ជំងឺផ្លូវចិត្តម្យ៉ាងគិតថាស្អាតដាច់គេ ហើយមនុស្សគ្រប់គ្នាសុទ្ធតែលង់ស្នេហ៍នឹងខ្លួន

ជំងឺ “Erotomania” គឺជាជំងឺផ្លូវចិត្តម្យ៉ាង ធ្វើឲ្យអ្នកជំងឺគិតថាគេស្រឡាញ់ខ្លួនទាំងគេមិនបានស្រឡាញ់សោះ ពេលខ្លះគេមិនស្គាល់គាត់ផង ព្រោះអ្នកនោះអាចជាតារា ឬបុគ្គលល្បីណាមួយ។ អ្នកជំងឺជឿជាក់យ៉ាងខ្លាំងថាស្នេហានេះពិតជាកើតឡើងមែន ហើយពិបាកនឹងទទួលយកការពិតថាគេមិនបានស្រឡាញ់គាត់ទេ។

ជំងឺ “Erotomania” គឺជាជំងឺកម្រដែលអាចកើតឡើងដោយឯកឯង ប៉ុន្តែភាគច្រើនវាផ្សារភ្ជាប់ទៅនឹងស្ថានភាពសុខភាពផ្លូវចិត្តផ្សេងៗទៀតដូចជា ជំងឺវិកលចរិក ឬជំងឺបាយប៉ូឡាជាដើម។ ជាក់ស្ដែងជំងឺនេះ ឧស្សាហ៍កើតឡើងទៅលើមនុស្សស្រីច្រើនជាងមនុស្សប្រុស ហើយហ្សែនជាចំណែកតូចមួយក្នុងជំងឺនេះក្រៅពីបរិស្ថាន ការរស់នៅ និងសុខភាពផ្លូវចិត្ត។ លក្ខណៈទូទៅរបស់មនុស្សដែលមាន “Erotomania” រួមមាន៖

_ មិនសូវជឿជាក់លើខ្លួនឯង តែគិតថាខ្លួនស្អាត

_ ទទួលអារម្មណ៍ពីការបដិសេធ និងអារម្មណ៍ឯកា

_ ការរក្សាគម្លាតពីសង្គម

_ និងចិត្តចង្អៀតចំពោះទស្សនៈអ្នកដទៃ។ 

កាលដែលអ្នកមានជំងឺប្រភេទនេះ អ្នកនឹងពិបាកធ្វើទំនាក់ទំនងក្នុងសង្គមបន្តិចដោយសារតែការភ័ន្តច្រឡំនឹងទឹកមុខឬកាយវិការអ្នកដទៃ ជួនកាលគេនិយាយជាមួយធម្មតាសោះបែរជាគិតថាគេញ៉ែទៅវិញ។ ការស្រាវជ្រាវបង្ហាញឲ្យឃើញថា បណ្ដាញសង្គមអ៉ីនធឺណែតនាំឲ្យស្ថានភាពជំងឺនេះកាន់តែធ្ងន់ធ្ងរឡើងព្រោះថាវាជាវិធីមួយងាយស្រួលតាមដានមនុស្សផ្សេងៗដោយមិនឲ្យគេដឹងខ្លួន។

យើងមិនអាចតេស្តរកជំងឺ “Erotomania” ទេ ប៉ុន្តែគ្រូពេទ្យនឹងសួរនាំអ្នកអំពីស្ថានភាពផ្លូវចិត្តពីមុនមកនិងជំងឺទូទៅធម្មតាមុននឹងវិនិច្ឆ័យរោគ។ សូមបញ្ជាក់ដែរថា ការព្យាបាលចម្បងមានតែមួយវិធីគត់គឺការនិយាយជាមួយពេទ្យចិត្តសាស្ត្រ ក្នុងករណីធ្ងន់ធ្ងរដល់ថ្នាក់បង្កគ្រោះថ្នាក់ដល់អ្នកដទៃនិងខ្លួនឯង គេត្រូវបញ្ជូនគាត់ទៅកាន់មន្ទីរពេទ្យវិកលចរិកដើម្បីមើលថែជាបន្ទាន់៕

ប្រែសម្រួលដោយ៖ វារី

ចុចអាន៖ ៥ វិធី ដើរចេញពីស្នេហាតែម្ខាង ដែលយើងគិតថា មិនអាចទៅរួច

ចុចអាន៖ មកដឹងពីជំងឺប្លែកមួយ ធ្វើឲ្យមនុស្សគេងភ្លាមៗដូចសន្លប់