រោគសញ្ញាគ្រោះថ្នាក់ទាំង ៦ លើរាងកាយ ដាច់ខាតត្រូវតែសម្រាកជាប្រញាប់

មិនថាការសិក្សាឬធ្វើការទេ រឿងទាំងនេះអាចបង្កើតភាពតានតឹងផ្នែកអារម្មណ៍ សម្ពាធលើយើង ភាគច្រើនវានឹងកកកុញក្នុងរាងកាយ ដែលនាំឲ្យអស់កម្លាំងបន្តិចម្តងៗ​។

យ៉ាងណាមិញ ប្រសិនបើយើង​មាន​សញ្ញា​ទាំង ​៦ ​ ដូចដែលបានរៀបរ៉ាប់ ប្រញាប់​សម្រាក ឬពិគ្រោះយោបល់ប្រឹក្សាជាមួយអ្នកជំនាញជាបន្ទាន់។

បញ្ហាខ្លះ អាចតិចតួច គិតថាមិនអី ប៉ុន្តែអាការខ្លះអាចគ្រោះថ្នាក់ បើសំងំទុកយូរ មិនបានទទួលការព្យាបាល ឬពិនិត្យឲ្យបានល្អិតល្អន់។

១ គ្មាន​ការ​ផ្ដោត​អារម្មណ៍

រោគ​សញ្ញា​ដំបូង​ និង​​ញឹក​ញាប់ តែងកើតមាន គឺ​​​យើង​មិន​អាច​ផ្ដោត​អារម្មណ៍ លើរឿងសំខាន់ណាមួយបានល្អដូចមុន ដែលទាំងនោះនាំឲ្យថប់បារម្ភ នេះច្រើន​តែ​បណ្ដាល​មក​ពី​ការ​សម្រាក​មិន​គ្រប់គ្រាន់ ឬហូបអាហារបានតិច។ ការព្រួយបារម្ភអំពីការងារដែលមានបញ្ហា គុណភាព​នៃ​ការងារ​ដែល​បាន​ចេញ​មក ​គឺ​តិច​ជាង ក៏ជាមូលហេតុសំខាន់ នាំឲ្យពិបាកផ្ដោតអារម្មណ៍។

ពិបាក​ក្នុង​ការ​គេង

ពិបាក​ដេក​លក់ ភ្ញាក់​កណ្ដាល​យប់ ខំ​គេង​មិន​ថា​គេង​ប៉ុន្មាន​ទេ​ នៅ​តែ​ល្ហិតល្ហៃ អស់កម្លាំងល្វើយក្នុងខ្លួនខ្លាំង។ ប្រសិន​បើ​រោគ​សញ្ញា​ទាំងនេះ​នៅ​តែបន្ត​មាន​រយៈ​ពេលយូរ វា​អាច​ប៉ះពាល់​ទាំង​សុខភាព​ផ្លូវកាយ និង​ផ្លូវចិត្ត។ ភាគច្រើន​វា​មក​ពី​ភាព​តានតឹង ការ​ថប់បារម្ភ​ ដែល​បាន​ជួប​ប្រទះ។​ យូរៗបញ្ហាថប់បារម្ភតូច នឹងទៅជាស្រ្តេសឬ depression ក៏មាន។

បរិភោគ​មិន​ធម្មតាឬខុសពីមុន

ញ៉ាំ​ច្រើន​ជាង​ធម្មតា ញ៉ាំតិចជាងធម្មតា ក៏សុទ្ធសឹងជាសញ្ញាមួយនៃ​ភាព​តានតឹង ​ដែល​ប្រាប់​យើង​ពី​រឿង​នោះ។ យើងគួរតែសម្រាកពីសកម្មភាព​ស្ត្រេស ហើយ​អ្វី​ដែល​កើត​ឡើងជា​ញឹកញាប់ ជារឿយៗគឺមិនបរិភោគ​អាហារសំខាន់ ប៉ុន្តែ​ញ៉ាំ​អាហារ​សម្រន់​ជំនួស​វិញ នេះ​ជា​សញ្ញា​មួយ​ ដែល​យើង​គួរ​សម្រាក​ផង​ដែរ​។

គ្មាន​ការ​លើក​ទឹកចិត្ត

អស់សង្ឃឹម មិនចង់ក្រោក​ ឬសូម្បីតែមិនចង់ចេញទៅក្រៅជួបមនុស្ស ។ រោគ​សញ្ញា​នេះ​ ភាគច្រើន​កើត​ចេញ​ពី​ការ​ធុញ​ទ្រាន់ខ្លាំង។​ អស់ជំនឿជឿចិត្តមនុស្សជុំវិញ គ្មានអ្នករាប់រកដូចមុន ឬគ្មានញាតិនិយាយលេងសប្បាយអឹងកងដូចមុន ក៏ជាបញ្ហាដែរ។

មនុស្សយើង កាលបើដាច់ឆ្ងាយពីគេពេក នឹងទៅជាស្ងប់ស្ងាត់ ខ្លាចមនុស្សគ្នាឯង លែងសូវនិយាយ ហើយអារម្មណ៍រវើរវាយ ហោះហើរ ទៅឆ្ងាយមិនដឹងខ្លួន។

ឈឺ​គ្រប់​ពេល​វេលា

មាន​អារម្មណ៍​មិនស្រួលខ្លួន ឈឺក្បាល ឈឺពោះ ឈឺ​គ្រប់ពេល រោគសញ្ញាទាំងនេះគឺភាពតានតឹង ការ​ថប់បារម្ភ ការ​សម្រាក​មិន​គ្រប់គ្រាន់ អាចប៉ះពាល់ដល់​ប្រព័ន្ធភាពស៊ាំរបស់យើង។ បើមិនប្រញាប់សម្រាក ឬពិគ្រោះជាមួយគ្រូពេទ្យទេនឹងឈានទៅធ្ងន់ពិបាកព្យាបាលមិនខាន។

មិនរីករាយនឹងអ្វីដែលខ្លួនធ្លាប់ចូលចិត្ត

ធ្លាប់តែ​មាន​ទម្លាប់​ចូល​ចិត្ត​កុន ចូល​ចិត្ត​ទៅ​ហាង​កាហ្វេ រហូត​ក្លាយ​ជា​មនុស្សលែង​ចូល​ចិត្ត​​ អ្វីៗទាំងអស់។ នេះ​អាច​ជា​រោគ​សញ្ញា​នៃ​ភាព​អស់សង្ឃឹម ឬការធ្លាក់ទឹកចិត្ត ប្រសិនបើអ្នកមានអារម្មណ៍បែបនេះ អ្នក​គួរ​តែ​សម្រាក ឬពិគ្រោះជាមួយវេជ្ជបណ្ឌិត ដើម្បីព្យាបាលបន្ថែម។

ប្រសិនបើរោគសញ្ញាទាំងនេះកើតឡើងញឹកញាប់ វិធីល្អបំផុត គឺរកពេលវេលាសម្រាប់​ខ្លួនឯង​ សម្រាក​ពីការងារ ចេញទៅក្រៅ មានពេលសម្រាប់ខ្លួនឯងខ្លះ ទៅណាក៏បានឆ្ងាយពីកន្លែងស្រ្តេសមួយរយៈ។

តាមពិតវិធីព្យាបាលខ្លួនឲ្យប្រសើរវិញ គឺមានច្រើន ជាឧទាហរណ៍ ប្រសិនបើអ្នកនៅជិតមនុសុ្សអវិជ្ជមាន ប្រកាន់ច្រើន ខឹងច្រើន ពូកែតែមើលបំណាំយើង ដើរចេញឆាប់គឺកាន់តែល្អ។ សុខភាពផ្លូវចិត្តគឺសំខាន់ កុំរវល់គិតពីចិត្តគេ រហូតភ្លេចមើលទឹកចិត្តខ្លួនឯង។ បើសុខភាពល្អ យើងធ្វើការងារអ្វីក៏សមប្រកបដែរ។ ចូរចាំទុក!

ប្រែសម្រួល៖ សាង ស្រីល័ក្ខ

ចុចអាន៖អ្នកមានសុខភាពខ្សោយ អាចចេញសញ្ញាទាំង ៧នេះ

ចុចអាន៖ចុចទីតាំងទាំង ១៤ លើរាងកាយនេះ អាចបំបាត់អាការឈឺចាប់នានា