អង្គការមួយ ផ្តល់អាហារូបករណ៍សិស្ស ៤០នាក់ បន្តសិក្សាថ្នាក់ឧត្តម នៅភ្នំពេញ

អង្គការសម្រេចសុបិនកុមារកម្ពុជា ប្រកាសផ្តល់អាហារូបករណ៍ដល់សិស្ស ៤០នាក់ ដែលប្រឡងបាក់ឌុប ឆ្នាំ២០២០ ដល់២០២២ មានបំណងបន្តការសិក្សាថ្នាក់ឧត្តមសិក្សានៅភ្នំពេញ ឆ្នាំសិក្សា២០២៣-២០២៤ ប៉ុន្តែមិនមានលទ្ធភាពគ្រប់គ្រាន់សម្រាប់សិក្សា។

អាហារូបករណ៍នេះ មានការផ្តល់ជូនដូចជា ការចេញបង់ថ្លៃសិក្សានៅសាកលវិទ្យាល័យ ការស្នាក់នៅ ការចាយវាយ និងការចំណាយផ្សេងៗ។ ក្នុងនោះក៏មានបន្ថែមនូវការធានារ៉ាប់រង និងវគ្គបណ្តុះបណ្តាលផ្សេងៗដល់សិស្សនិស្សិតថែមទៀត។

អាហារូបករណ៍នេះ មានសារៈសំខាន់បំផុតសម្រាប់សិស្សនិស្សិតដែលមានជីវភាពខ្វះខាត និងមានបំណងចង់បន្តការសិក្សាថ្នាក់ឧត្តមសិក្សា នៅតាមសាកលវិទ្យាល័យ ឬ វិទ្យាស្ថាននានាដែលខ្លួនពេញចិត្ត។

ដូច្នេះ ដើម្បីឱ្យយល់កាន់តែច្បាស់ពីរបៀបដាក់ពាក្យដើម្បីទទួលបានអាហារូបករណ៍មួយនេះ អ្នកសិក្សាអាចចុះឈ្មោះចូលរួមសិក្ខាសាលា ស្តីពី ការផ្តល់ជូនអាហារូបករណ៍នេះ តាមរយៈអនឡាញបាន។ សិក្ខាសាលាដែលណែនាំពីអាហារូបករណ៍ និងការដាក់ពាក្យ ធ្វើឡើងនៅ ថ្ងៃទី១០ ខែសីហានេះ ចាប់ពីម៉ោង៧ ដល់ម៉ោង ៨:៣០នាទីយប់ តាមរយៈអនឡាញ (Google Meet)។ អ្នកចូលរួបងាចចុះឈ្មោះតាមរយៈ (https://forms.gle/pLGKsvHH6Sc68hHh9) ៕