ភ្ញៀវទេសចរចង់ជិះទូកនៅស្ទឹងសៀមរាប ប៉ុន្តែទូកមានតែក្នុងឱកាសពិធីបុណ្យធំ

ពលរដ្ឋក៏ដូចជាភ្ញៀវទេសចរបានសំណូមពរទៅ អាជ្ញាធរពាក់ព័ន្ធ ខេត្តសៀមរាប ឱ្យជួយរៀបចំទូកតូចៗសម្រាប់ភ្ញៀវទេសចរជិះលេងកម្សាន្តនៅតាមបណ្ដោយមាត់ស្ទឹងសៀមរាប ខណៈពួកគាត់លើកឡើងថា ក្រៅតែពិធីបុណ្យទានធំដូចជាបុណ្យចូលឆ្នាំ សង្ក្រាន្តអង្គរ បុណ្យអុំទូកជាដើមនោះ គេមិនឃើញមានទូកសម្រាប់ជួលឱ្យភ្ញៀវទេសចរជិះនោះទេ។

មន្ត្រីមន្ទីរទេសចរណ៍ខេត្តសៀមរាប បានឱ្យដឹង នៅរសៀលថ្ងៃទី១២ ខែមីនា ឆ្នាំ២០២៤ នេះថា ចំពោះការរៀបចំដាក់ទូកតូចៗឱ្យភ្ញៀវទេសចរជិះលេងកម្សាន្ត ខាងមន្ទីរក៏គិតឃើញបែបនេះដែរ។ ប៉ុន្តែនៅមាត់ស្ទឹងសៀមរាបបច្ចុប្បន្នមិនសូវមានទឹកប៉ុន្មានទេនារដូវនេះ។ ព្រោះបើចង់បានទឹកមកអុំទូកលេង គឺត្រូវស្នើទៅអាជ្ញាធរជាអប្សរា ឱ្យបើកទ្វារទឹក ទើបបាន។

មន្ត្រីដដែលបន្តថា ចំពោះទូកដែលភ្ញៀវធ្លាប់ជិះលេងកម្សាន្តពេលពិធីបុណ្យអុំទូកនោះ ត្រូវបានអាជ្ញាធរខេត្តដឹកយកទៅរក្សាទុក ព្រោះខ្លាចខូចខាត។ មន្ត្រីដដែលបន្ថែមថា ការសំណូមពររបស់ពលរដ្ឋលើបញ្ហានេះ គឺជារឿងល្អដែរ ហើយមន្ទីរនឹងនាំសំណូមពរនេះទៅថ្នាក់ដឹកនាំដើម្បីសម្រេច។

ចំណែក មន្ត្រីសាលាក្រុងសៀមរាប បានឱ្យដឹងថា បច្ចុប្បន្នអាជ្ញាធរខេត្តសៀមរាប កំពុងគិតគូររៀបចំឱ្យមានការជិះទូកលេងកម្សាន្តឡើងវិញ។ លោកបន្តថា ប្រសិនបើពលរដ្ឋ និងភ្ញៀវទេសចរណ៍ចង់ជិះទូកលេងកម្សាន្ត អាចទាក់ទងទៅខាង ស.ស.យ.ក ដើម្បីបានព័ត៌មានលម្អិតបន្ថែម។ 

ពលរដ្ឋមានសង្ឃឹមយ៉ាងមុតមាំថា អាជ្ញាធរខេត្តសៀមរាប នឹងគិតគូររៀបចំទូកតូចៗសម្រាប់ឱ្យភ្ញៀវទេសចរជិះលេងកម្សាន្តនៅតាមបណ្ដោយមាត់ស្ទឹងសៀមរាប ហើយក៏ជាផ្នែកមួយសម្រាប់ទាក់ទាញភ្ញៀវទេសចរណ៍ជាតិ និងអន្តរជាតិឱ្យមកកម្សាន្តក្នុងខេត្តសៀមរាប ច្រើនកុះករផងដែរ៕

អត្ថបទ៖ ជុន កុសល