ក្រសួងប្រៃសណីយ៍ ប្រាប់ពីវិធីសាស្ត្រមួយចំនួនក្នុងការណែនាំកូនពីការប្រើប្រាស់អ៊ីនធឺណិតឱ្យមានសុវត្ថិភាព

ការប្រើប្រាស់អ៊ីនធឺណិតបានផ្តល់នូវគុណប្រយោជន៍ជាច្រើនដល់មនុស្ស ប៉ុន្តែវាក៏ជះផលប៉ះពាល់តិចតួចដែរ បើសិនជាការប្រើប្រាស់នោះមិនបានត្រឹមត្រូវ ជាពិសេស បុគ្គលដែលមិនទាន់យល់ច្បាស់ពីសង្គម។ យ៉ាងណាមិញ ថ្មីៗនេះ ក្រសួងប្រៃសណីយ៍ និងទូរគមនាគមន៍ បានប្រាប់ពីវិធីសាស្ត្រមួយចំនួនក្នុងការណែនាំកូនពីការប្រើប្រាស់អ៊ីនធឺណិតឱ្យមានសុវត្ថិភាព។

១. ណែនាំកូនពីពេលវេលា និងសុជីវធម៌នៅលើអ៊ីនធឺណិត

ពិភាក្សា និងសន្ទនាជាមួយកូន ដើម្បីធ្វើការសម្រេចចិត្តរួមគ្នាអំពីពេលវេលា ចំណង់ចំណូលចិត្ត និងប្រាប់ពួកគេអំពីសុជីវធម៌ និងឥរិយាបថល្អៗក្នុងការប្រើប្រាស់អ៊ីនធឺណិត។

២. បង្រៀនកូនរបស់អ្នកអំពីរបៀបរក្សាសុវត្ថិភាពនៅលើអ៊ីនធឺណិត

– ណែនាំពួកគេអំពីការកំណត់ពាក្យសម្ងាត់ដែលមានសុវត្ថិភាព

– ណែនាំកូនមិនឱ្យចែករំលែកនូវទីតាំងរបស់ខ្លួនទៅកាន់អ្នកដ៏ទៃ

– ណែនាំកូនកុំឱ្យជជែកជាមួយ ឬចុចលើតំណភ្ជាប់ឯកសារផ្សេងៗ ពេលមនុស្សចម្លែកផ្ញើមក

– ត្រួតពិនិត្យនូវការសន្ទនារបស់កូនដើម្បីចៀសវាងការគំរាមកំហែងតាមអនឡាញ។

៣. ណែនាំកូនអ្នកអំពីព័ត៌មានពិតនៅលើអ៊ីនធឺណិត

– លើកទឹកចិត្តកូនលោកអ្នកស្វែងរកព័ត៌មានពីច្រើនប្រភព ដើម្បីយកមកធ្វើការផ្ទៀងផ្ទាត់ភាពត្រឹមត្រូវមុននឹងជឿជាក់

– លើកទឹកចិត្តកូនអ្នក ពិភាក្សាជាមួយអ្នកក្នុងករណីពួកគេមានមន្ទិលសង្ស័យអំពីព័ត៌មានលើអនឡាញ

– ណែនាំកូនអ្នកគិតពិចារណាមុននឹងចុច (ThinkB4Click) ឬផុសអ្វីមួយនៅលើបណ្តាញសង្គម។

ការប្រើប្រាស់អ៊ីនធឺណិតប្រកបដោយសុវត្ថិភាព ពិតជាមានសារសំខាន់ណាស់ ជាពិសេស សុវត្ថិភាពកូនៗជាទីស្រលាញ់របស់លោកអ្នក។ ដូច្នេះ ឪពុកម្តាយគួរតែណែនាំកូនៗពីការប្រើប្រាស់អ៊ីនធឺណិតឱ្យបានត្រឹមត្រូវ និងមានសុវត្ថិភាព៕