មកដឹងអំពីអ្វីទៅជា ផលិតផលក្នុងស្រុកសរុប (GDP)?

ផលិតផលក្នុងស្រុកសរុប ឬ ហៅកាត់ថា GDP per capital គឺជារូបិយវត្ថុ ឬ តម្លៃទីផ្សារសរុបនៃទំនិញ និងសេវាកម្មទាំងអស់ដែលផលិតនៅក្នុងប្រទេសមួយកំឡុងពេលជាក់លាក់ណាមួយ។ នេះបើតាម Finance Strategists។

GDP មកពីពាក្យពេញថា Gross Domestic Product។ GDP ជាធម្មតាត្រូវបានគណនាជារៀងរាល់ឆ្នាំ ប៉ុន្តែ វាក៏អាចត្រូវបានគណនាក្នុងមួយត្រីមាសផងដែរ។ ផលិតផលក្នុងស្រុកសរុប ត្រូវបានគេគិតបញ្ចូលទាំងការប្រើប្រាស់ឯកជន សាធារណៈ ការចំណាយរបស់រាជរដ្ឋាភិបាល ការវិនិយោគ ការចំណាយលើការសាងសង់ផ្សេងៗ។

GDP ត្រូវបានប្រើដោយអ្នកសេដ្ឋកិច្ច ដើម្បីកំណត់ពីស្ថានភាពរបស់សេដ្ឋកិច្ច។ នៅពេលដែលប្រទេសមួយលក់ផលិតផលក្នុងស្រុកច្រើនជាងឱ្យបរទេសទិញ គឺផលិតផលក្នុងស្រុកសរុបកើនឡើង។ ប៉ុន្តែ ពេលដែលប្រទេសនោះទិញផលិតផលពីបរទេសច្រើនជាងលក់ ដែលហៅថាឱនភាពពាណិជ្ជកម្ម គឺ GDP មានការថយចុះ។

GDP មានបួនប្រភេទផ្សេងគ្នា ហើយវាជាការសំខាន់ណាស់ដែលត្រូវដឹងពីភាពខុសគ្នារវាង GDP ព្រោះ GDP នីមួយៗបង្ហាញពីទស្សនវិស័យសេដ្ឋកិច្ចខុសៗគ្នា។

១​.Real GDP៖ គឺជាការគណនា GDP ដែលត្រូវបានកែតម្រូវសម្រាប់អតិផរណា។ តម្លៃទំនិញ និងសេវាកម្មត្រូវបានគណនាក្នុងកម្រិតតម្លៃថេរ ដែលជាធម្មតាត្រូវបានកំណត់ដោយឆ្នាំមូលដ្ឋានដែលបានកំណត់ទុកជាមុន ឬដោយប្រើកម្រិតតម្លៃនៃឆ្នាំមុន។ Real GDP ត្រូវបានចាត់ទុកថាជាការបង្ហាញដ៏ត្រឹមត្រូវបំផុតនៃសេដ្ឋកិច្ចរបស់ប្រទេសមួយ និងអត្រាកំណើនសេដ្ឋកិច្ច។

២.Nominal GDP៖ ផលិតផលក្នុងស្រុកសរុបត្រូវបានគណនាជាមួយនឹងអតិផរណា។ តម្លៃទំនិញ និងសេវាកម្មត្រូវបានគណនាតាមកម្រិតតម្លៃបច្ចុប្បន្ន។

៣.Actual GDP៖ គឺជាការវាស់វែងសេដ្ឋកិច្ចរបស់ប្រទេសមួយក្នុងពេលបច្ចុប្បន្ន។

៤.Potential GDP៖ គឺជាការគណនានៃសេដ្ឋកិច្ចរបស់ប្រទេសមួយក្រោមលក្ខខណ្ឌដ៏ល្អ ដូចជារូបិយប័ណ្ណស្ថិរភាព អតិផរណាទាប និងការងារពេញលេញ។

ផលិតផលក្នុងស្រុកសរុប ឬ ហៅថា GDP គឺត្រូវបានប្រើតាំងពីយូរលង់ណាស់មកហើយ។ ក្នុងពេលបច្ចុប្បន្ននេះ នៅលើពិភពលោក គេយក GPD មកវាស់ពីទំហំផលិតផល ដើម្បីឱ្យដឹងអំពីសេដ្ឋកិច្ច ទាំងការកើនឡើង និងធ្លាក់ចុះនៅក្នុងប្រទេសនីមួយៗ៕