មហាសេដ្ឋីទី៦ លើពិភពលោក សុខចិត្តយកទ្រព្យសម្បត្តិបរិច្ចាគ មិនផ្ទេរមរតកឱ្យកូនដាច់ខាត

មហាសេដ្ឋី Warren Buffett ដែលជាបុគ្គលមានជាងគេលំដាប់ទី៦ លើពិភពលោក បានបរិច្ចាគប្រាក់ជិត ៨០០លានដុល្លារអាមេរិក សម្រាប់អង្គការសប្បុរសធម៌មួយ ដែលធ្វើការលើផ្នែកសុខភាពបន្តពូជ និងផែនការគ្រួសារនៅទូទាំងពិភពលោក។

កាលពីសប្ដាហ៍មុន មហាសេដ្ឋី Warren Buffett បានទាក់ទាញការចាប់អារម្មណ៍មនុស្សម្នាជាច្រើននៅជុំវិញពិភពលោក ក្រោយពេលលោកធ្វើការបរិច្ចាគភាគហ៊ុននៃក្រុមហ៊ុន Berkshire Hathaway Inc. ដល់មូលនិធិ Susan Thompson Buffett ដែលសរុបជាទឹកប្រាក់ចំនួន ៧៥៨លានដុល្លារអាមេរិក។

យោងតាមទស្សនាវដ្តី Forbes ទ្រព្យសម្បត្តិសុទ្ធរបស់មហាសេដ្ឋីវ័យ ៩២ឆ្នាំរូបនេះកំពុងក្ដោបក្ដាប់នៅក្នុងដៃនាឆ្នាំ២០២២ មានតម្លៃប៉ាន់ប្រមាណច្រើនជាង ១១០.៤ពាន់លានដុល្លារអាមេរិក ដែលធ្វើឱ្យលោកក្លាយជាមហាសេដ្ឋីលំដាប់ទី៦ នៅលើពិភពលោក។

ជាមួយនឹងទ្រព្យសម្បត្តិដ៏មហាសាល លោក Warren Buffett បែរជាសម្រេចចិត្តរក្សាទ្រព្យសម្បត្តិរបស់ខ្លួនទាំងអស់សម្រាប់សកម្មភាពមនុស្សធម៌ ដោយគ្មានបំណងផ្ទេរមរតកឱ្យកូនៗទាំង ៣ឡើយ។

ផ្អែកតាមបទសម្ភាសន៍ មហាសេដ្ឋី Warren Buffett ធ្លាប់និយាយថា ការជ្រើសរើសមិនទុកទ្រព្យសម្បត្តិដល់កូនៗ នឹងជួយឱ្យពួកគេអភិវឌ្ឍខ្លួនកាន់តែប្រសើរឡើង។ ប្រសិនបើទុកលុយឱ្យកូនចាយវាយដោយស្រួលៗពេក ពួកគេនឹងមិនចេះធ្វើអ្វីដើម្បីខ្លួនឯងនោះទេ ​ជាពិសេសមិនចេះខំប្រឹងរកស៊ីចិញ្ចឹមជីវិត។

ដូច្នេះហើយ​បានជាមហាសេដ្ឋីអាមេរិកាំងរូបនេះ សុខចិត្តយកទ្រព្យសម្បត្តិទៅបរិច្ចាគ ដើម្បីឱ្យកូនៗខំប្រឹងធ្វើការ។ ជាក់ស្ដែងកូនៗរបស់លោកសុទ្ធសឹងជោគជ័យលើមុខជំនួញ ដោយមិនពឹងផ្អែកឪពុកឡើយ ប៉ុន្តែម្នាក់ៗមានមូលនិធិសប្បុរសធម៌រៀងខ្លួន ដែលស្ថិតក្រោមការឧបត្ថម្ភពីលោក Warren Buffett ៕

ប្រែសម្រួល៖ សន្យា

ចុចអាន៖ តោះ! មកស្គាល់ពីកំពូលមហាសេដ្ឋីទាំង ១០ លើពិភពលោកទាំងអស់គ្នា

ចុចអាន៖ ព្រះនាងម្ចាស់ Sheikha Mahra ​ស្រ្ដីមានជាងគេនៅឌូបៃ តែទ្រព្យសម្បត្តិត្រូវគ្រប់គ្រងដោយព្រះបិតា