ទម្រាំមានថ្ងៃនេះ តួស្រី “Squid Game” ធ្លាប់ធ្វើការងារយ៉ាងលំបាក គ្មានអ្នកស្មានដល់

មុនពេលមានឈ្មោះល្បីសុះសាយ តាមរយៈការសម្ដែងក្នុងខ្សែភាពយន្ត Squid Game ឆ្នាំ២០២១ ​តារាស្រី Lee Yoo Mi បានប្រឡូកក្នុងពិភពសិល្បៈអស់ពេលជាងមួយទសវត្សរ៍មកហើយ និងធ្លាប់ធ្វើការហាលថ្ងៃហាលភ្លៀង យ៉ាងលំបាកទៀតផងដែរ ទម្រាំមានថ្ងៃនេះ។

បើតាមការឱ្យដឹងពី Koreaboo តារាស្រីវ័យ ​២៧ឆ្នាំរូបនេះ បានចូលប្រឡូកក្នុងវិស័យភាពយន្តអស់រយៈពេល ១១ឆ្នាំមកហើយ ប៉ុន្តែទើបតែថ្មីៗនេះទេដែលកេរ្តិ៍ឈ្មោះរបស់នាងទទួលបានប្រជាប្រិយភាពខ្លាំងក្លា ក្រោយសម្ដែងជា ​Player 240 នៅក្នុងខ្សែភាពយន្ត Squid Game ស៊េរីភាគរបស់ Netflix ។ មុនពេលល្បីដូចបច្ចុប្បន្ន Lee Yoo Mi បានសារភាពថា ដោយសារតែនាងមិនមានប្រជាប្រិយភាពជាងមួយទសវត្សរ៍មកនេះ នាងបានធ្វើការក្រៅម៉ោងជាអ្នកដឹកជញ្ជូនអាហារឱ្យក្រុមហ៊ុនដឹកជញ្ជូនអាហារបែបកូរ៉េមួយឈ្មោះ Coupang Eats។

ថ្លែងក្នុងបទសម្ភាសន៍ Lee Yoo Mi បានឱ្យដឹងថា អំឡុងពេលសម្រាក នាងតែងតែធ្វើការក្រៅម៉ោងឱ្យ Coupang Eats។ អតិថិជនមួយចំនួនដែលនាងដឹកអាហារឱ្យ ពួកគេក៏បានស្គាល់នាងដែរ ហើយពួកគេក៏ភ្ញាក់ផ្អើលខ្លាំង ពេលឃើញនាងក្លាយជាដឹកជញ្ជូនបែបនេះ។ ​នាងបន្ថែមថា ពេលនោះខ្លួននាងមិនខ្វល់ពីប្រជាប្រិយភាពអីទេ សំខាន់នាងដឹងតែធ្វើការដើម្បីបានចំណូលប៉ុណ្ណោះ ហើយមិត្តភក្ដិរបស់នាងសុទ្ធតែបានដឹងរឿងនេះដែរ។

ក្រោយស្ដាប់ការរៀបរាប់របស់ Lee Yoo Mi នាងមិនត្រឹមតែប្រឹងប្រែងធ្វើការប៉ុណ្ណោះទេ អ្នកគាំទ្រជាច្រើនស្ញប់ស្ញែងនាង ដែលមិនប្រកាន់ខ្លួនខិតខំធ្វើការគ្រប់យ៉ាងឱ្យតែអាចធ្វើបាន ជាពិសេសហ្វេនៗសុទ្ធតែលាន់មាត់សរសើរនាងថាជាមនុស្សស្រីរឹងមាំ គួរឱ្យគោរពស្រឡាញ់៕

ប្រែសម្រួល៖ សន្យា

ចុចអាន៖ តាមពិត តួស្រីរឿង Squid Game មិនមែនជាតារាសម្ដែងទេ តែមានអាជីពមួយនេះ

ចុចអាន៖ “Hellbound” ខ្សែភាពយន្តកូរ៉េពេញនិយមបំផុត បន្ទាប់ពី “Squid Game”