ហេតុផល​ខ្លះ​ដែល​ច្រាន​យើង​ចេញ​ពី​ជណ្ដើរ​ជោគជ័យ​តាំង​ពី​ទើប​ចាប់ផ្ដើមដំបូងៗ

នៅពេលនៅពេលចាប់ផ្ដើមដំបូងៗ ​មនុស្សជួបការបរាជ័យជារឿយៗ វាមិនចម្លែកអ្វីទេ។ មូលហេតុ​នេះ អាចមកពីពួកគេបានបញ្ឈប់ការខំប្រឹង ទើប​មិន​អាច​សម្រេច​ក្តី​សុបិន​របស់​ខ្លួនបាន។

ទាំងនេះជាហេតុផលទូទៅខ្លះៗដែលធ្វើឱ្យមនុស្សបរាជ័យ៖

គិត​អវិជ្ជមាន៖ គំនិត​អវិជ្ជមាន​ជាហេតុផលមួយក្នុងចំណោម​ហេតុផល​ចម្បង​ដែល​នាំ​មនុស្ស​ភាគច្រើន​ឲ្យ​បរាជ័យ​ទាំង​មិន​ទាន់​ចាប់ផ្ដើម។ មនុស្ស​ទុទ្ទិដ្ឋិនិយម​ច្រើន​តែ​មាន​ផលិតភាព​ការងារ​ទាប ហើយថែមទាំងបង្កើត​ឲ្យ​មាន​បរិយាកាស​អវិជ្ជមាន​សម្រាប់​មនុស្ស​គ្រប់គ្នា​ដែល​នៅ​ជុំវិញ​ខ្លួន និងជាហេតុធ្វើឲ្យខ្លួនឯងរកមិនឃើញពន្លឺជីវិត។

មិនដឹងពីភាពខ្លាំងនិងភាពខ្សោយរបស់ខ្លួន៖ មនុស្សម្នាក់ៗសុទ្ធតែមានភាពខុសគ្នានិងប្លែកពីគេ ហើយមានសារៈសំខាន់ណាស់សម្រាប់មនុស្សគ្រប់គ្នាត្រូវដឹងពីអ្វីដែលជាសមត្ថភាពខ្លាំងខ្លួនឯង ព្រោះវាអាចកំណត់ពីអំណាចរបស់ខ្លួន។ ចំណែកឯការដឹងពីភាពខ្សោយ អាចធ្វើឲ្យពួកគេរកឃើញចំណុចខ្វះខាតដើម្បីកែលម្អឲ្យពូកែបាន។ ប៉ុន្តែមនុស្សមួយចំនួនមិនរកឃើញចំណុចទាំងពីរនេះឡើយ។

គោលដៅមិនច្បាស់លាស់៖ ភាពមិនប្រាកដប្រជានៃគោលដៅរារាំងមនុស្សមិនឲ្យទទួលបានជោគជ័យ។ មនុស្សភាគច្រើនកំណត់គោលដៅ នៅតែលើក្រដាសប៉ុណ្ណោះ ប៉ុន្តែមិនដែលអនុវត្តទាល់តែសោះ នោះក៏ជាបរាជ័យមួយដែរ។ ការសម្រេចគោលដៅមួយត្រូវការការខិតខំប្រឹងប្រែង ការប្តេជ្ញាចិត្ត និងឆន្ទៈខ្ពស់ណាស់ ហើយបើនៅតែធ្វើអ្វីបែបលេងៗ មិនមានភាពមិនច្បាស់លាស់ តើសម្រេចលទ្ធផលល្អយ៉ាងមែចនឹងកើតទៅ?

របៀបរស់នៅរញ៉េរញ៉ៃ៖ ការរៀបចំរបៀបរស់នៅនៃជីវិត ពិតជាមានសារៈសំខាន់ ដើម្បីឈានដល់ការរៀបរយឬជោគជ័យ។ មនុស្សខ្វះសមត្ថភាពក្នុងការរៀបចំសណ្តាប់ធ្នាប់នៅក្នុងជីវិត អាចជាមូលហេតុមួយនៃការបរាជ័យ ព្រោះមិនដឹងចាប់ពីណាទៅណា ធ្វើឲ្យបែកខ្ញែកគំនិត និងមិនអាចធ្វើតាមផែនការដែលគ្រោងទុក។

ឆាប់បោះបង់ចោល៖  ជាធម្មតាមនុស្សបោះបង់ចោលគោលដៅ ព្រោះគិតថា វាជាមធ្យោបាយងាយស្រួលជាងមុន។ ពួកគេបោះបង់ចោលគោលដៅរបស់ខ្លួនពីការភ័យខ្លាចនៃការបរាជ័យ តែទីបំផុតពួកគេបរាជ័យដដែល។ អាថ៌កំបាំងនៅពីក្រោយភាពជោគជ័យរបស់មនុស្សជាច្រើនគឺពួកគេមិនដែលបោះបង់ចោលឡើយ។ ពួកគេបរាជ័យច្រើនដងយ៉ាងណា ក៏ពួកគេក្រោកមកហើយបន្តការតស៊ូជានិច្ច។

មិនសូវខំប្រឹង៖ ផ្លូវទៅកាន់ភាពជោគជ័យមិនដែលជាផ្លូវងាយស្រួលទេ។ គោលដៅដែលទទួលបានផ្លែផ្កាច្រើន ក៏ជាការប្រកួតប្រជែងបំផុតនិងត្រូវការការខិតខំច្រើនបំផុត។ គ្មាននរណាអាចរំពឹងថា នឹងទទួលបានជោគជ័យត្រឹមតែមួយយប់ដោយគ្មានការខិតខំឡើយ។ ការសម្រេចគោលដៅនីមួយៗអាចចំណាយពេលច្រើនខែនិងច្រើនឆ្នាំ។ ពួកគេត្រូវខិតខំធ្វើការទាំងយប់ទាំងថ្ងៃដោយការអត់ធ្មត់ និងអនុវត្តវាម្ដងហើយម្ដងទៀត។

​ខ្វះ​ទំនុក​ចិត្ត៖ ខ្វះភាពជឿជាក់លើខ្លួនឯង មិនហ៊ានធ្វើនេះ មិនហ៊ានធ្វើនោះ ក្នុងអារម្មណ៍ខ្លាចតែចាញ់ ខ្លាចអ្វីៗមិនកើតការ។ អ្នកគ្មានទំនុកចិត្ត ការងារទំនាក់ទំនងជាមួយមនុស្សចេះតែមិនសមប្រកប។ មនុស្សមានទំនុកចិត្តលើខ្លួនឯងទទួលបានប្រយោជន៍ច្រើនយ៉ាង ពួកគេមិនខ្លាចបរាជ័យ ហើយតែងតែត្រៀមខ្លួនដើម្បីឈរលើអ្វីដែលពួកគេជឿជាក់៕

ប្រែសម្រួល៖ សន្យា

ប្រភព៖ BORNREALIST

ចុចអាន៖វត្ថុ ៨ យ៉ាង​ទោះ​មាន​លុយ​វាល់លានក៏​មិន​អាច​ទិញ​បាន​ដែរ

ចុចអាន៖ហេតុអ្វី​លោក James Quincey អាច​ក្ដាប់​តំណែង CEO ក្រុមហ៊ុន​ភេសជ្ជៈ​ធំជាងគេ​លើ​លោក​បាន​?