៣យ៉ាង ត្រូវកត់ចំណាំ បើសិនទៅកម្សាន្តតំបន់ទឹកធ្លាក់ អំឡុងខែនេះ

នៅរៀងរាល់រដូវភ្លៀវធ្លាក់ ដំណើរកម្សាន្តទៅកាន់តំបន់ទឹកធ្លាក់ តំបន់ភ្នំ និងតំបន់សមុទ្រ មានហានិភ័យណាស់ ព្រោះតែអាកាសធាតុប្រែប្រួលឆាប់រហ័ស ងាយបង្កជារលកធំភ្លាមៗ​ ឬនាំមកនូវកម្លាំងទឹកភ្លាមៗនឹកស្មានមិនដល់។ ជាក់ស្តែង នៅតាមតំបន់ទឹកធ្លាក់ ជារឿយៗ​ ឧបទវហេតុដែលកើតមានលើទេសចរកន្លងមក ចំពោះដំណើរកម្សាន្តក្នុងរដូវភ្លៀងបែបនេះ ច្រើនជួបស្ថានភាពមកជាគំហុកតែម្តង។

ដូចនេះ កម្ពុជាថ្មីសូមចែករំលែកឱ្យបានដឹងនូវកត្តាគួរប្រុងប្រយ័ត្នខ្លះ នៅពេលទៅលេងតំបន់ទឹក។

១. រឿងចម្បងទីមួយ មុននឹងសម្រេចចិត្តមកលេងតំបន់ទឹកធ្លាក់ ត្រូវដឹងពីស្ថានភាពអាកាសធាតុ ព្រោះតំបន់ទឹកធ្លាក់ មាន​ហានិភ័យ​នៃគ្រោះថ្នាក់ខ្លាំងនៅរដូវភ្លៀង ពិសេសស្របពេលដែលកម្ពុជា កំពុងបង្កើនការប្រុងប្រយ័ត្នឥទ្ធិពលព្យុះ ពីប្រទេសក្បែរខាងកម្ពុជាផង។

ភ្លៀវធ្លាក់ញឹកញាប់ មិនមែនជាពេលវេលាល្អសម្រាប់ដំណើរកម្សាន្តតំបន់ទឹកធ្លាក់ឡើយ ព្រោះបើតាមបទពិសោធអ្នកប្រកបរបរក្បែរតំបន់ទឹកធ្លាក់ កត់សម្គាល់ឃើញថា រាល់ពេល​ដែលមេឃចាប់ផ្តើមស្រទុំម្តងៗ ទឹកមិនដឹងមកពីណា គឺមកជាគំហុកតែម្តង ពិសេសគឺច្រើនកើតមានឡើងក្នុង​អំឡុង​រដូវ​ភ្លៀង​ធ្លាក់ខែកញ្ញា-តុលា។ ស្ថានភាពភ្លាមៗនេះ ជារឿងដែលមិនអាចស្មានដឹងមុនឡើយ ហេតុនេះដើម្បីសុវត្ថិភាព គប្បីកុំលេងឆ្ងាយពីច្រាំងពេក។

២. មួយវិញទៀត ដើម្បីសុវត្ថិភាពខ្ពស់ពេលលេងទឹក ត្រូវលេងនៅម្តំណាដែលផុតពីល្បាក់ចំណោតដែលទឹកហូរចុះ ព្រោះត្រង់ចំណុចនោះ ទឹកហូរ​ខ្លាំង អាចឱ្យយើងបាត់ជំហរហូរទៅជាមួយទឹក។

៣. កំណត់ចំណាំមួយទៀត ដែលយើងអាចមើលដឹងពី​​ស្ថានភាព​ទឹក​មិនគួរលេង។ ប្រសិនបើលោកអ្នកមើលឃើញកន្លែងណាមានទឹកបែកពពុះសៗខ្លាំង ចូរចាំថាត្រង់នោះហើយ ជាកន្លែងដែលមានកម្លាំងទឹក​ខ្លាំង ហេតុនេះ គួរលេង​នៅកន្លែង​ណា​ដែលចរន្តទឹកមិនសូវខ្លាំង។

ក្រៅពីនេះ កត្តាគួរប្រុងប្រយ័ត្នមួយទៀតនោះ គឺពេលដើរលើថ្ម “ប្រយ័ត្នរអិល” ត្រូវកត់ចំណាំថា កន្លែងណាដែលមិនសូវមានទឹកហូរខ្លាំង គឺច្រើនមានស្លែរកាន់ អាចបង្កគ្រោះថ្នាក់ដល់យើងជាយថាហេតុ៕