សមាគមអ្នកនិពន្ធខ្មែរ ជ្រើសរើសសិក្ខាកាម៥០រូប ចូលសិក្សាវិជ្ជានិពន្ធ២វគ្គ គឺទ្រឹស្តីអក្សរសិល្ប៍ និងរឿងខ្លី

សមាគមអ្នកនិពន្ធខ្មែរ កំពុងជ្រើសរើសសិក្ខាកាមចំនួន ៥០នាក់ សម្រាប់វគ្គបណ្តុះបណ្តាលអ្នកនិពន្ធជំនាន់ទី៣៥ ដោយបណ្តុះបណ្តាលវិជ្ជានិពន្ធចំនួន២វគ្គ គឺ “ឈ្វេងយល់អំពីទ្រឹស្តីអក្សរសិល្ប៍” និង “រឿងខ្លី”។ នេះបើតាមការផ្សព្វផ្សាយរបស់សមាគមអ្នកនិពន្ធខ្មែរនៅលើបណ្តាញសង្គមហ្វេសប៊ុក ថ្ងៃទី១២ ខែកញ្ញា ឆ្នាំ២០២៣នេះ។

វគ្គបណ្តុះបណ្តាល ស្តីពី “ឈ្វេងយល់អំពីទ្រឹស្តីអក្សរសិល្ប៍” នេះ សិក្សាពីថ្ងៃចន្ទ ដល់ថ្ងៃព្រហស្បតិ៍ ចំណែកវគ្គ “រឿងខ្លី” សិក្សាថ្ងៃសៅរ៍ និងថ្ងៃអាទិត្យរៀងរាល់សប្តាហ៍ នៅអគារសមាគមអ្នកនិពន្ធខ្មែរ ស្ថិតនៅក្នុងបរិវេណវត្តបទុមវតី សង្កាត់ចតុមុខ ខណ្ឌដូនពេញ រាជធានីភ្នំពេញ។ ចំពោះតម្លៃសិក្សាវិញ គឺ៤០ដុល្លារក្នុងមួយវគ្គ ហើយសិក្ខាកាមអាចជ្រើសរើសបានថា សិក្សាវគ្គណាមុនក៏បាន។

សម្រាប់វគ្គសិក្សា “ឈ្វេងយល់អំពីទ្រឹស្តីអក្សរសិល្ប៍” ពីម៉ោង ១៧:៣០នាទី ដល់ម៉ោង ១៩:៣០នាទី។ រីឯ វគ្គ“រឿងខ្លី” សិក្សាថ្ងៃសៅរ៍ ម៉ោង១៣:០០នាទី ដល់ម៉ោង ១៧:០០នាទី ហើយថ្ងៃអាទិត្យ ម៉ោង ៧:៣០នាទី ដល់ម៉ោង ១១:៣០នាទី។

សូមជម្រាបថា ចំពោះអ្នកមានបំណងចុះឈ្មោះសិក្សាវគ្គនិពន្ធអក្សរសិល្ប៍ និងនិពន្ធរឿងខ្លី អាចចុះឈ្មោះឱ្យបានពីថ្ងៃនេះ រហូតដល់ថ្ងៃទី២២ ខែតុលា ឆ្នាំ២០២៣។ ទីកន្លែងទទួលពាក្យគឺ នៅទីស្នាក់ការរបស់សមាគមអ្នកនិពន្ធខ្មែរ ក្នុងបរិវេណវត្តបទុមវតី ឬ តាមរយៈអ៊ីម៉ែល Khmerwriterkwa@gmail.com ឬ តាមលេខទូរសព្ទ ០១២ ៧៩ ២៩ ៥៩៕