KPT+

YouTube ដំណើរការយ៉ាងម៉េចដែរនៅប្រទេសចិន?

បានផុស

៣ years មុន

នៅ

ថ្ងៃព្រហស្បតិ៍ ២៩ តុលា ២០២០

ដោយ

ដោយមានអ្នកប្រើប្រាស់ជាង ១ ប៊ីលាននាក់មកពីជុំវិញពិភពលោក និងជាង ៧០ មូលដ្ឋាននៅក្រៅប្រទេស YouTube គឺជាវេបសាយចែកចាយវីដេអូឈានមុខគេលើពិភពលោក។

ប៉ុន្តែអកុសលតំាងពីឆ្នាំ ២០០៨ រដ្ឋាភិបាលចិនបានរារាំងមិនឱ្យ YouTube អាចភ្ជាប់ទៅកាន់អ្នកប្រើប្រាស់ជាច្រើននៅក្នុងប្រទេសចិននោះឡើយ។ ការផ្លាស់ប្តូរនេះ មានចេតនាបង្កើនលទ្ធភាពដល់ឆាណែលក្នុងស្រុកឱ្យបង្កើនការចែកចាយវីដេអូរបស់ចិន រួមមាន Qiiyi, PPTV, Sohu, LeTv, Tencent Video និង Youku Tudou Inc ដែលជាក្រុមហ៊ុនមួយ ឈរជាដៃគូប្រកួតប្រជែងដ៏សំខាន់មួយរបស់ YouTube។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Youkou Tudou ត្រូវបាន Alibaba ទិញក្នុងឆ្នាំ ២០១៥ ហើយរាយការណ៍ថា ខ្លួនមានអតិថិជនជាង ៣០ លាននាក់។ នៅខែសីហាឆ្នាំ ២០១៨ ក្រុមហ៊ុនបានរាយការណ៍ថាមានអ្នកប្រើប្រាស់ចំនួន ៥៨០ លាននាក់ និងមានអ្នកចូលមើលវីដេអូចំនួន ១១៨ ប៊ីលានដង។

គំរូអាជីវកម្មផ្សេងៗគ្នារវាង YouTube និង Youku Tudou គឺ Youtube ស្វែងរកមាតិកា ដែលបង្កើតដោយអ្នកប្រើ និងត្រូវបានទិញមកដំណើរការដោយអង្គភាពប្រតិបត្តិការធំរបស់ក្រុមហ៊ុន Google។ នៅឆ្នាំ ២០១៤ YouTube រកបានចំណូលប្រចាំឆ្នាំ ៤ ប៊ីលានដុល្លារ។ ក្នុងឆ្នាំ ២០១២ គូប្រជែងចែកចាយវីដេអូរបស់ចិន Youku និង Tudou បានរួមបញ្ចូលគ្នានូវសេវាកម្មរបស់ពួកគេ ដើម្បីបង្កើតគេហទំព័រវីដេអូធំជាងគេនៅក្នុងប្រទេសចិនគឺ Youku Tudou។ ទោះបីជាមានការច្របាច់បញ្ចូលគ្នាក៏ដោយ ក៏ក្រុមហ៊ុនថ្មីនេះបានបន្តយុទ្ធសាស្រ្តរបស់ខ្លួនក្នុងការផ្តល់សិទ្ធិមាតិកាផ្តាច់មុខ ដើម្បីទាក់ទាញអ្នកទស្សនាកាន់តែច្រើន។

ត្រឹមឆមាសទី១នៃឆ្នាំ ២០១៥ Youku Tudou ទទួលបានប្រាក់ចំណូល ២,៧៥ ប៊ីលានយ័នចិន ស្មើនឹង ៤៥១ លានដុល្លារ។ ទោះយ៉ាងណា Youku Tudou បានបរាជ័យក្នុងការបង្កើតប្រាក់ចំណេញសម្រាប់វិនិយោគិន មុនពេលយល់ព្រមទិញដោយក្រុមហ៊ុនវិនិយោគចិន Ali YK Investment Holding Ltd ដែលជាក្រុមហ៊ុនបុត្រសម្ព័ន្ធទាំងស្រុងរបស់ក្រុមហ៊ុនយក្ស Alibaba Group (NYSE: BABA) ។

លើការស្វែងរកផលចំណេញនៅឆ្នាំ ២០១៤ អង្គភាពវីដេអូរបស់ Google បានប្រកាសពីការកើនឡើង ១ ប៊ីលានដុល្លារពីប្រាក់ចំណូលប្រចាំឆ្នាំ ២០១៣ របស់ខ្លួន។ ប្រាក់ចំណូលរបស់ YouTube រកបានប្រហែល ៦% នៃការលក់សរុបរបស់ Google ។

រីឯ Youku Tudou ព្យាយាមស្វែងរកខ្លឹមសារវីដេអូដែលមានគុណភាពខ្ពស់ សម្រាប់ការផ្តល់អាជ្ញាប័ណ្ណ ប៉ុន្តែវាថ្លៃខ្លាំងសម្រាប់ Youku Tudou ព្រោះត្រូវចំណាយថ្លៃអាជ្ញាប័ណ្ណរហូតដល់ ៨០ លានដុល្លារសម្រាប់ត្រីមាសទី ១ ឆ្នាំ ២០១៥ ។ នៅក្នុងឆមាសទី១នៃឆ្នាំ២០១៥ ក្រុមហ៊ុនបានប្រកាសពីការខាតបង់ប្រាក់សុទ្ធចំនួន ៨៥៩.៥ លានយ័ន(១៤០,៩៦ លានដុល្លារ) ។ ក្រុមហ៊ុនបានរាយកាណ៍ថា ក្នុងឆ្នាំ ២០១៣ ខ្លួនចំណាយច្រើនជាង ១ ប៊ីលានយ័ន (១៦៤ លានដុល្លារ) ជារៀងរាល់ឆ្នាំក្នុងថ្លៃអាជ្ញាប័ណ្ណ។

អនាគតរបស់ YouTube ផ្តោតលើការបង្កើតមាតិកាដែលមានគុណភាព។ ដើម្បីទទួលបានផលចំណេញទាំង YouTube និង Youku Tudou បានកំណត់ការបង្កើតមាតិកាដើមជាផែនការអាទិភាព។

YouTube ឥឡូវនេះកំពុងស្វះស្វែងរកវិធីឱ្យខ្លួនឯងក្លាយជាជម្រើសមួយសម្រាប់ទូរទស្សន៍ ដោយបង្កើតបណ្តាញនៃការកម្សាន្តដែលមានគុណភាពខ្ពស់ហើយអនុញ្ញាត្តិឱ្យប្រើប្រាស់ចូលរួមផលិតដែរ។ ដើម្បីឧបត្ថម្ភដល់ថ្លៃដើមនៃការផលិត YouTube មានគំនិតរៃប្រាក់អ្នកប្រើប្រាស់ក្នុងតម្លៃ ៩.៩៩ ដុល្លារក្នុង១ខែ តែគេគ្រោងសងប្រាក់កម្រៃដល់អ្នកបង្កើតមាតិកាមកឱ្យខ្លួនវិញដូចគ្នា ប្រសិនបើ Youtube អ្នកណាម្នាក់មានអតិថិជនចាប់ពី១ម៉ឺន នាក់ឡើង។

ចំណែក Youku Tudou វិញ កាលពីខែសីហាឆ្នាំ ២០១៥ Youku Tudou បានប្រកាសនូវទឹកប្រាក់ ១០ ប៊ីលានយ័ន (ប្រហែល ១,៦ ពាន់លានដុល្លារ) ដើម្បីផលិតវីដេអូដែលមានគុណភាពខ្ពស់ និងជាការបង្កើតដោយអ្នកប្រើប្រាស់។ ក្រោមផែនកាណ៍រយៈពេល ៣ ឆ្នាំក្រុមហ៊ុនចិន ស្វែងរកការចិញ្ចឹមបីបាច់ឆានែលវីដេអូ ១០០,០០០ ដោយអ្នកប្រើប្រាស់ដែលមានអតិថិជនជាង ១០០០ នាក់។

Youku Tudou បានកំណត់គោលដៅក្នុងការអភិវឌ្ឍបណ្តាញប្រមាណ ១០,០០០ ប៉ុស្តិ៍ដែលមានប្រាក់ចំណូលពីការផ្សាយពាណិជ្ជកម្មក្នុងមួយខែជាង ១០,០០០យ័ន ហើយប៉ុស្តិ៍ចំនួន ១០០ ដែលទទួលបានការគាំទ្រខ្ពស់ជាង ១០០ លានយ័ន។ នេះគឺជាគោលដៅដ៏ធំ ពីព្រោះនៅឆ្នាំ ២០១៥ ក្រុមហ៊ុនមានតែប៉ុស្តិ៍ចំនួន ១០ ដែលមានតម្លៃជាង ១០០ លានយ័នប៉ុណ្ណោះ។

កាលពីខែវិច្ឆិកាឆ្នាំ ២០១៥ ក្រុមហ៊ុន Alibaba Group Holding Ltd. បានកាន់កាប់ Youku Tudou ក្នុងតម្លៃសរុប ៤,៨ ប៊ីលានដុល្លារ។ Alibaba គាំទ្រការជម្រុញរបស់ Youku Tudou សម្រាប់មាតិកាដែលមានគុណភាពខ្ពស់ជាងមុន ពីព្រោះAlibaba មើលឃើញឆានែលនេះ ថាជាឱកាសមួយដើម្បីបង្កើនការលក់តាមប្រព័ន្ធអេឡិចត្រូនិច៕

ប្រែសម្រួល៖ សន្យា

ចុចអាន៖ លេង FACEBOOK យ៉ាងណាកុំឲ្យសុខភាពផ្លូវចិត្តយុវវ័យរងការប៉ះពាល់?