ទ្រព្យសម្បត្តិអ្នកមានបំផុតរបស់វៀតណាមកើន ៣៩ ពាន់លានដុល្លារបន្ថែមទៀត

ការកើនឡើងនៃតម្លៃភាគហ៊ុន VinFast កាលពីថ្ងៃអង្គារបានបន្ថែម ៣៩ ពាន់លានដុល្លារពីលើទ្រព្យសម្បត្តិដើមរបស់ លោក Pham Nhat Vuong ។

ការពិតទៅលោក Vuong ជាបុរសមានបំផុតក្នុងប្រទេសវៀតណាមអស់រយៈពេលជាច្រើនឆ្នាំមកហើយ ។ ពេលនេះទ្រព្យសម្បត្តិរបស់លោក Vuong មានដល់ទៅ ៤៤.៣ ពាន់លានដុល្លារ បើតាមបញ្ជីរបស់ Bloomberg ។

ក្រុមហ៊ុនរថយន្ត VinFast បានបង្ហាញខ្លួនជាលើកដំបូងលើផ្សារហ៊ុន Nasdaq នៅសហរដ្ឋអាមេរិកកាលពីថ្ងៃអង្គារក្នុងតម្លៃ ២២ ដុល្លារ ហើយបានបិទនៅតម្លៃជាង ៣៧ ដុល្លារ ដែលមានតម្លៃក្រុមហ៊ុនចំនួន ៨៥ ពាន់លានដុល្លារ ។

លោក Vuong គឺជាម្ចាស់ភាគហ៊ុន ៩៩ ភាគរយ នៃភាគហ៊ុន ២.៣ ពាន់លានរបស់ VinFast បន្ទាប់ពីត្រូវបានបញ្ចូលគ្នាជាមួយក្រុមហ៊ុន Black Spade Acquisition ។

VinFast ដែលជាក្រុមហ៊ុនបុត្តសម្ព័ន្ធនៃក្រុមហ៊ុន Vingroup បានទទួលការយល់ព្រមក្នុងការសាងសង់រោងចក្រផលិតរថយន្តតម្លៃ ៤ ពាន់លានដុល្លារនៅរដ្ឋ North Carolina ក្នុងសហរដ្ឋអាមេរិក វាបានដឹកជញ្ជូនរថយន្តអគ្គិសនីជិត ៣ ០០០ គ្រឿងទៅអាមេរិក ដោយរំពឹងថានឹងក្លាយជាទីផ្សារដ៏សំខាន់មួយរបស់ខ្លួន ៕

ប្រែសម្រួល៖ វារី

ប្រភព៖ vnexpress

ចុចអាន៖ ឆ្នាំ២០២៣ វៀតណាម នៅសល់មហាសេដ្ឋីត្រឹម ៦នាក់