ខេត្តពោធិ៍សាត់ មានព្រឹត្តិការណ៍ពិធីបុណ្យភ្នំ រយៈពេល ២ថ្ងៃ ចុងសប្តាហ៍ក្រោយ

ព្រឹត្តិការណ៍ភ្នំំំហ្វេសធីវ៉ល ឬជាពិធីបុណ្យភ្នំ ជាព្រឹត្តិការណ៍ទេសចរណ៍លើទឹកដី ខេត្តពោធិ៍សាត់ នារដូវរំហើយ
ដែលរៀបចំឡើង ក្នុងគោលបំណងផ្សាភ្ជាប់សំឡេងតន្រ្តីក្លែមជាមួយសម្រស់ធម្មជាតិ ដើម្បីបន្ថែមរសជាតិជីវិតថ្មីនៃចុងឆ្នាំ រយៈពេល ២ថ្ងៃ គឺថ្ងៃទីសៅរ៍ទី២៣ និងថ្ងៃអាទិត្យទី២៤ ធ្នូ ២០២៣ ជាមួយនឹងការល់កសំបុត្រ។ នេះបើតាមការផ្សព្វផ្សាយរបស់ មន្ទីរទេសចរណ៍ខេត្តពោធិ៍សាត់ នៅថ្ងៃទី០៥ ខែធ្នូ ឆ្នាំ២០២៣ ។

ព្រឹត្តិការណ៍ទេសចរណ៍នេះ ធ្វើឡើងក្នុងន័យដើម្បីរួមចំណែកក្នុងការបំផុសពីតំបន់ទេសចរណ៍ដ៏ទាក់ទាញ លើទឹកដីនៃស្រុកវាលវែង ខេត្តពោធិ៍សាត់ ដែលជាកន្លែងពេញនិយមបំផុត សម្រាប់អ្នកចូលចិត្តដំណើរកម្សាន្តបែបផ្សងព្រេង។ ប៉ុន្តែព្រឹត្តិការណ៍នេះ បាននាំយកនូវបរិយាកាសថ្មី មិនត្រឹមតែការបោះតង់នោះទេ នៅមានរៀបចំជាស្តង់អាហារ-ភេសជ្ជៈ ចម្រុះជាតិសាសន៍ ការប្រគុំតន្រ្តី និងកម្មវិធីផ្សេងៗទៀត សម្រាប់អ្នកចូលរួមផងដែរ។

គោលបំណងសំខាន់ធំ ៤ នៃព្រឹត្តិការណ៍នេះ រួមមាន៖
១. ជំរុញចលនាទេសចរណ៍ក្នុងស្រុកស្របតាមស្មារតីរបស់ក្រសួងទេសចរណ៍ “ស្រលាញ់ជាតិ ត្រូវស្គាល់ទឹកដី” ។
២. ផ្សព្វផ្សាយសក្តានុពលទេសចរណ៍ និងការវិនិយោគតំបន់ភ្នំ១,៥០០ ស្រុកវាលវែង ខេត្តពោធិ៍សាត់ ជាពិសេសផលិតផលទេសចរណ៍ថ្មីៗ រមណីយដ្ឋានទេសចរណ៍ប្រណិត និងធម្មជាតិដ៏ស្រស់ បំព្រងសមជាគោលដៅ “បុប្ផាលាក់ខ្លួន” នៃខេត្តពោធិ៍សាត់។
៣. ភ្ជាប់ទំនាក់ទំនងរវាងវិស័យរដ្ឋាភិបាល និងឯកជន ជាពិសេសលើកទឹកចិត្តដល់អ្នកវិនិយោគគោលដៅទេសចរណ៍នៅក្នុងតំបន់ភ្នំ១,៥០០ និងបង្ហាញពីការយកចិត្តទុកដាក់ របស់ក្រសួងទេសចរណ៍ តាមរយៈការរៀបចំព្រឹត្តិការណ៍ទាក់ទាញទេសចរណ៍នានា។
៤. ជំរុញលើកកម្ពស់បច្ចេកវិទ្យាក្នុងវិស័យទេសចរណ៍ តាមរយៈការផ្សព្វផ្សាយឌីជីថល និងការកក់សំបុត្រ ចូលរួមតាមប្រព័ន្ធ Wonderpass Technology។

គួរបញ្ជាក់ថា ព្រឹត្តិការណ៍នេះ នឹងធ្វើឡើងនៅភ្នំ១៥០០ ស្រុកវាលវែង ទឹកដីនៃខេត្ដពោធិ៍សាត់ តែម្តង ដែលជាការផ្តួចផ្តើមរៀបចំឡើងដោយ Kai Creative Station រួមនឹងដៃគូសហការដទៃទៀត និងទទួលបានការគាំទ្រដោយ មន្ទីរទេសចរណ៍ខេត្តពោធិ៍សាត់ ដើម្បីផ្សព្វផ្សាយពីតំបន់ទេសចរណ៍ភ្នំធម្មជាតិដ៏ស្រស់ត្រកាលនេះ មន្ទីរទេសចរណ៍ខេត្តពោធិ៍សាត់។

គួររំលឹកដែរថា ស្រុកវាលវែង បានជាប់ឈ្មោះជាស្រុកទេសចរណ៍ដ៏ល្បី ដែលទាក់ទាញទេសចរជាតិ-អន្តរជាតិ មកទស្សនាមិនដែលដាច់ ដោយសារតែជាតំបន់រមណីយដ្ឋានធម្មជាតិ ព្រៃ ភ្នំ ទឹកធ្លាក់ និងទេសភាព៕

រមណីយដ្ឋាន ១០កន្លែង នៅពោធិ៍សាត់ ជម្រើសល្អបំផុតសម្រាប់ដំណើរកម្សាន្តបែបធម្មជាតិ នាចុងឆ្នាំនេះ