រ៉ូបដែលព្រះនាង Diana សព្វព្រះរាជហឫទ័យ ជិតដល់ថ្ងៃដេញថ្លៃហើយ

ក្នុងឆ្នាំ ១៩៩៧ មុនការសោយទិវង្គត ព្រះនាង Diana បានអង្គុយថតរូបដោយ Mario Testino សម្រាប់ទស្សនាវដ្ដី Vanity Fair ។ ក្នុងចំណោមសម្លៀកបំពាក់ជាច្រើនរបស់ទ្រង់មានរ៉ូបរាងផ្កាធូលីបមួយច្នៃឡើងដោយលោក Victor Edelstein ធ្វើពីសូត្រកាមេញីជាមួយនឹងឡេវមាស ៣គ្រាប់នៅពីក្រោយ ។

វា​ជា​រ៉ូប​ដ៏​លេចធ្លោមួយក្នុងចំណោមរ៉ូបជាច្រើន​របស់​ព្រះនាង ទ្រង់ធ្លាប់ស្លៀកវាដើម្បីថតរូបជាមួយព្រះអង្គម្ចាស់ Charles ក្នុងឆ្នាំ ១៩៩១ ដោយមានព្រះអង្គម្ចាស់ Snowdon ជាអ្នកថត ។ នៅឆ្នាំដដែលនោះ វិចិត្រករ Douglas Hardinge Anderson បានគូររូបព្រះនាងស្លៀករ៉ូបស្វាយខាងលើនេះម្ដងទៀតដើម្បីដាក់តាំងនៅមន្ទីរពេទ្យ Royal Marsden (ជាមន្ទីរពេទ្យដែលទទួលជំនួយពីព្រះនាង) ។ ក្រោយមក ក្នុងឆ្នាំ ១៩៩៨ ក្រុមហ៊ុនផលិតតុក្កតា Franklin Mint ក៏ធ្វើតុក្កតាព្រះនាង ​Diana ស្លៀករ៉ូបស្វាយនេះជាផលិតផលចំនួនមានកំណត់ទៀតផង ។

យ៉ាងណាមិញ រ៉ូបនេះត្រូវបានគេដាក់ដេញថ្លៃនៅថ្ងៃទី២៧ ខែមករា ខាងមុខនេះហើយ ។ នាយកផ្នែកសិល្បៈ និងវត្ថុសកលរបស់ Sotheby រំពឹងថានឹងអាចដេញថ្លៃបានរហូតដល់ ១២ម៉ឺនដុល្លារ ឯណោះ ទោះបីជាធ្លាប់មានអ្នកទិញម្ដងរួចមកហើយកាលពីឆ្នាំ ១៩៩៧៕ 

ប្រែសម្រួលដោយ ៖ វារី

ចុចអាន ៖ ជនអនាមិកដេញថ្លៃខ្ពស់បំផុតលើរថយន្ត Ford Escort ដែលព្រះនាង Diana សព្វព្រះរាជហឫទ័យជាងគេ

ចុចអាន ៖ មកទស្សនាបណ្ដុំសំលៀកបំពាក់ Meghan តែងប្រើប្រាស់ស្ទីលស្រដៀងព្រះនាង Diana ដែលជាមាតាក្មេក