ព័ត៌មានជាតិ

លោក គឹម សន្តិភាព៖ អ្នកវិជ្ជមានកូវីដ-១៩ ហើយគេចវេះ នឹងបំផ្លាញខ្លួនឯង គ្រួសារ និងប្រជាពលរដ្ឋដទៃទៀត

បានផុស

៤ years មុន

នៅ

ថ្ងៃចន្ទ ១២ មេសា ២០២១

ដោយ

លោក គឹម សន្តិភាព រដ្ឋលេខាធិការ នឹងជាអ្នកនាំពាក្យក្រសួងយុត្តិធម៌បានថ្លែងថា អ្នកវិជ្ជមានកូវីដ- ១៩ ហើយគេចវេះ នឹងបំផ្លាញខ្លួនឯង គ្រួសារ និងប្រជាពលរដ្ឋដទៃទៀត ដូច្នេះត្រូវចូលបង្ហាញខ្លួន ដើម្បីទទួលយកការព្យាបាលជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គឹម សន្តិភាព បញ្ជាក់យ៉ាងដូច្នេះថា “អ្នកមានជំងឺហើយ តើអ្នកគេចវេះទៅ ណាទៀត ? អំពើរបស់អ្នកនឹងបំផ្លាញអ្នក គ្រួសារអ្នក និងប្រជាពលរដ្ឋដទៃទៀត ! សូមផ្តាំទៅអ្នកទាំង៩ រូប ដែលជាអ្នកមានផ្ទុកជំងឺកូវីដ-១៩នេះ ចូលបង្ហាញខ្លួនដើម្បីទទួលយកការព្យាបាលជាបន្ទាន់ និងទាន់ពេលវេលា បើពុំនោះទេ អ្នកអាចនឹងត្រូវផ្តន្ទាទោសដាក់ពន្ធនាគាររយៈពេល១០ឆ្នាំ”។

សូមបញ្ជាក់ថា រដ្ឋបាលរាជធានីភ្នំពេញនៅថ្ងៃទី១២ ខែមេសា ឆ្នាំ២០២១នេះ បានបង្ហាញឈ្មោះ និងអំពាវនាវទៅដល់សាច់ញាតិ និងអ្នកជំងឺកូវីដ១៩ ចំនួន៩នាក់ ដែលបាត់ខ្លួនសូមប្រញាប់មកបង្ហាញខ្លួនក្នុងរយៈពេល ៣ថ្ងៃ គិតចាប់ពីថ្ងៃទី១២ ខែមេសា ឆ្នាំ២០២១ ដើម្បីមកទទួលយកការព្យាបាល។ ក្នុងករណីមិនមកបង្ហាញខ្លួនតាមការកំណត់ រដ្ឋបាលរាជធានីភ្នំពេញនឹងចាត់វិធានការតាមផ្លូវច្បាប់ ដោយកសាងសំណុំរឿងបញ្ជូនតតុលាការ។

ជាមួយគ្នានោះ រដ្ឋបាលរាជធានីភ្នំពេញបានអះអាងថា អ្នកវិជ្ជមានកូវីដ-១៩ ដែលបាត់ខ្លួនសរុបចំនួន៥៦នាក់ ដែលជាករណីឆ្លងក្នុងសហគមន៍កាលពីថ្ងៃទី០៩ ខែមេសា ឆ្នាំ២០២១ តែរហូតមកដល់ពេលនេះ ប្រជាពលរដ្ឋវិជ្ជមានបានសហការទំនាក់ទំនងសមត្ថកិច្ចបានចំនួន ៤៧នាក់ នៅសល់អ្នកវិជ្ជមានកូវីដ១៩ ចំនួន៩នាក់ ដែលមិនមកទទួលយកការព្យាបាល៕

អត្ថបទ៖ កោះកែវ

សូមចុចអាន៖ ឆ្លងកូវីដហើយ គេចវេះទៅណា?អាចជាប់ពន្ធនាគារ ១០ ឆ្នាំ