ស្វា Coco ចាស់ជាងគេបំផុតនៅអឺរ៉ុប ឈានដល់វ័យ ៥៨ ឆ្នាំហើយ

បុគ្គលិកសួនសត្វបានអបអរសាទរពិធីខួបកំណើតស្វា Chimpanzee ចាស់ជាងគេបំផុតនៅអឺរ៉ុបដែលវាឈានដល់អាយុ ៥៨ ឆ្នាំនៅថ្ងៃទី០២ ខែមេសា ឆ្នាំ២០២៣ ។ Coco គឺជាស្វាមួយក្នុងចំណោមស្វា ១៤ ក្បាលរស់នៅសួនសត្វ Twycross ក្នុង Leicestershire ហើយនាងបានមកដល់ទីនោះតាំងពីឆ្នាំ ១៩៦៩ មកម្ល៉េះ ។

អ្នកមើលថែនាងបានប្រាប់ថា Coco ធ្លាប់បង្កើតកូន ៦ ក្បាល វាជាស្វាដែលបុគ្គលិកនិងភ្ញៀវស្រលាញ់ជាងគេ ជាពិសេស Coco ទទួលបានចំណីឆ្ងាញ់ៗជាច្រើនក្នុងឱកាសខួបកំណើតរបស់វាថែមទៀតផង ។

Amanda Addison អ្នកគ្រប់គ្រងក្រុមស្វានៅសួនសត្វបាននិយាយថា “គ្រប់គ្នាសុទ្ធសឹងតែស្រលាញ់ Coco និងមានមោទនភាពចំពោះអ្វីដែលនាងធ្លាប់ធ្វើដើម្បីអំបូររបស់នាងកន្លងមក ជាពិសេស Coco មានកូន ៦ ក្បាល ចៅ ១៩ ក្បាល និងចៅទួត ៣ ក្បាលឯណោះ” ។ 

គួរបញ្ជាក់ដែរថាស្វា Chimpanzee កំពុងបាត់បង់ចំនួនក្នុងព្រៃដែលជាកន្លែងធ្វើឲ្យវាមានអាយុវែងដល់ ៦០ ឆ្នាំ ហើយភាគច្រើនត្រូវមនុស្សយកមកដាក់សួនសត្វដើម្បីមើលថែជំនួសវិញ ៕

ប្រែសម្រួល ៖ វារី

ចុចអាន ៖ សត្វ ៥ ប្រភេទ មានជីវិតរស់នៅយូរជាងគេបំផុត លើពិភពលោក