មិនស្រួលទេ! ដើម្បីក្លាយជាបុរសពេញលក្ខណៈ កុលសម្ព័ន្ធនៅព្រៃ Amazon ត្រូវឆ្លងកាត់ភាពឈឺចាប់ ឲ្យស្រមោចខាំ

ប្រសិនបើពួកជំទង់មិនបានធំធាត់ឡើងជាមួយនឹងការឈឺចាប់ ឬហត់នឿយនោះទេ កុលសម្ព័ន្ធ Sataré Mawé នៅព្រៃ Amazon នឹងធ្វើពិធីឆ្លងភាពឈឺចាប់ឱ្យក្មេងប្រុសជាមុនសិន មុនពួកគេក្លាយជាបុរសពេញលក្ខណៈ។

កុលសម្ព័ន្ធ Sateré ឬ Sateré-Mawé គឺជាជនជាតិដើមភាគតិចនៃប្រទេសប្រេស៊ីលដែលរស់នៅក្នុងព្រៃ Amazon ស្ថិតនៅលើព្រំដែននៃរដ្ឋ Amazonas និង Para ។ កុលសម្ព័ន្ធនេះមានប្រជាជនប៉ាន់ស្មានប្រហែល ១៣,៣៥០នាក់ រកស៊ីចិញ្ចឹមសត្វ និងដាំដុះ guarana (ជាឱសថដែលប្រើជាថ្នាំរំញោច)។

ប្រជាជននៃកុលសម្ព័ន្ធ Sataré Mawé មានប្រពៃណីដ៏ប្លែកពីគេមួយ ដែលតម្រូវឱ្យក្មេងប្រុសអាយុចាប់ពី ១២ឆ្នាំ ធ្វើពិធីឆ្លងដើម្បីក្លាយជាអ្នកប្រយុទ្ធឬអ្នកចម្បាំង ដោយការលូកដៃឱ្យស្រមោចភ្លើងខាំ រហូតទាល់តែសន្លប់ក៏មាន។

ដើម្បីក្លាយជាបុរសលក្ខណៈ ឬអ្នកចម្បាំងក្នុងកុលសម្ព័ន្ធនេះ ពិតជាមិនងាយស្រួលនោះទេ ព្រោះក្មេងប្រុសត្រូវស៊ូទ្រាំឱ្យស្រមោចខាំ ដើម្បីបង្ហាញពីសមត្ថភាពរបស់ពួកគេក្នុងការទ្រាំទ្រនឹងការឈឺចាប់ និងភាពលំបាក។ ដំបូងគេចាប់ស្រមោចដាក់ក្នុង​ស្រោម​ដៃដែលធ្វើពីស្លឹកឈើ រួច​​ដាក់​ថ្នាំ​សណ្តំ​ធម្មជាតិឱ្យវាសន្លប់។ ក្រោយ​មកគេ​ឱ្យ​ក្មេង​ប្រុស​​ពាក់ស្រោមដៃនោះ ហើយពេលស្រមោចដឹងខ្លួនវិញ ក្មេងប្រុសត្រូវដាក់ដៃចូលទៅក្នុងស្រោមដៃ ទុកឱ្យស្រមោចខាំឱ្យបានយ៉ាងហោចពី ៥-១០នាទី។ បើ​ក្មេងប្រុសណា​មិន​អាចទ្រាំនឹងការ​ឈឺ​ចាប់​បានទេ ពួកគេមិនអាចក្លាយជាអ្នកចម្បាំងពេញលេញបានឡើយ។

ជាទូទៅបន្ទាប់ពីលូកដៃឱ្យស្រមោចខាំ ដៃរបស់ក្មេងប្រុសទាំងអស់តែងតែស្ពឹកស្រពន់ និងមិនអាចកម្រើកបានជាបណ្ដោះអាសន្ន ដោយសារពិសរបស់ស្រមោច។ ចំពោះក្មេងប្រុសដែលអាចរងការឈឺចាប់រហូតដល់ចប់នាទីកំណត់ ពេលដកដៃមកវិញពួកគេរមែងញ័រពេញខ្លួន និងសន្លប់ទៀតផង។ ទោះបីជោគជ័យលើកទី១ក៏ដោយ ជាធម្មតាក្មេងប្រុសនៅក្នុងកុលសម្ព័ន្ធ Sataré Mawé ត្រូវឆ្លងកាត់ពិធីឆ្លងអ្នកចម្បាំងនេះ ទាល់តែគ្រប់ ២០ដងសិន ទើបអាចចាត់ទុកជាបុរសពេញលក្ខណៈ ឬអ្នកចម្បាំងពិតប្រាកដបាន។

ជាសំណាងល្អដែរ រហូតមកដល់ពេលនេះ មិនទាន់មានសេចក្តីរាយការណ៍ណាមួយអំពីករណីអ្នកស្លាប់ដោយសារការលូកដៃឱ្យស្រមោចភ្លើងខាំនោះទេ ខណៈប្រពៃណីនេះនៅតែបន្តអនុវត្តរហូតមកដល់បច្ចុប្បន្ន៕

ប្រែសម្រួល៖ សន្យា

ចុចអាន៖ វិធីថែរក្សាសម្រស់ដ៏ចម្លែករបស់ស្រ្តីកុលសម្ព័ន្ធនៅ មីយ៉ាន់ម៉ា