ស្ថានទូតបារាំង នឹងរៀបចំការតាំងពិព័រណ៍“ផ្សារបារាំង”ដោយបើកឲ្យចូលទស្សនាដោយសេរីនៅខែវិច្ឆិកាខាងមុខ

នៅថ្ងៃសៅរ៍ ទី១៩ ខែវិច្ឆិកា ឆ្នាំ២០២២ ខាងមុខ ស្ថានទូតបារាំងប្រចាំកម្ពុជា នឹងរៀបចំនូវការតាំងពិព័រណ៍ “ផ្សារបារាំង” នៅស្ថានទូតបារាំង ហើយអនុញ្ញាតឲ្យចូលរួមដោយសេរី ពីម៉ោង១០ព្រឹក ដល់ម៉ោង ៥:៣០ល្ងាច ដោយឥតគិតថ្លៃ។

ពិព័រណ៍ “ផ្សារបារាំង” គឺផ្តួចផ្តើមឡើងដោយជនជាតិបារាំងដែលរស់នៅកម្ពុជា និងធ្វើឡើងស្ដី​អំពី​វប្បធម៌ ការ​ច្នៃប្រឌិត ការតាំងពិព័រណ៍អាហារ​ សិល្បៈផ្សេងៗ និង​សុខុមាលភាព​ជា​ដើម នៅក្នុងសួនរបស់ស្ថានទូត អមជាមួយនឹងដើមឈើធំៗ ពណ៌ខៀវស្រងាត់ត្រជាក់ភ្នែក និងខ្យល់អាកាសបរិសុទ្ធ។

ក្នុងកម្មវិធីនេះ ក៏មានជាការតាំងពិព័រណ៍ផ្សេងៗ ដូចជាពិព័រណ៍ចំណីអាហារ ការលេងកីឡាជាមួយ Decathlon Cambodia និងកម្មវិធីវប្បធម៌ផ្សេងទៀត។ កម្មវិធី “ផ្សារបារាំង”នេះ មិនមែនតម្រូវសម្រាប់តែយុវជនឡើយ តែមនុស្សចាស់ ក៏អាចចូលរួមបានដូចគ្នា ព្រោះស្ថានទូតបារាំង ក៏បានរៀបចំល្បែង ក៏ដូចជាសិល្បៈផ្សេងៗសម្រាប់មនុស្សចាស់ផងដែរ។

ជាមួយនឹងការចូលលេង និងដើរទស្សនាសិល្បៈវប្បធម៌ផ្សេងៗក្នុងសួនស្ថានទូតបារាំងនេះ លោកអ្នក ក៏អាចមានឱកាសបានស្គាល់ និងទទួលបាននូវបទពិសោធថ្មីៗ ពីវប្បធម៌បារាំង ព្រមទាំង ម្ហូបអាហាររបស់បារាំងថែមទៀត។​ នេះ គឺជាឱកាសមួយដែលលោកអ្នក ឬសិស្សានុសិស្សអាចចូលក្នុងស្ថានទូតបារាំង និងទស្សនាពីទិដ្ឋភាពដ៏ស្រស់ស្អាត និងខ្យល់បរិសុទ្ធពីទីនោះបាន។

សូមជម្រាបជូនថា​ កម្មវិធីនេះ បានរៀបចំជាច្រើនដងរួចមកហើយក្នុងឆ្នាំកន្លងទៅ។ អ្នកដែលចូលរួមការតាំងពិព័រណ៍នេះ មិនតម្រូវឲ្យយកកាបូបស្ពាយ ឬឥវ៉ាន់ផ្សេងៗពីខាងក្រៅចូលក្នុងស្ថានទូតឡើយ៕

ដោយ៖ អុន ស្រីមាន