ព័ត៌មានជាតិ

«សម្រស់កោះហាន» មានលក្ខណៈពិសេសអ្វីខ្លះ ទើបត្រូវចាត់ទុកជាទីតាំងដ៏ទាក់ទាញក្នុងខេត្តស្ទឹងត្រែង?

បានផុស

១ year មុន

នៅ

ថ្ងៃចន្ទ ៥ កុម្ភៈ ២០២៤

ដោយ

Din Thary

សហគមន៍អេកូទេសចរណ៍សម្រស់កោះហាន បានក្លាយទៅជាទីតាំងទេសចរណ៍មួយកន្លែងដ៏ទាក់ទាញក្នុងខេត្តស្ទឹងត្រែង។

«សម្រស់កោះហាន» បានស្រូបទាញអារម្មណ៍ភ្ញៀវទេសចរទៅលេងកម្សាន្តជាហូរហែ ដែលនេះជាកត្តាមួយជួយជំរុញជីវភាពប្រជាសហគមន៍ឲ្យកាន់តែល្អប្រសើរផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនេះ ចង់ដឹងថាតើសហគមន៍អេកូទេសចរណ៍ «សម្រស់កោះហាន» មានលក្ខណៈពិសេសបែបណាខ្លះ ទើបអាចស្រូបទាញទេសចរណ៍ទៅលេងកម្សាន្តបែបនេះ?

សហគមន៍អេកូទេសចរណ៍ «សម្រស់កោះហាន» មានភូមិសាស្ត្រស្ថិតលើដីកោះ ក្នុងឃុំកោះស្នែង ដែលភ្ញៀវទេសចរអាចធ្វើដំណើរឆ្លងតាមស្ពានសេកុងតាមផ្លូវជាតិលេខ៧ ពីទីរួមខេត្តស្ទឹងត្រែងនិងមានចម្ងាយប្រហែល ២៤ គីឡូម៉ែត្រ ទៅដល់កំពង់ដរចម្លងសហគមន៍។ នេះបើតាមការរៀបរាប់ដោយក្រសួងទេសចរណ៍រំលេចពីភូមិសាស្រ្តតំបន់ទេសចរណ៍សម្រស់កោះហាន។

«សម្រស់កោះហាន» បានទាក់ទាញភ្ញៀវទេសចរឲ្យទៅលេងកម្សាន្ត ដោយនៅទីនោះមានទីកន្លែងទាក់ទាញជាច្រើន ដូចជា ជិះទូកមើលព្រៃលិចទឹក សត្វស្លាបទឹកទន្លេមេគង្គ និងឡើងភ្នំ, ទស្សនារូបសំណាក់ថ្មពាក់ព័ន្ធរឿងព្រេង (ថ្មកំបោរ)។ ក្រៅពីនេះ «សម្រស់កោះហាន» ក៏សក្ដិសមផងដែរសម្រាប់អ្នកចូលចិត្តរំសាយអារម្មណ៍បែបបោះតង់ មើលថ្ងៃលិច និងជិះទូកកៃយ៉ាក់តាមព្រៃលិចទឹក។

ជាងនេះទៀត ក៏អាចពិសាអាហារប្រចាំតំបន់ដែលរៀបចំដោយសហគមន៍ផ្ទាល់ និងអាចស្នាក់នៅផ្ទះស្នាក់សហគមន៍ និងរៀនសូត្រពីជីវភាពរស់នៅអ្នកលើកោះ។

ក្រៅពី «សម្រស់កោះហាន» ដែលបានអូសទាញទេសចរពីគ្រប់មជ្ឈដ្ឋានទៅលេងកម្សាន្ត ខេត្តស្ទឹងត្រែងដែលស្ថិតនៅភូមិភាគឦសានមានព្រំប្រទល់ជាប់ប្រទេសឡាវ មានតំបន់ទេសចរណ៍ជាច្រើនកន្លែងទៀតដូចជា ទឹកជួរអូរចាប ប្រាសាទព្រះគោ ឆ្នេរខ្សាច់ចម្ការក្រូច រមណីយដ្ឋានអេកូទេសចរណ៍ភ្នំជម្រកសត្វ កោះទន្សាយតំបន់រ៉ាមសារ ឆ្នេរខ្សាច់សេកុង និងទីតាំងទាក់ទាញជាច្រើនកន្លែងទៀត ដែលបានទាញលំហូរទេសចរទៅលេងក្នុងមួយឆ្នាំៗរាប់ម៉ឺននាក់៕