សត្វកវែងអត់ក្រឡាដ៏កម្រ ទើបនឹងកើតនៅអាមេរិក

សត្វកវែងអាយុ ៣ សប្ដាហ៍មួយក្បាលនៅរដ្ឋ Tennessee ភាគខាងត្បូងនៃសហរដ្ឋអាមេរិក កំពុងទាក់ទាញចំណាប់អារម្មណ៍ពីអ៊ីនធឺណិតដោយសារស្បែកគ្មានក្រឡារបស់វា ។

លោក David Bright ប្រធានសួនសត្វបានឲ្យដឹងថា សត្វកវែងដ៏កម្រខាងលើកើតនៅថ្ងៃទី ៣១ ខែកក្កដា ឥលូវនេះវាមានកម្ពស់ ១.៨ ម៉ែត្រហើយ ។ វាជាសត្វញីដែលមានសុខភាពរឹងមាំ ប៉ុន្តែគ្មានក្រឡាដូចសត្វទូទៅទេ ។

គួរឲ្យដឹងថា នេះជាសត្វកវែងដំបូងបំផុតដែលគ្មានក្រឡា បើគិតពីឆ្នាំ ១៩៧២ នៅប្រទេសជប៉ុនមក ។ កត្តានេះធ្វើឲ្យសត្វកវែងពិបាករស់នៅក្នុងព្រៃតាមធម្មជាតិណាស់ ព្រោះវាមិនអាចបន្លំខ្លួនបានដូចគេ ។

Bright បាននិយាយនៅក្នុងសេចក្តីថ្លែងការណ៍មួយថា “សត្វកវែងតូចកំពុងលូតលាស់ក្រោមការមើលថែរបស់ម្តាយ និងបុគ្គលិកសួនសត្វ” ដូច្នេះគាត់សង្ឃឹមថា ការផ្សព្វផ្សាយតាមបណ្ដាញសង្គមជួយឲ្យមនុស្សយល់ដឹងបន្ថែមអំពីការគំរាមកំហែងដែលប៉ះពាល់ដល់ចំនួនសត្វកវែងលើពិភពលោក ។

ពាក់ព័ន្ធនឹងបញ្ហានេះដែរ លោក Tony Bright ដែលជាស្ថាបនិកសួនសត្វបាននិយាយថា “ចំនួនសត្វកវែងព្រៃកំពុងឈានទៅរកការផុតពូជដោយស្ងាត់ៗ ។ ត្រឹមរយៈពេល ៣ ទសវត្សរ៍ចុងក្រោយប៉ុណ្ណោះ សត្វកវែង ៤០ ភាគរយបានបាត់បង់ទៅហើយ” ៕

ប្រែសម្រួល៖ វារី

ប្រភព៖ CNA

ចុចអាន៖ ប្រទះឃើញសត្វកម្រជិតផុតពូជ ៤ ប្រភេទនៅតំបន់ការពារធម្មជាតិ