សារៈសំខាន់​នៃ​ការ​កសាង​បណ្ដាញ​ក្នុង​សង្គម social network ?

បណ្ដាញ សំដៅ​ទៅលើការបង្កើតទំនាក់ទំនងក្នុងពិភពអាជីព ភ្ជាប់ជាមួយមនុស្ស​ទូទៅ ក្នុង​រូបភាព​ស្គាល់​គ្នា ឬ​មាន​ទំនាក់ទំនងជួយ​គ្នា​លើគម្រោងការងារ ព្រឹត្តិការណ៍នានា ។ល។ រីឯ​ផល​ប្រយោជន៍​នៃ​ការ​កសាង​បណ្ដាញ​ឬចូលរួមជាមួយបណ្តាញសង្គមSocial Network មាន​ជា​អាថ៌៖

១. ងាយស្រួល​ក្នុង​ការ​ធ្វើដំណើរ

គ្មាននរណានៅទ្រឹងមួយកន្លែង គ្រប់គ្នាត្រូវការធ្វើដំណើរមិនថាជិតឆ្ងាយ។

ខណៈត្រូវធ្វើដំណើរពីកន្លែងមួយទៅកន្លែងមួយ ការដែលមានមនុស្សស្គាល់ អ្នកអាចពឹងពាក់គេឲ្យជួយរកកន្លែងស្នាក់នៅ មានមនុស្សជួយធ្វើមគ្គុទេ្ទសក៍ទីតាំងកម្សាន្ត និងណែនាំអាហារដ្ឋានហូបចុកងាយស្រួលថែមទៀត។ មិនងាយទេ នៅពេលចង់ទៅទីណាមួយ ហើយមានអ្នកចាំជួយទុក្ខធុរៈមុខក្រោយ ព្រោះថាបើគ្មានការតម្រង់ទិសពីម្ចាស់ស្រុក អ្នកអាចចាញ់បោកជនខិលខូច និងខាតពេលវេលាទៀតផង។

២. ជំនួយការសិក្សាកាន់តែប្រសើរ

នៅក្នុងប្រព័ន្ធការសិក្សា សិស្ស-និស្សិតមិនអាចផ្ដាច់ខ្លួនពីការភ្ជាប់ទំនាក់ទំនងជាមួយមិត្តដទៃ ឬគ្រូៗបានឡើយ។ គ្រប់គ្នាត្រូវមានទំនាក់ទំនងជិតស្និទ្ធជាមួយអ្នកផ្សេង ពុំនោះការសិក្សាមិនអាចដើរទៅមុខដោយរលូន។ ហេតុអ្វី? ព្រោះថា ការនៅតែឯងៗ អ្នកនឹងមិនទទួលបានអ្វីទាំងអស់រួមទាំងការ ផ្ដល់យោបល់នានា ការធ្វើការក្រុម ឬកិច្ចការស្រាវជ្រាវជាដើម។

៣. បង្កើតឱកាសការងារនាពេលអនាគត

បណ្តាញការងារពិតជាសំខាន់មិនអាចខ្វះឡើយ។ មិនថាទៅថ្ងៃមុខនិងបច្ចុប្បន្ន ក្នុងវិស័យការងារឬអាជីវកម្មក្ដី  សុទ្ធតែត្រូវការបណ្ដាញទំនាក់ល្អជាមួយមនុស្សខាងក្រៅ ព្រោះពួកគេអាចផ្ដល់ព័ត៌មានការងារ អាចជាអតិថិជន ដៃគូសហការ និងជាកម្លាំងជម្រុញអាជីពរបស់អ្នកកាន់តែជោគជ័យមួយកម្រិត។

៤. មានអ្នកក្រុមគាំទ្រក្នុងសង្គម

ស្គាល់មនុស្សច្រើន មិនដែលខាតបង់ទេ! ទោះបីគ្រប់គ្នាមិនសុទ្ធតែស្រឡាញ់អ្នក យ៉ាងហោចក៏អ្នកមានមិត្តច្រើនជាងសត្រូវដែរ។ មនុស្សយើងមិនអាចកាត់ផ្ដាច់ពីសង្គមមនុស្សបាន ដោយសារយើងត្រូវការជួយបំពេញចន្លោះខ្វះខាតឲ្យគ្នា គាំទ្រគ្នា និងកែលម្អគ្នាដើម្បីរីកចម្រើនជាមួយគ្នា។ ធ្វើអ្វីក៏ដោយ រមែងត្រូវការកម្លាំងចិត្ត ហេតុនេះមនុស្សដែលយើងភ្ជាប់ជាមួយអាចជាកម្លាំងចិត្តមួយជួយយើងត្រង់ផ្នែកណាមួយដែលយើងមិនមាន៕

ប្រែសម្រួល៖ សន្យា

ប្រភព៖ EF

ចុចអាន៖ហេតុអ្វី​លោក James Quincey អាច​ក្ដាប់​តំណែង CEO ក្រុមហ៊ុន​ភេសជ្ជៈ​ធំជាងគេ​លើ​លោក​បាន​?

ចុចអាន៖ហេតុផល​ធំៗ​ដែល​មិន​គួរ​ដាក់​ម៉ោង​រោទ៍​តាម​ទូរសព្ទ​ដៃ