មកដឹងសាវតារពិសេសរបស់ព្រះអង្គម្ចាស់ Faisal bin Farhan Al Saud យាងមក កម្ពុជា ថ្ងៃនេះ

ព្រះអង្គម្ចាស់ Faisal bin Farhan Al Saud រដ្ឋមន្រ្តីការបរទេសអារ៉ាប៊ីសាអ៊ូឌីត បាន​ដឹកនាំ​គណៈ​ប្រតិភូយាង​មក​បំពេញ ព្រះរាជ​ទស្សនកិច្ច​ផ្លូវការ នៅកម្ពុជា ថ្ងៃនេះ ដូច្នេះ​កម្ពុជាថ្មី សូមបង្ហាញពីសាវតារពិសេសរបស់ទ្រង់ ជូនមិត្តអ្នកអានបានជ្រាប ។

ជីវប្រវត្តិ​របស់​ព្រះអង្គ Faisal bin Farhan Al Saud

ព្រះអង្គម្ចាស់ Faisal bin Farhan Al-Saud ប្រសូត​នៅទីក្រុង Frankfurt ប្រទេស​អាល្លឺម៉ង់​ខាងលិច ហើយ​បានចំណាយពេល​មួយផ្នែកនៃកុមារភាព និងវ័យរបស់ទ្រង់​នៅក្នុងប្រទេសនោះ ដែល​ជា​មូលហេតុ​ទ្រង់​អាច​និយាយ​ភាសា​អាល្លឺម៉ង់​ បានយ៉ាង​ស្ទាត់ជំនាញ ។

ទ្រង់ធ្លាប់បានបម្រើការជាឯកអគ្គរដ្ឋទូតអារ៉ាប៊ីសាអូឌីត ​ប្រចាំប្រទេសអាល្លឺម៉ង់​ ចាប់តាំងពីថ្ងៃទី ២៧ ខែមីនា ឆ្នាំ២០១៩។ ព្រះអង្គក៏បានបម្រើការជារដ្ឋមន្ត្រីការបរទេស ​នៃប្រទេសអារ៉ាប៊ីសាអូឌីត ​ចាប់តាំង​ពីថ្ងៃទី ២៣ ខែតុលា ឆ្នាំ ២០១៩ ​ដោយ​ព្រះរាជក្រឹត្យ​ ដែល​ចេញ​ដោយ​ស្ដេច Salman។

ជីវិតដំបូង និងអាជីពនយោបាយ

ព្រះអង្គម្ចាស់ Faisal គឺជា​សមាជិក​នៃ​គ្រួសារ​រាជវង្ស​អារ៉ាប៊ីសាអ៊ូឌីត​​ និង​ជា​បុត្រ​របស់​ព្រះអង្គម្ចាស់ Farhan bin Abdullah al Saud ដោយទ្រង់បាន​ទទួល​ការ​អប់រំ​នៅ​សហរដ្ឋអាមេរិក។ ទ្រង់​បាន​បម្រើការ​ជា​ទីប្រឹក្សា​នៅ​ស្ថានទូត​អារ៉ាប៊ីសាអ៊ូឌីត​ នៅ​សហរដ្ឋអាមេរិក​ពីឆ្នាំ ២០១៧ ដល់ឆ្នាំ ២០១៩។

ព្រះអង្គ​បាន​កាន់តំណែងជាន់ខ្ពស់ នៅក្នុងក្រុមហ៊ុនអារ៉ាប៊ីសាអូឌីត និងក្រុមហ៊ុនអន្តរជាតិ ជា​ចម្បង​ លើ​វិស័យ​អវកាស និង​អាវុធ។ ទ្រង់​ត្រូវបានតែងតាំង​ជាឯកអគ្គរដ្ឋទូត​ប្រចាំប្រទេស​អាល្លឺម៉ង់​ ដែល​ជា​នាយកក្រុមហ៊ុន​សព្វាវុធ Saudi Arabian Military Industries (SAMI)។ បន្ទាប់មក ទ្រង់​បានធ្វើការ​ឲ្យ​ឯកអគ្គរដ្ឋទូត​អារ៉ាប៊ីសាអូឌីត ​ប្រចាំ​សហរដ្ឋអាមេរិក។

ក្នុងនាមជាអ្នកជំនាញខាងឧស្សាហកម្មការពារជាតិ ព្រះអង្គ​ក៏បានធ្វើជាប្រធានក្រុមហ៊ុន​បណ្ដាក់ទុន​រួមគ្នា​ រវាង​សហរដ្ឋអាមេរិក និង​អារ៉ាប៊ីសាអ៊ូឌីត ​ជាមួយក្រុមហ៊ុនអាកាសចរណ៍ Boeing ។ ព្រះអង្គម្ចាស់ Faisal ក៏ធ្លាប់ធ្វើជាទីប្រឹក្សារបស់រាជវាំង អារ៉ាប៊ីសាអូឌីតផងដែរ។

នៅថ្ងៃទី ២៣ ខែតុលា ឆ្នាំ ២០១៩ ទ្រង់​ត្រូវ​បានតែងតាំងជារដ្ឋមន្ត្រីក្រសួងការបរទេស​ នៅ​អារ៉ាប៊ីសាអ៊ូឌីត រហូតមកដល់បច្ចុប្បន្ននេះ ។

ទ្រព្យសម្បត្តិរបស់ទ្រង់

ទ្រង់​គឺជាអ្នកការទូតដែលមានជាងគេបំផុត ហើយត្រូវបានចុះបញ្ជី​អ្នកការទូតដ៏ពេញ​និយមដូចគ្នា។ យោងតាមការវិភាគរបស់ Wikipedia, Forbes & Business Insider ព្រះអង្គម្ចាស់ Faisal bin Farhan Al Saud មានទ្រព្យសម្បត្តិសុទ្ធ​​​ ប្រហែល ១.៥ លានដុល្លារ ៕

ប្រែសម្រួល៖ សាង ស្រីល័ក្ខ

ចុចអាន៖គោលនយោបាយធំៗចំនួន ៥ ប្រធានាធិបតី កូរ៉េខាងត្បូង ថ្មី ដាក់ចេញមុនជាប់ឆ្នោត

ចុចអាន៖មកស្គាល់ប្រវត្តិបិតានុយក្លេអ៊ែរ និងរូបមន្តផលិតអាវុធប្រល័យលោក J. Robert Oppenheimer