កម្ពុជា នឹងធ្វើយុទ្ធនាការទិវាអន្តរជាតិនារី ៨មីនា មួយខែពេញ ដើម្បីរម្លឹកពីការតស៊ូទាមទារសិទ្ធិស្មើគ្នា

ក្រសួងកិច្ចការនារី នឹងរៀបចំយុទ្ធនាការទិវាអន្តរជាតិនារី ៨មីនា ឆ្នាំ២០២៤ ខួបទី១១៣ ពេញមួយខែមីនាតែម្តង ពោល គឺនឹងដំណើរការចាប់ពីថ្ងៃទី១ ដល់ទី៣១ ខែមីនា ក្រោមមូលបទ “ស្ត្រី និងក្មេងស្រី ក្នុងបរិវត្តកម្មឌីជីថល”។ នេះបើតាមសេចក្តីប្រកាសព័ត៌មានរបស់ក្រសួងកិច្ចការនារីនៅថ្ងៃទី១៩ ខែកុម្ភៈ ឆ្នាំ២០២៤នេះ។

ទិវាអន្តរជាតិ ៨មីនា គឺជាព្រឹត្តិការណ៍សកល ហើយកម្ពុជាក៏បានប្រារព្ធជារៀងរាល់ឆ្នាំ ដើម្បីរម្លឹកពីការតស៊ូទាមទារសិទ្ធិស្មើគ្នា សេរីភាព និងឆ្លុះបញ្ចាំងពីវឌ្ឍនភាព សមិទ្ធផល បញ្ហាប្រឈម ការប្តេជ្ញាចិត្តក៏ដូចជាវិធានការផ្សេងៗដើម្បីលើកកម្ពស់សមភាពយេនឌ័រ និងភាពអង់អាចរបស់ស្ត្រី និងក្មេងស្រីគ្រប់រូប។ ដោយឡែក សម្រាប់មូលបទឆ្នាំនេះ មានគោលបំណងរំលេចពីសក្តានុពល និងភាពចាំបាច់នៃការលើកកម្ពស់ការចូលរួម និងភាពជាតំណាងរបស់ស្ត្រិ និងក្មេងស្រី ក្នុងវិស័យឌីជីថល ប្រកបដោយប្រិទ្ធភាព និងសុវត្ថិភាព ដែលឆ្លើយតបនឹងសង្គមខ្មែរក្នុងយុគសម័យឌីជីថល។

នៅក្នុងយុទ្ធនាការនេះ ក្រសួងកិច្ចការនារី និងក្រសួងស្ថាប័នពាក់ព័ន្ធ នឹងរៀបចំសកម្មភាពសំខាន់ៗដូចជា គណៈប្រតិភូនារីចូលជួបសម្តែងការគួរសម និងរាយការណ៍ពីវឌ្ឍនភាពនៃការងារនារីជូនដល់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា។ មានការរៀបចំវេទិកាយុវជនដើម្បីផ្សព្វផ្សាយតាមទូរទស្សន៍ និងយុទ្ធនាការផ្សព្វផ្សាយតាមប្រព័ន្ធឌីជីថល មិនតែប៉ុណ្ណោះ ក៏មានការអបអរសាទរទិវាអន្តរជាតិនារី ខួបលើកទី១១៣ ឆ្នាំនេះ នៅតាមក្រសួង ស្ថាប័ន គ្រប់រាជធានី​ ខេត្ត និងគ្រឹះស្ថានសិក្សានានា។

បន្ថែមពីនេះ ក៏មានជាការរៀបចំផលិតវីដេអូឯកសារដើម្បីផ្សព្វផ្សាយតាមទូរទស្សន៍ ប្រព័ន្ធឌីជីថល រួមទាំងមានជាការចងបដាពាក្យស្លោកតាមមហាវិថីនានាផងដែរ។ ចំពោះការផលិត និងផ្សព្វផ្សាយវីដេអូខ្លី ដែលជាសារនៅក្នុងយុទ្ធនាការនេះ ក៏មានការចូលរួមពីថ្នាក់ដឹកនាំជាស្ត្រី សិល្បការិនី អ្នកមានឥទ្ធិពលក្នុងសង្គមជាស្ត្រី យុវជន និងក្មេងស្រី នៅលើបណ្តាញសង្គម។ ចុងក្រោយ ក៏មានជាការផលិត និងផ្សព្វផ្សាយព្រឹត្តិបត្រនារីរតនៈលេខពិសេស ក្រោមមូលបទ “ស្ត្រី និងក្មេងស្រី ក្នុងបរិវត្តកម្មឌីជីថល” ផងដែរ៕