ព័ត៌មានជាតិ

កសិករប្រើដីជំរាលស្ទឹងសង្កែដាំបន្លែចម្រុះ ទេសចរជិះកាត់ចូលថតរូបជាប់ជាប្រចាំ

បានផុស

១ year មុន

នៅ

ថ្ងៃសុក្រ ១៩ មករា ២០២៤

ដោយ

ប្រជាពលរដ្ឋដែលរស់នៅភូមិសាស្រ្តតាមដងស្ទឹងសង្កែ ក្រៅពីរបរធ្វើស្រែចម្ការក៏ប្រើប្រាស់ដីជំរាលស្ទឹងដើម្បីដាំដំណាំបន្លែចម្រុះ (ដំណាំរយៈពេលខ្លី) ខណៈបន្លែស្អំជាដំណាំពេញនិយមជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋដែលមានទីលំនៅតាមដងស្ទឹងសង្កែ ជាពិសេសក្នុងភូមិខ្សាច់ពោយនិងភូមិកំពង់ឆ្លង ឃុំឈើទាល ស្រុកបាណន់ នៃខេត្តបាត់ដំបង ដាំដំណាំបន្លែចម្រុះតាមដីជំរាលស្ទឹងដើម្បីទទួលបានចំណូលបន្ថែមផ្គត់ផ្គង់គ្រួសារ។

ដំណាំបន្លែទាំងនោះពលរដ្ឋច្រើនដាំនៅអំឡុងរដូវប្រាំង ពីព្រោះកម្រិតទឹកស្ទឹងសង្កែទាបថ្លាល្អ រួមទាំងដីមានជីវជាតិផងដែរ។

បើតាមមន្ទីរទេសចរណ៍ខេត្តបាត់ដំបង ការដាំដុះបន្លែចម្រុះក្រៅពីជួយបង្កើនប្រាក់ចំណូលបន្ថែមដល់ប្រជាកសិករ ទិដ្ឋភាពបៃតងនៃផលដំណាំបន្លែ រួមជាមួយទឹកស្ទឹងសង្កែរាក់ថ្លាល្អ ជំនោរខ្យល់ត្រជាក់នារដូវលំហើយ បាននឹងកំពុងក្លាយជាផលិតផលទេសចរណ៍តាមរដូវកាលដ៏ទាក់ទាញមួយក្នុងស្រុកបាណន់ថែមមួយកម្រិតទៀត។

មិនតែប៉ុណ្ណោះ ជារៀងរាល់ថ្ងៃអ្នកដឹកភ្ញៀវ (តុត តុក) និងមគ្គុទ្ទេសក៍ទេសចរ មុននឹងទៅដល់រមណីយដ្ឋានប្រាសាទបាណន់ ពួកគេតែងឆ្លៀតនាំភ្ញៀវទេសចរ (ពិសេសទេសចរអន្តរជាតិ) ជិះមើលផលដំណាំបន្លែ ដើរកាត់ស្ពានយោល ដើម្បីឲ្យភ្ញៀវទេសចរបានផ្តិតយករូបភាពស្អាតៗ និងស្វែងយល់ពីការរស់នៅរបស់ប្រជាជនជនបទ។

ទៀតសោតទិដ្ឋភាពបៃតងនៃផលដំណាំបន្លែតាមដងស្ទឹងសង្កែទាំងនោះ ក៏បានធ្វើឲ្យមានភាពងាយស្រួលដល់អ្នករៀបចំកញ្ចប់ទស្សនកិច្ច ក្នុងការធ្វើឲ្យមានភាពសំបូរបែប (make a difference) នៃសេវាកម្មរបស់ខ្លួន ដើម្បីធ្វើឲ្យទេសចរ ទទួលបានបទពិសោធន៍ថ្មីៗ អារម្មណ៍ស្រស់ស្រាយ ការចងចាំល្អ ពេលត្រឡប់ទៅកាន់ប្រទេសកំណើតវិញផងដែរ៕