ភាពប្រណិតបំផុត ដែលធ្វើឲ្យមង្គលការកូនសេដ្ឋីឥណ្ឌា ក្លាយជាពិធីចំណាយប្រាក់ច្រើនជាងសែរាជវង្សលើលោក

យោងតាមកាសែត The Guardian ចុះផ្សាយថា ពិធីអាពាហ៍ពិពាហ៍របស់ Anant Ambani និង Radhika Merchant បានប្រារព្ធឡើងចាប់ពីថ្ងៃទី ១២ដល់ថ្ងៃ១៤ ខែកក្កដា ដោយចំណាយអស់ប្រាក់ប្រហែល ៦០០ លានដុល្លារ ដែលចំនួននេះត្រូវគេប៉ាន់ប្រមាណថា ថ្លៃជាងពិធីរៀបអភិសេករបស់សែរាជវង្សលើពិភពលោកទៀត។

ការចំណាយនេះច្រើនជាង ១៤ ដង នៃចំនួនសរុប ៤៣.២ លានដុល្លារ​ ដែលព្រះអង្គម្ចាស់ Harry និងអតីតតារាសម្តែងអាមេរិក Meghan ធ្លាប់ចំណាយក្នុងពិធីអភិសេកកាលពីឆ្នាំ ២០១៨ ទៅទៀត។ វាក៏លើសពីការចំណាយចំនួន ៤៨ លានដុល្លារនៃពិធីអភិសេករបស់ព្រះអង្គម្ចាស់ Charles និងព្រះនាង Diana ក្នុងឆ្នាំ ១៩៨១ ដែលត្រូវបានគេប៉ាន់ប្រមាណថា មានចំនួនប្រហែល ១៦៣លានដុល្លារអាមេរិក។

លើសពីនេះទៀត វាក៏លើសតម្លៃ ៤៥លានដុល្លារនៃអាពាហ៍ពិពាហ៍ឆ្នាំ ១៩៧៩ របស់ស្ដេចនិងជានាយក​រដ្ឋមន្ត្រី​នៃ​ប្រទេស​អារ៉ាប់រួម​ Sheikh Mohammed bin Rashid Al Maktoum ព្រមទាំងមហេសី Hind Bint Maktoum Al Maktoum ដែលឥឡូវនេះមានតម្លៃប្រហែល ១៣៧លានដុល្លារអាមេរិក។

ទោះបីជាយ៉ាងណាក៏ដោយ ការចំណាយគួរឲ្យកត់សម្គាល់សម្រាប់គូស្នេហ៍ឥណ្ឌានេះ មែនទែនទៅបានចាប់ផ្ដើមយ៉ាងយ៉ាង​អធិកអធមចាប់តាំងពីខែមីនាមក​ ដែលរួមមាន ៦ លានដុល្លារ​ចាយទៅឲ្យតារាចម្រៀង Rihanna សម្តែងនៅក្នុងពិធីមុនអាពាហ៍ពិពាហ៍ ហើយ ១៥០លានដុល្លារសម្រាប់ការជិះទូកកម្សាន្តពីអ៊ីតាលីទៅកាន់ភាគខាងត្បូងនៃប្រទេសបារាំងក្នុងខែឧសភា​ និង១០លានដុល្លារទៀត សម្រាប់ការសម្តែងរបស់តារាចម្រៀង Justin ក្នុងអំឡុងពេលពិធីនៅខែកក្កដា ក្នុងទីក្រុងបុមបៃ។

មិនត្រឹមប៉ុណ្ណឹងទេ នៅក្នុងពិធីមង្គលការកូនប្រុសពៅរបស់បុគ្គលអ្នកមានបំផុតនៅអាស៊ីរូបនេះ ក៏បានផ្តល់អំណោយដល់បុរសល្អបំផុតទាំង ២៥ នាក់របស់គាត់ជាមួយនឹងនាឡិកាដៃ Audemars Piguet រចនាឡើងដោយមាស និងត្បូងកណ្តៀង 18K តម្លៃដល់ទៅពីរលានរូពី (២៣៩,០០០ដុល្លារអាមេរិក) ក្នុងមួយគ្រឿង។

បន្ថែមពីលើនេះ មុនពិធីមង្គលការជាផ្លូវការ ពួកគេបានរៀបចំពិធីមង្គលការដ៏ធំមួយសម្រាប់គូស្វាមីភរិយាចំនួន ៥០ គូ ដោយម្នាក់ៗទទួលបានទឹកប្រាក់ ១០០,០០០ រូពី គ្រឿងអលង្ការមាស និងប្រាក់ គ្រឿងទេស ព្រមទាំងរបស់របរប្រើប្រាស់ក្នុងផ្ទះពីគ្រួសារ Ambani ថែមទៀតផង។

យ៉ាងណាមិញ នេះក៏មិនមែនជាលើកទីមួយដែលសម្រាប់មហាសេដ្ឋី Ambani ហ៊ានចំណាយនូវទឹកប្រាក់ច្រើនសន្ធឹក ដើម្បីផ្គាប់ផ្គុនកូនប្រុសនិងកូនប្រសាស្រី។ កាលពីឆ្នាំ២០១៨ គាត់បានរៀបចំពិធីមង្គលការថ្លៃបំផុតនៅក្នុងប្រទេសឲ្យកូនស្រីសំណព្វចិត្ត ដែលកាលណោះត្រូវគេរាយការណ៍ថា ចំណាយអស់ ១០០លានដុល្លារ ហើយក៏អញ្ញើញតារាចម្រៀងអាមេរិក Beyonce សម្តែងក្នុងកម្មវិធីនោះយ៉ាងឧឡារិកថែមទៀតផង៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖មង្គលការ​កូនមហាសេដ្ឋីឥណ្ឌា ប្រើរថយន្ត Rolls-Royce តុបតែង​សំណាញ់​មាសស្រោបពីក្រៅ