា ប្រសិនបើបាត់កាត អ្នកអាចទាក់ទងទៅកាន់ គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) ឬមន្រ្តីចាក់វ៉ាក់សាំងតាមរយៈលេខទូរសព្ទ ០៧៧ ៨២៤ ៨២៤ ឬ ០១២ ៩៦០ ៧២៧ ឬ ០១២ ៨៣៦ ៨៦៨ ដើម្បីឱ្យក្រុមការងារពិនិត្យមើលឱ្យបានច្បាស់លាស់នូវនីតិវិធី រកមូលហេតុដែលបាត់៕

អត្ថបទ៖ សន្យា

ចុចអាន៖ នៅភ្នំពេញ រាល់ពេលចេញ-ចូល គ្រឹះស្ថានសិក្សា ផ្សារ និងទីតាំងអាជីវកម្ម ត្រូវបង្ហាញបណ្ណចាក់វ៉ាក់សាំងកូវីដ-១៩

ចុចអាន៖ សារៈសំខាន់នៃកាតចាក់វ៉ាក់សាំងកូវីដ-១៩ យើងអាចមិនទាន់ដឹង

ចុចអាន៖ មុនចង់បង្ហោះកាតចាក់វ៉ាក់សាំងកូវីដ-១៩ នៅលើបណ្ដាញសង្គម អានផលពិបាកទាំងនេះសិន

Related Topics: