ព័ត៌មានជាតិ

ឈ្លូសមានលក្ខណៈពិសេសម្យ៉ាង អាចបន្លឺសំឡេងតបតគ្នាដល់ ១ ម៉ោង ពេលមានអាសន្ន

បានផុស

១ year មុន

នៅ

ថ្ងៃពុធ ៥ កក្កដា ២០២៣

ដោយ

មនុស្សជាច្រើនធ្លាប់បានឮដឹងនិងស្គាល់អំពីសត្វឈ្លូស តែពេលខ្លះក៏មិនអាចដឹងពីព័ត៌មានឬលក្ខណៈពិសេសរបស់វាដែរ។ ដឹងទេថា ឈ្លូស (Red muntjac) ស្ថិតក្នុងក្រុមប្រភេទសត្វមានដោយបង្គួរនៅលើពិភពលោក ហើយពួកវាមានលក្ខណៈពិសេសម្យ៉ាងដោយអាចបន្លឺសំឡេងឡើងតបតគ្នាដល់ទៅ ១ ម៉ោង ពេលជួបគ្រោះអាសន្ន។ មិនតែប៉ុណ្ណោះ សំឡេងរបស់ពួកវាអាចឮរហូតដល់ ១ គីឡូម៉ែត្រ។ នេះបើតាមលោកបណ្ឌិត សាម អ៉ីន រដ្ឋលេខាធិការក្រសួងបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សត្វប្រភេទនេះកំពុងប្រឈមនិងរងគ្រោះថ្នាក់ ដោយសារតែការបរបាញ់ ការបណ្ដើរឆ្កែទាក់ចាប់ ការដាក់អន្ទាក់ដើម្បីយកសាច់ធ្វើជាអាហារ និងគ្រោះថ្នាក់ដោយសារតែពពួកសត្វស៊ីសាច់ជាអាហារ។ ទៀតសោត សត្វឈ្លូសវាមាននៅប្រទេសឥណ្ឌា រហូតដល់ប្រទេសចិនភាគខាងត្បូង តំបន់អាស៊ីអាគ្នេយ៍ រួមនឹងកម្ពុជា ព្រមទាំងកោះស៊ូម៉ាត្រា កោះចាវា និងកោះបាលីជាដើម។

លោកបណ្ឌិត សាម អ៉ីន បានបញ្ជាក់ថា តាមរយៈការសិក្សា សត្វឈ្លូសអាចរស់នៅគ្រប់ប្រភេទព្រៃ។ ក្នុងប្រទេសកម្ពុជា សត្វឈ្លូសសម្បូរស្ទើរគ្រប់ទីកន្លែង តែមិនមានអាចប៉ាន់ស្មានដឹងចំនួនពិតប្រាកដឡើយ។

គួរបញ្ជាក់ថា សត្វឈ្លូសតែងស៊ីមែកឈើតូចៗ ពិសេសស្លឹករុក្ខជាតិ ផ្លែឈើដែលធ្លាក់ និងដំណុះកូនឈើជាដើម។ រដូវបន្តពូជប្រព្រឹត្តទៅនៅខែធ្នូ រហូតដល់ខែមករា និងផ្តល់កំណើតកូនមួយក្បាល ជួនកាលភ្លោះ ប៉ុន្តែកម្រមានណាស់។ ហើយសត្វឈ្លូសត្រូវបានចុះក្នុងបញ្ជីក្រហមរបស់អង្គការ IUCN៕