ដឹងអត្ថប្រយោជន៍ពិសេសចំនួន ១២ ដែលបវរកញ្ញាឥណ្ឌាទទួលបានក្រោយឈ្នះមកុដ Miss Universe ច្បាស់ជាភ្ញាក់ផ្អើល

ការ​ប្រកួត​បវរកញ្ញា​ចក្រវាល​លើក​ទី៧០ បាន​បញ្ចប់​កាលពីថ្ងៃ​ទី១៣ ខែ​ធ្នូ ឆ្នាំ២០២១ នៅ​ទីក្រុង Eilat ប្រទេស​អ៊ីស្រាអែល។ ក្នុងនោះ បវរកញ្ញាចក្រវាល Harnaaz Sandhu វ័យ ២១ឆ្នាំ មកពីប្រទេសឥណ្ឌា បានដណ្ដើមឈ្មោះជាម្ចាស់ជយលាភីឯក ប្រចាំឆ្នាំ។

កញ្ញា Harnaaz Sandhu បាន​បំពាក់​មកុដ​ដោយ​បវរកញ្ញា​ចក្រវាលឆ្នាំចាស់ កញ្ញា Andrea Meza ដែលមកពី​ប្រទេស​ម៉ិកស៊ិក ដោយទទួលបានការសាទរ ស្ទើរទូទាំងពិភពលោក។ ក្រៅពីក្លាយជាម្ចាស់មកុដ ហើយមានឈ្មោះល្បីល្បាញភ្លាមៗ កញ្ញា Harnaaz Sandhu បានទទួលអត្ថប្រយោជន៍ផ្សេងជាច្រើនទៀត ​មិនខុសពីបវរកញ្ញាមុនៗប៉ុន្មានឡើយ។

ខាងក្រោមនេះជាអត្ថប្រយោជន៍ទាំង១២ ដែលបវរកញ្ញា Harnaaz Sandhu មកពីប្រទេសឥណ្ឌា ឆ្នាំ២០២១ ទទួលបានពីកម្មវីធី Miss Universe!

១-​ គ្រងមកុដ​បវរកញ្ញា​ចក្រវាល ​រចនាពី​មាស ​១៨​ការ៉ាត់ រំលេចជាមួយ​ពេជ្រ​ចំនួន ​១៧៧០​គ្រាប់ ដែលមានតម្លៃ ៥លានដុល្លារអាមេរិក។

២- ទទួលបានរង្វាន់ជាប្រាក់សុទ្ធសរុបចំនួន ២៥ម៉ឺនដុល្លារអាមេរិក។

៣- មិន​មាន​ការ​ប្រកាស​​ផ្លូវ​ការ​ទាក់​ទង​នឹង​ប្រាក់ខែរបស់បវរកញ្ញាចក្រវាលនោះទេ ខណៈប្រភពខ្លះបានចុះផ្សាយថា បវរកញ្ញាឆ្នាំនេះ ទទួលបានប្រាក់ខែចំនួន ៥០ម៉ឺនដុល្លារអាមេរិក។

៤- ទទួលបានការ​ស្នាក់នៅ​ Apartment ​របស់ស្ថាប័នបវរកញ្ញា​ចក្រវាល​ នៅ​ទីក្រុង​ញូវយ៉ក រយៈពេល​មួយឆ្នាំ។

៥- មានជំនួយការផ្ទាល់ខ្លួន រួមមានអ្នកផាត់មុខ និងផ្នែកផ្សេងច្រើនទៀត រយៈពេលពេញមួយឆ្នាំ។

៦-ទទួលបានការផ្ដល់ជូននូវគ្រឿងសម្អាង ស្បែកជើង សម្លៀកបំពាក់ កាបូប គ្រឿងអលង្ការ សេវាកម្មថែរក្សាសម្រស់ មាត់ធ្មេញ សុខភាព និងផ្នែកច្រើនទៀតដោយហ្វ្រីៗ រយៈពេលមួយឆ្នាំ។

៧- ឱកាសធ្វើការជាមួយអ្នកថតរូបល្បីៗទូទាំងពិភពលោក ដើម្បីបង្កើនសក្តានុភាពក្នុងវិស័យបង្ហាញម៉ូដ។

៨-ចូលរួមផ្តាច់មុខជាមួយព្រឹត្តិការណ៍ដែលពាក់ព័ន្ធនឹងវិស័យរបស់ខ្លួនដូចជា ពិធីជប់លៀង ការបញ្ចាំងភាពយន្ត មហោស្រព កម្មវិធីប្រកួតបវរកញ្ញា កម្មវិធីសប្បុរសធម៌ សន្និសីទសារព័ត៌មាន និងកម្មវិធីជាច្រើនទៀត។

៩-ឱកាសធ្វើដំណើរដោយឥតគិតថ្លៃនៅជុំវិញពិភពលោក រួមមានការស្នាក់នៅសណ្ឋាគារ និងអាហារហូបចុកដោយសេរីផងដែរ។

១០- ទទួលបានអ្នករចនាម៉ូដអាជីពផ្ទាល់ខ្លួន រួមទាំងចុងភៅ និងផ្នែកច្រើនទៀត។

១១-​ក្លាយជាអគ្គរាជទូត​នៃ​អង្គការ​បវរកញ្ញា​ចក្រវាល។

១២- ទទួលបានអត្ថប្រយោជន៍ផ្សេងៗដែលផ្តល់ដោយម្ចាស់ឧបត្ថម្ភកម្មវិធីបវរកញ្ញាចក្រវាលឆ្នាំ ២០២១ ក្នុងនោះមានក្រុមហ៊ុនគ្រឿងអលង្ការល្បីឈ្មោះ ម៉ាក Mouawad៕

ប្រែសម្រួល៖ សន្យា

ចុចអាន៖ ទម្លាយសាវតាអស្ចារ្យរបស់បវរកញ្ញា ឥណ្ឌា មុនគ្រងមកុដ Miss Universe

ចុចអាន៖ រឿងរ៉ាវជុំវិញប្រវត្តិនៃការបង្កើតកម្មវិធីប្រកួត «បវរកញ្ញាចក្រវាល»