ទម្លាយប្រាក់ខែអ្នកបោសសម្អាតក្នុងវិមានម្ចាស់ក្សត្រី Elizabeth

មិនចម្លែកឡើយ ដែលអ្នកមានៗលើលោករមែងចំណាយប្រាក់ឈ្នួលរាប់សិបលានដុល្លារក្នុង១ឆ្នាំៗ ដើម្បីជួលមនុស្សមកធ្វើការក្នុងផ្ទះ ឬជួលអង្គរក្សក្នុងតម្លៃកប់ពពកដើម្បីការពារសុវត្ថិភាពរបស់ពួកគេ។

ដូចគ្នានេះគ្រួសាររាជវង្សអង់គ្លេស ត្រូវបានបណ្ដាញសារព័ត៌មានក្នុងស្រុក​កាស់កកាយនូវតម្លៃប្រាក់ឈ្នួលអ្នកបម្រើម្នាក់ៗ ហើយបន្ទាប់ពីសាធារណជនជាច្រើនបានដឹង ពួកគេពិតជាភ្ញាក់ផ្អើលជាខ្លាំង។

យោងតាមព័ត៌មានពី Daily Mail បានឲ្យដឹងថា ក្នុង១ឆ្នាំ វិមាន Buckingham Palace នៅទីក្រុងឡុងដ៍ ប្រទេសអង់គ្លេស បានផ្ដល់ប្រាក់បៀវត្សរ៍ឱ្យបុគ្គលិកដែលជាអ្នកសម្អាតធូលីគ្រឿងសង្ហារឹមក្នុងបរមរាជវាំង ក្នុងម្នាក់ទទួលបានចាប់ពី ១១,៣០០ ផោន (ជាង ១៤,៨០០ដុល្លារ) ដល់ ២២,៦០០ (ជាង៣៤,០០០ ដុល្លារ)។ ការងាររបស់ពួកគេ បោសជូតតែលើគ្រឿងសង្ហារឹមប៉ុណ្ណោះ ខណៈប្រាក់ខែជាក់លាក់នឹងត្រូវផ្ដល់ជូន អាស្រ័យលើចំនួនម៉ោងធ្វើការរបស់ពួកគេម្នាក់ៗ។

ក្នុងនោះដែរ គេដឹងថា បុគ្គលិកទាំងអស់អាចជ្រើសរើសធ្វើការចាប់ពី ២០-៤០ ម៉ោង ក្នុងមួយសប្តាហ៍ នៅក្នុងវិមានដែលមានផ្ទៃសរុប ៧៧,០០០ ម៉ែត្រការ៉េ និង ៧៧៥ បន្ទប់ ហើយពេលវេលាធ្វើការគឺអាចបត់បែនបានតាមការស្នើសុំរបស់បុគ្គលិក។

ប្រភពបន្ថែមថា ទោះជាបុគ្គលិកបោសសម្អាត​មិនតម្រូវឱ្យមានការកម្រិតវប្បធម៌ល្អក្ដី ប៉ុន្តែពួកគេត្រូវមានបុគ្គលិកលក្ខណៈរវាសរវៃ យកចិត្តទុកដាក់ខ្ពស់ និងហ្មត់ចត់ ដើម្បីអាចសម្រេចបាននូវប្រសិទ្ធភាពការងារល្អបំផុត៕

ប្រែសម្រួល៖ សន្យា

ចុចអាន៖ អាហារ ៦មុខ ម្ចាស់ក្សត្រី អេលីហ្សាបែត មិនសោយទាល់តែសោះ និងសោយជាប្រចាំ

ចុចអាន៖ សួយសារអាករ​អ្វី​ដែលព្រះ​មហាក្សត្រី ELIZABETH មាន​សិទ្ធ​ទទួល​យក​ពី​ប្រទេស​ផ្សេង?