អត្ថន័យនៃល្បែងលាក់កន្សែង គឺបង្រៀនមនុស្សឱ្យចេះប្រុងស្មារតីជានិច្ច និងរហ័សរហួន

លាក់កន្សែង ជាល្បែងប្រជាប្រិយ ដែលគេនិយមលេងច្រើនបំផុតនារដូវចូលឆ្នាំខ្មែរ ឬឱកាសជួបជុំណាមួយ និងអាចលេងបានទាំងក្មេងចាស់ប្រុសស្រី ដែលមានគ្នាចាប់ពី ៦-៧នាក់ ឡើងទៅ។

ចំពោះការលេង គឺតម្រូវឱ្យអ្នកលេង អង្គុយចោងហោងជារង្វង់ ហើយមានគ្នាម្នាក់ដើរជុំវិញ ដោយដៃកាន់កន្សែង ឬក្រម៉ាដែលរុំតឹងណែន ដើរពីក្រោយខ្នងអ្នកអង្គុយជារង្វង់ ហើយបញ្ឆោតអ្នកអង្គុយមិនឱ្យដឹងខ្លួនឡើយថា នឹងលាក់កន្សែងក្រោយខ្នងអ្នកណា។

ទាក់ទងនឹងប្រវត្តិនៃល្បែងប្រជាប្រិយខ្មែរមួយនេះ គឺមិនទាន់មានឯកសារណាមួយ បង្ហាញច្បាស់លាស់ពីប្រភពនៃល្បែងកម្សាន្តមួយនេះនៅឡើយទេ តែចំពោះអត្ថន័យវិញ ល្បែងប្រជាប្រិយមួយនេះ គឺបង្រៀនយើងឱ្យ​មាន​ស្មារតី​រឹងប៉ឹង និង​រហ័សរហួន ពិសេស​ធ្វើឱ្យមាន​ទម្លាប់​ប្រុងស្មារតី​ជានិច្ច ដូចជាពេលដែលគេរត់ក្រឡឹងជុំវិញ យើងត្រូវផ្ទៀងផ្ទាត់ស្តាប់ ប្រជែងនឹងសំឡេងច្រៀងនិងរត់ ដើម្បីដឹងថា គេលាក់ក្រោយខ្នងយើង ឬអ្នកក្បែរឬអត់។ បើអ្នកខ្លះប្រហែស គេដើរបានមួយជុំហើយ ក៏មិនទាំងដឹងផងថា គេលាក់ក្រោយខ្នងខ្លួន រហូតទាល់តែគេគក់ខ្នងទើបដឹង។ ល្បែងប្រជាប្រិយខ្មែរមួយនេះ គេលេងបន្តបែបនេះរហូត ទាល់តែគេឈប់លេង៕