ស្ត្រីតាជីគីស្ថាន ចាត់ទុករោមចិញ្ចើមក្រាស់ជាប់គ្នា តំណាងឱ្យភាពបរិសុទ្ធ

នៅតាជីគីស្ថាន រោមចិញ្ចើមដែលរួមគ្នាក្រាស់ ត្រង់ប្រជុំចិញ្ចើម ត្រូវបានគេចាត់ទុកជាស្តង់ដារនៃភាពស្រស់ស្អាតចំពោះស្ត្រី។ អប្បិយយជំនឿខ្លះជឿថា ចិញ្ចើមកាន់តែជិតគ្នា ប្តីនឹងនៅក្បែរមិនទៅណា។ ក្រៅពីនេះ ប្រជុំចិញ្ចើមកៀកគ្នាយ៉ាងក្រាស់ត្រូវបានគេចាត់ទុកជានិមិត្តរូបនៃភាពបរិសុទ្ធ និងភាពគ្មានទោសពៃរ៍ចំពោះស្ត្រី។

ជាអកុសល ស្រ្តីខ្លះមិនមានរោមប្រជុំបែបនេះទេ ជាហេតុធ្វើឲ្យពួកនាងក្លែងបន្លំវា ហើយប្រើឱសថបុរាណដើម្បីបណ្ដុះរោមតាំងពីក្មេងៗ ឬគូររោមចិញ្ចើមដោយខ្លួនឯងដើម្បីមើលទៅដូចមានរោមចិញ្ចើមដុះក្រាស់ពិតៗ។

និទានកថាអំពីប្រពៃណីដែលប្រជាជនតាជីគីស្ថានចាត់ទុករោមចិញ្ចើមក្រាស់ៗជានិមិត្តរូបនៃភាពស្រស់ស្អាតមកទល់សព្វថ្ងៃ និយាយថា កាលពីយូរលង់មកហើយមានព្រះនាងមួយអង្គព្រះនាម Zahra Khanom Tadj es-Saltaneh។ ព្រះនាងជាមនុស្សស្រីដែលមានគល់រោមចិញ្ចើមប្រជុំគ្នាយ៉ាងជិត ហើយទ្រង់ជាព្រះនាងដ៏ស្រស់ស្អាតដែលត្រូវបានបុរសៗជាច្រើនប្រាថ្នាជាគូ។ ថ្ងៃមួយ មាន​បុរស១៣នាក់ បានចាប់បង្ខំព្រះនាងធ្វើជាប្រពន្ធរបស់ពួកគេ ប៉ុន្តែដោយចង់រក្សាព្រហ្មចារី ព្រះ​នាង Zahra បាន​ធ្វើ​អត្តឃាត​។

ដោយសារវីរភាពរបស់ព្រះនាងអង្គនេះ ស្ត្រីតាជីគីស្ថាន បានចាត់ទុកទ្រង់ជានិមិត្តរូបរបស់ពួកនាង ហើយពួកនាងតែងតែជឿថា រោមចញ្ចើមប្រជុំគ្នា តំណាងឱ្យភាពបរិសុទ្ធ គ្មានសៅហ្មង។ ដូច្នេះហើយទើបបានជាស្រីៗជំនាន់ក្រោយ ព្យាយាមទុករោមចិញ្ចើមឱ្យដុះច្រើន ជាពិសេសរកវិធីយ៉ាងណាឱ្យរោមចិញ្ចើមខិតជិតគ្នា ឬជាប់គ្នា ដើម្បីបង្ហាញពីភាពបរិសុទ្ធ ក៏ដូចជាតំណាងឱ្យភាពស្រស់ស្អាតផងដែរ៕

ប្រែសម្រួល៖ សន្យា

ចុចអាន៖ ស្តង់ដារសម្រស់នៅ អ៊ីរ៉ង់ ស្ថិតនៅត្រង់មួយចំណុចគត់