KPT+

ជាំមុខមានប៉ុន្មានប្រភេទ? អាចព្យាបាលជាទេ?

បានផុស

៣ years មុន

នៅ

ថ្ងៃសុក្រ ១៣ ឧសភា ២០២២

ដោយ

ជាំមុខជាជំងឺវិបត្តិជាតិពណ៌ដែលបណ្តាលមកពីកោសិកាមេឡាណូសាយរបស់ស្បែកបញ្ចេញជាតិពណ៌មេឡានីនច្រើន ហើយបង្កឱ្យមានការឡើងស្នាមពណ៌ត្នោត ឬក្រមៅស្រាលនៅលើថ្ងាស ថ្ពាល់ ច្រមុះ ឬមាត់។ តើអ្នកណាងាយប្រឈមនឹងជាំមុខជាងគេ? ហើយជាំមុខចែកចេញជាប៉ុន្មានប្រភេទ? អាចព្យាបាលជាដែរឬទេ?

វេជ្ជបណ្ឌិត ហុង លីដា ឯកទេសជំងឺសើស្បែកទូទៅនៅពេទ្យសើស្បែកអាដាម៉ាបានឱ្យដឹងថា ភាគច្រើនស្រី្តងាយប្រឈមនឹងការជាំមុខជាងបុរស ហើយបើគិតតាមអាយុគឺនៅចន្លោះ ២០ ទៅ ៤០ ឆ្នាំ តែយើងមិនដឹងថាមកពីមូលហេតុអ្វីទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះទៅទៀត ស្រ្តីដែលមានសម្បុរស្រគាំ (សណ្តែកបាយ) មានន័យថា មិនសពេក ហើយក៏មិនខ្មៅពេកក៏ងាយប្រឈមនឹងជាំមុខដែរ។ បើស្រ្តីដែលមានសម្បុរស ឬខ្មៅតែម្តងអត់សូវប្រឈមនឹងបញ្ហាជាំមុខទេ។

ស្បែករបស់យើងចែកចេញជាបីស្រទាប់ ស្រទាប់ខាងលើ ស្រទាប់កណ្តាល និងស្រទាប់ខាងក្រោម។ ជាទូទៅជាំមុខកើតតែលើស្រទាប់ស្បែកលើ និងកណ្តាលទេ ព្រោះស្រទាប់ស្បែកទាំង ២ នេះមានផ្ទុកកោសិកាមេឡាណូសាយដែលផលិតជាតិពណ៌។

ជាទូទៅយើងបែងចែកជាំមុខជា ៣ ប្រភេទទៅតាមកម្រាស់ជាតិពណ៌ និងទីតាំងដែលកើតលើស្រទាប់ស្បែក៖

១. ប្រភេទទី ១

ស្នាមជាំកើតនៅស្រទាប់ស្បែកខាងលើ។ បើយើងសង្កេតមើលពីខាងក្រៅ ជួនកាលឃើញស្នាមជាំមានសភាពដិតច្បាស់ តែតាមពិតជាប្រភេទស្រាលទេ ហើយងាយស្រួលក្នុងការព្យាបាល។

២. ប្រភេទទី ២

ស្នាមជាំកើតនៅស្រទាប់ស្បែកកណ្តាលដែលមានសភាពព្រាល អត់សូវច្បាស់ ឬមានគែមអត់សូវច្បាស់ ហើយមានការពិបាកក្នុងការព្យាបាល។

៣. ប្រភេទទី ៣

ជាប្រភេទចំរុះដែលស្នាមជាំអាចកើតទាំងនៅស្បែកស្រទាប់ខាងលើ និងនៅស្រទាប់កណ្តាល មានពណ៌ត្នោត តែអាចព្យាបាលបាន។

បញ្ហាជំាមុខអាចព្យាបាលជា តែក៏ងាយនឹងលាប់មកវិញដែរ។ ឧទាហរណ៍ម៉ាក់ៗពពោះ ពេលព្យាបាលជាសះស្បើយ ស្រាប់តែម៉ាក់ៗពពោះម្តងទៀតដែលជាហេតុធ្វើឱ្យម៉ាក់ៗជាំមុខឡើងវិញ។ ចំណែកស្រ្តីដែលឧស្សាហ៍ត្រូវពន្លឺថ្ងៃ ក្រោយពេលជាសះស្បើយហើយ បើត្រូវនឹងពន្លឺថ្ងៃខ្លាំង ហើយមិនសូវបានការពារងាយនឹងជាំមុខវិញណាស់។

ភាគច្រើនម៉ាក់ៗដែលមានបញ្ហាជាំមុខពេលពពោះអាចជាសះស្បើយក្រោយពេលសម្រាលរួច តែក៏មានម៉ាក់ៗមួយចំនួននៅតែបន្តមានបញ្ហាជាំមុខដែរ ដោយសារកត្តាប្រឈមមួយចំនួនដែលម៉ាក់ៗមិនបានទប់ស្កាត់ដូចជា ការត្រូវពន្លឺថ្ងៃ ឬការប្រើប្រាស់ថ្នាំមួយចំនួនដែលម៉ាក់ៗមិនដឹងថាអាចបង្កឱ្យជាំមុខ។

ចំពោះជាំដែលទើបតែឡើងថ្មីៗមានការងាយស្រួលក្នុងការព្យាបាល ហើយទទួលបានលទ្ធផលល្អ។ ទោះបីជាយ៉ាងណាក៏ដោយ បញ្ហាជាំដែលមានសភាពខ្មៅដិតខ្លាំង និងមានរយៈពេលយូរក៏អាចព្យាបាលជាដែរដោយសារឥឡូវមានទំនើបកម្មផ្នែកវេជ្ជសាស្រ្តដូចជា ការធ្វើ Chemical Peel បន្ថែម ពីលើការប្រើថ្នាំព្យាបាល ឬការបាញ់កាំរស្មីបំបាត់ជាំជាដើម។

ផ្ទុយមកវិញបើយើងធ្វើការព្យាបាលដោយមិនមានបច្ចេកទេស ឬជំនាញត្រឹមត្រូវ យើងងាយនឹងជាំមុខឡើងវិញណាស់ ហើយលាប់មកខ្លាំងជាមុនទៀតដែលធ្វើឱ្យពិបាកព្យាបាល។ ដូច្នេះទាមទារឱ្យយើងជួបពិគ្រោះជាមួយគ្រូពេទ្យឯកទេសសើស្បែកមុននឹងយើងទទួលការព្យាបាលតាមស្ថានភាពស្បែក។

ពេលជំាមុខ យើងគួរចៀសវាងសាកប្រើផលិតផលផ្សេងៗដោយសង្ឃឹមថា ក្រោយពីប្រើហើយអាចបាត់ជាំ ព្រោះការប្រើប្រាស់ផលិតផលគ្រាន់តែអាចថែទាំស្បែកប៉ុណ្ណោះ មិនមែនជាការព្យាបាលទេ។ ជាងនេះទៅទៀត បើផលិតផលដែលយើងប្រើមានបញ្ហា យើងមិនត្រឹមតែមិនអាចជាពីជាំមុខទេ តែបែរជាបង្កឱ្យមានបញ្ហាបន្ថែមទៅលើស្បែកមុខរបស់យើងទៅវិញ៕

អត្ថបទផ្ដល់ដោយ៖Hello Krupet

ចុចអាន៖ម៉ាសការ៉ុតអាចជួយឲ្យស្បែកភ្លឺរលោង និងគ្មាន ស្លាកស្នាម

ចុចអាន៖អ្នកដែលសំបូរមុនពេញមុខ ទទួលទានអាហារទាំងនេះ ធានាថាមុខរលោងស្អាតមិនខាន