ទៅសៀមរាប! បើចង់ប្លែកអារម្មណ៍ គួរសាកល្បងសកម្មភាពកម្សាន្ត ៦គោលដៅ

ក្រៅពីការទស្សនាប្រាង្គប្រាសាទ ខេត្តសៀមរាបក៏មានកន្លែងកម្សាន្តជាច្រើនផ្សេងទៀត ដូចជាទេសចរណ៍បែបធម្មជាតិ ទេសចរណ៍កែច្នៃ ក៏ដូចជាសកម្មភាពកម្សាន្តតាមភូមិសហគមន៍ និងកន្លែងមួយចំនួន ដូចជា ការជិះខ្សែរ៉តលើដើមឈើធំៗ ជិះឡានប្រណាំង ឬម៉ូតូកង់៤ លេងតាមជើងភ្នំ។ លើសពីនេះ ទេសចរក៏អាចរីករាយជាមួយសកម្មភាពកម្សាន្តផ្សេងៗ បែបលក្ខណៈវប្បធម៌ប្រពៃណីថែមទៀតផង។

១. កន្លែងកម្សាន្តបែបកែច្នៃ
Angkor Zipline ជាកន្លែងកម្សាន្តបែបជិះខ្សែរ៉ត ពីលើដើមឈើអាយុកាលចាស់ឆ្នាំនៅតំបន់អង្គរ មានទីតាំងស្ថិតនៅភូមិរហាល ឃុំនគរធំ ស្រុកសៀមរាប ខេត្តសៀមរាប (ចំងាយ៨០០ម៉ែត ខាងក្រោយប្រាសាទតាកែវ) ។

Angkor Wonder Garden ជាសួនច្បារដ៏ធំ ដែលមានសកម្មភាពកម្សាន្តជាច្រើន និងបើកដំណើរការជារៀងរាល់ថ្ងៃ ចាប់ពីថ្ងៃចន្ទ ដល់ថ្ងៃអាទិត្យ ពីវេលាម៉ោង ៧:៣០នាទីព្រឹក ដល់ម៉ោង ៦:00ល្ងាច មានទីតាំងស្ថិតនៅ ភូមិគោកចាន់​ ឃុំដានរុន​ ស្រុកសូទ្រនិគម​ ខេត្ត​សៀមរាប​ (ផ្លូវចូលទល់មុខសាលាឃុំខ្ចាស់ ចូលទៅក្នុងប្រហែល ៦០០ម៉ែត្រ) ។

២. រមណីយដ្ឋានធម្មជាតិ និងប្រវត្តិសាស្ត្រ
ឧទ្យានជាតិ ភ្នំគូលែន
គ្រាន់តែតំបន់ទេសចរណ៍ភ្នំគូលែនមួយ មានកន្លែងកម្សាន្តរាប់មិនអស់នៅលើខ្នងភ្នំ ដោយបូករួមទាំងរមណីយដ្ឋានវប្បធម៌ និងរមណីយដ្ឋានទឹកធ្លាក់ជាដើម។ ពីមុន អ្នកទេសចរត្រូវធ្វើដំណើរឆ្ងាយពីក្រុងសៀមរាប ដើម្បីមកកម្សាន្តលើខ្នងភ្នំនេះវិលល្ងាច ប៉ុន្តែបច្ចុប្បន្ន អ្នកទេសចរមិនពិបាកធ្វើដំណើរចុះឡើងវែងឆ្ងាយទៀតឡើយ ដោយអាចស្វែងរកសេវាស្នាក់នៅក្បែរជើងភ្នំបាន ដោយអាចជិះកម្សាន្តម៉ូតូកង់៤ ឬកង់ ដើរលេងជើងភ្នំគូលែនបានទៀតផង។

កំពង់ភ្លុក ៖ ថ្វីបើមិនមែនជាកន្លែងថ្មី តែជាអ្វីដែលទេសចរមិនគួរមើលរំលេង ពិសេសនៅរដូវទឹកឡើងនេះ ព្រោះជាវេលាដ៏ស័ក្តិសមបំផុតសម្រាប់ដំណើរកម្សាន្តទៅកាន់សហគមន៍ទេសចរ កំពង់ភ្លុក ដោយទេសចរអាចជិះទូកកម្សាន្ត គយគន់ទេសភាពព្រៃលិចទឹក សត្វស្លាប ក៏ដូចជាជីវភាពរស់នៅរបស់អ្នកភូមិក្នុង​សហគមន៍។

៣. កន្លែងពេញនិយមជាលក្ខណៈប្រពៃណី-វប្បធម៌
ភាពល្បីល្បាញរបស់ភូមិព្រះដាក់ ៖ ព្រះដាក់ គឺជាភូមិបូរាណមួយស្ថិតនៅជិតក្រុងសៀមរាប ជាកន្លែងមួយបានបន្សល់ទុកនូវវប្បធម៌ប្រពៃណីជាច្រេីន ដែលជាទីចាប់អារម្មណ៍ដល់ភ្ញៀវទេសចរជាតិ-អន្តរជាតិ។ មិនត្រឹមតែអាចស្វែងយល់អំពីប្រពៃណីវប្បធម៌ពលរដ្ឋខ្មែរដែលរស់នៅក្នុងតំបន់នេះប៉ុណ្ណោះ ពិសេសគឺការធ្វេីសិប្បកម្ម និងកសិកម្មបែបប្រពៃណី ក៏ដូចជាការសិក្សាស្វែងយល់ពីជំនឿសាសនាជាដេីម។

កន្លែងដែលមិនគួរមេីលរំលង ពេលមកកម្សាន្តក្នុងខេត្តសៀមរាប គឺការស្មូនឧបករណ៍បុរាណជាមួយ ខ្មែរសេរ៉ាម៉ិច ដែលជាកន្លែងផ្តល់នូវបទពិសោធប្លែកមួយទៀត ក៏ដូចជាអនុស្សាវរីយ៍ល្អៗដល់ភ្ញៀវទេសចរ។ សម្រាប់ការចូលរួមជាមួយថ្នាក់ស្មូន គឺមានថ្នាក់នៅម៉ោង ៨ព្រឹក ១០ព្រឹក ២រសៀល និង៤រសៀល ដោយតម្រូវឱ្យធ្វើការកក់មុន។