KPT+

ចិត្តសាស្ត្រលើកទឹកចិត្តបុគ្គលិកតាមភោជនីយដ្ឋាន យកបេះដូងទៅធ្វើការ

បានផុស

៤ years មុន

នៅ

ថ្ងៃអង្គារ ៩ មីនា ២០២១

ដោយ

មានម្ចាស់ភោជនីយដ្ឋានច្រើននាក់ណាស់បើកដំណើរការអាជីវកម្ម ដោយមិនដឹងពីសារៈសំខាន់នៃធនធានមនុស្សនៅក្នុងប្រតិបត្តិការភោជនីយដ្ឋានរបស់ខ្លួនឡើយ។ មិនថាម្ហូបអាហារនៅហាងរបស់ពួកគេឆ្ងាញ់ប៉ុណ្ណា ឬមានទីតាំងល្អប៉ុណ្ណាក៏ដោយ បើបុគ្គលិកមិនមានភាពរាក់ទាក់ដាក់ភ្ញៀវ និងគ្មានស្មារតីបម្រើសេវាកម្ម នោះអតិថិជននឹងមិនចង់ត្រឡប់មកហាងម្តងទៀតទេ។ ហេតុនេះ ការយល់ដឹងពីចិត្តសាស្រ្តលើកទឹកចិត្តបុគ្គលិកឲ្យខំធ្វើការជារឿងសំខាន់ដែលគ្រប់ភោជនីយដ្ឋានត្រូវតែចេះ។

បង្ហាញឥរិយាបថគំរូឲ្យបុគ្គលិក

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាម្ចាស់ ឬអ្នកគ្រប់គ្រងភោជនីយដ្ឋានមួយ ចង់ឬមិនចង់ឲ្យបុគ្គលិកធ្វើតាម ក៏ពួកគេចាំចម្លងសកម្មភាពរបស់យើងដែរ។ បើយើងមានមុខក្រញែក្រញ៉ូវ ឬខឹងសម្បា ហើយឡូឡាដាក់គេដាក់ឯង ប្រាកដណាស់បុគ្គលិកនឹងបម្រើសេវាកម្មដល់អតិថិជនតាមរបៀបដូចគ្នា! ប៉ុន្តែបើយើងមានទឹកមុខញញឹមស្រស់ថ្លា និងមានឥរិយាបទល្អ វានឹងនាំឲ្យបុគ្គលិកយកជាគំរូតាមដូចគ្នាដែរ។

កុំដាក់កំហុសលើបុគ្គលិកទទួលភ្ញៀវ

បុគ្គលិកទទួលភ្ញៀវគឺជាបុគ្គលិកជួរមុខនៃភោជនីយដ្ឋាន ពេលខ្លះពួកគេត្រូវប្រឈមមុខជាមួយភ្ញៀវដែលមិនសប្បាយចិត្ត ទោះបីបញ្ហានោះនៅក្រៅការទទួលខុសត្រូវរបស់ពួកគេក៏ដោយ។ ក្នុងករណីមានកំហុសក្រៅការទទួលខុសត្រូវរបស់បុគ្គលិកទទួលភ្ញៀវ ឬមានភ្ញៀវស្ដីឲ្យ ឬបញ្ចេញអាកប្បកិរិយាមិនសមរម្យដាក់ពួកគេ យើងគួរផ្តល់ជាអាហារពិសេសក្នុងហាងហ្វ្រីលើកទឹកចិត្តដល់បុគ្គលិកនោះ។

បង្ហាញការគោរពដល់បុគ្គលិកទាំងអស់

នៅក្នុងភោជនីយដ្ឋានតែងមានច្បាប់ទម្លាប់ និងឋានៈខុសៗគ្នា ប៉ុន្តែមនុស្សគ្រប់គ្នាដែលជាបុគ្គលិកគឺជាអ្នកដែលធ្វើឲ្យប្រតិបត្តិការអាជីវកម្មដំណើរការទៅរួចជាប្រចាំថ្ងៃ និងជាអ្នកដែលរួមគ្នាបង្កើតភាពជោគជ័យដល់ភោជនីយដ្ឋានទាំងមូល។ យើងត្រូវធ្វើឲ្យប្រាកដថា ខ្លួនផ្តល់ការគោរពឲ្យតម្លៃទៅដល់បុគ្គលិកក្រោមបង្គាប់គ្រប់គ្នា ដោយមិនលម្អៀងទៅខាងណាឡើយ។

លើកទឹកចិត្តឲ្យមានបរិយាកាសរីករាយខ្លះ

ជាទូទៅដំណើរការអាជីវកម្មមួយ គឺត្រូវការភាពម៉ត់ចត់ច្បាស់លាស់ និងមានការទទួលខុសត្រូវខ្ពស់ ប៉ុន្តែមិនមែនមានន័យថា យើងមិនគួរបង្កើតការសប្បាយខ្លះនៅកន្លែងការងារឡើយ។ ក្នុងនាមជាអ្នកគ្រប់គ្រង គួរធ្វើអ្វីម៉្យាងនៅពេលឃើញបុគ្គលិកនឿយហត់នឹងការងារ ដើម្បីបង្កើតបរិយាកាសរីករាយនៅកន្លែងការងារនិងលើកទឹកចិត្តឲ្យបុគ្គលិកមានឥរិយាបទល្អ ទោះបីជាពួកគេហត់អស់កម្លាំងក្នុងការធ្វើការក៏ដោយ។

សុំគំនិតយោបល់ពីបុគ្គលិក

ស្នើសុំមតិកែលម្អពីបុគ្គលិក ដើម្បីស្វែងរកវិធីធ្វើយ៉ាងណាបង្កើនការលូតលាស់នៃភោជនីយដ្ឋាន។ ពួកគេអាចនឹងមានគំនិតកែប្រែមុខម្ហូប ការបង្កើតកម្មវិធីប្រូម៉ូសិន ឬច្បាប់ទម្លាប់ផ្សេងៗក្នុងភោជនីយដ្ឋានឲ្យកាន់តែប្រសើរ។ យើងអាចបង្កើតប្រអប់មួយសម្រាប់បុគ្គលិកដើម្បីសរសេរមតិកែលម្អដោយមិនបញ្ចេញឈ្មោះបាន។ ការធ្វើរបៀបនេះ វានឹងធ្វើឲ្យពួកគេយល់ថាពួកគេជាផ្នែកមួយនៃម្ចាស់ភោជនីយដ្ឋាន នៅពេលយើងធ្វើតាមមតិរបស់ពួកគេ។

ផ្តល់រង្វាន់ដល់បុគ្គលិក

បុគ្គលិកមួយចំនួនយល់ថាអ្នកគ្រប់គ្រង ឬចៅហ្វាយនាយ មិនបានផ្តល់ការគាំពារ ឬការលើកទឹកចិត្តដល់បុគ្គលិក ឬយល់ថាខ្លួនខិតខំធ្វើការខ្លាំងដែរ ប៉ុន្តែមិនទទួលបានការលើកទឹកចិត្តទាល់តែសោះ។ ដូច្នេះការបង្កើនការលើកទឹកចិត្តដល់បុគ្គលិកក្នុងភោជនីយដ្ឋានជារឿងសំខាន់មួយ និងចុងក្រោយ កុំភ្លេចនិយាយពាក្យអរគុណដល់ការខិតខំប្រឹងប្រែងរបស់ពួកគេ ក្នុងការចូលរួមលើកស្ទួយភោជនីយដ្ឋាន ជាពិសេសនៅក្នុងពិធីជប់លៀងបំណាច់ឆ្នាំ៕

ប្រែសម្រួល៖ សន្យា

ប្រភព៖ Entrepreneur

ចុចអាន៖លុបចោលទម្លាប់ទំាងនេះចេញពីជីវិតម្តងមួយៗ អនាគតនឹងប្រពៃ

ចុចអាន៖បើអ្នកមានអារម្មណ៍ទាំងនេះ លាឈប់ថ្ងៃនេះ ជារឿងត្រឹមត្រូវ