ព័ត៌មានជាតិ

យានយន្ត១១៦គ្រឿង ពុំបានបង់ពន្ធផ្លូវ នៅខេត្តកោះកុង នឹងត្រូវផាកពិន័យ

បានផុស

៤ years មុន

នៅ

ថ្ងៃចន្ទ ១២ មេសា ២០២១

ដោយ

មន្ត្រីសាខាពន្ធដារខេត្តកោះកុង បានរកឃើញយានយន្តតូចធំជាង១១៦គ្រឿង ពុំបានបង់ពន្ធលើមធ្យោបាយដឹកជញ្ចូន និងយានជំនិះគ្រប់ប្រភេទឆ្នាំ២០២០ ក្រៅពីតម្រូវឲ្យពន្ធ មន្ត្រីជំនាញក៏ពិន័យជាប្រាក់បន្ថែមទៀត លើម្ចាស់យានយន្តទាំងនោះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុទ្ធនាការអនុវត្តលើដំណើរការត្រួតពិនិត្យពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ បានអនុវត្តចាប់តាំងពីថ្ងៃទី៣ ខែកុម្ភៈដល់ ថ្ងៃទី៣១ ខែមីនា ២០២១កន្លងទៅ។ ជាលទ្ធផលរួម មន្ត្រីពន្ធដារខេត្ត និងសមត្ថកិច្ចជំនាញ ពិនិត្យឃើញថាមានយានយន្តចំនួន១១៦គ្រឿងមិនបានបំពេញកាតព្វកិច្ចបង់ពន្ធ។

លោក ឡុង ស៊ីប៉ូ អនុប្រធានសាខាពន្ធដារខេត្តកោះកុង លើកឡើងនៅថ្ងៃទី១២ ខែមេសា ២០២១ថា លោកតម្រូវឲ្យក្រុមម្ចាស់រថយន្តទេសចរណ៍ រថយន្តដឹកទំនិញ និងរថយន្តដឹកអ្នកដំណើរទាំងនោះ បង់ពន្ធចំណូលបានប្រមាណ៥៩,៦៨០,០០០រៀល ព្រមទាំងពិន័យបន្ថែមចំនួន៥០,៧៥០,០០០រៀល នៅនឹងកន្លែងភ្លាមៗ។ បើសរុបជារួមទទួលបាន១១០លានរៀល។ អនុប្រធានពន្ធដារខេត្ត វាយតម្លៃដែរថា ចំពោះតួលេខចំណូលពីការបង់ពន្ធ និងការពិន័យឆ្នាំ២០២០ បើធៀបនឹងឆ្នាំ២០១៩ កើនបាន១៩លានរៀល ស្មើនឹង២១ភាគរយ។

មូលហេតុដែលធ្វើឲ្យម្ចាស់យានយន្តមិនបានបំពេញកាតព្វកិច្ចបង់ពន្ធលើពន្ធលើមធ្យោបាយដឹកជញ្ចូន និងយានជំនិះគ្រប់ប្រភេទឆ្នាំ២០២០ ត្រូវបានលោក ឡុង ស៊ីប៉ូ ពន្យល់ថា ពួកគាត់និយាយថា មមាញឹកនឹងការរកស៊ីទទួលទានប្រចាំថ្ងៃ ខ្លះនិយាយថា រថយន្តខ្លួនទើបតែដោះស្រាយករណីគ្រោះថ្នាក់ចរាចរណ៍ និងខ្លះទៀតនោះ ជឿជាក់ទៅឈ្នួញលក់រថយន្តដែលថា រថយន្តមិនទាន់ដល់ឆ្នាំត្រូវបង់ពន្ធជាដើម។ ទាក់ទិននឹងការប្រមូលពន្ធលើមធ្យោបាយដឹកជញ្ជួន និងយានជំនិះគ្រប់ប្រភេទនេះដែរ ច្បាប់តម្រូវឲ្យលើកលែងចំពោះរថយន្តអង្គទូតប្រចាំនៅកម្ពុជា និងគ្រឿងចក្របម្រើការវិស័យកសិកម្ម រួចផុតពីការមិនបង់ពន្ធ។

ដើម្បីពង្រីកវិសាលភាព ក្នុងការត្រួតពិនិត្យចំពោះយានយន្តដែលបានបង់ពន្ធពិតប្រាកដ និងមិនបានបង់ពន្ធ អគ្គនាយកដ្ឋានពន្ធដារ បានបង្កើតប្រព័ន្ធបច្ចេកវិទ្យាពិនិត្យQR-Codeលើក្រដាសពន្ធតាមទូរស័ព្ទ ដោយធ្វើឲ្យអ្នកជាប់ពន្ធពុំអាចបិទបាំងព័ត៌មាន ឬគេចវេះបានឡើយ។

ដូចរាល់រៀងឆ្នាំ សាខាពន្ធដារខេត្តកោះកុង តែងជូនដំណឹង និងផ្សព្វផ្សាយដល់អ្នកជាប់កាតព្វកិច្ចបង់ពន្ធទាំងអស់អញ្ជើញមកចូលរួមបង់ពន្ធទៅតាមការកំណត់នៃឆ្នាំនីមួយៗឲ្យគ្រប់ៗគ្នា ជៀសវាងរងការពិន័យធ្វើឲ្យខាតបង់ថវិកា និងពេលវេលា ដោយឈរលើគោលការណ៍ស្មារតីទទួលខុសត្រូវខ្ពស់ជូនរដ្ឋ។

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានអំពាវនាវឲ្យមន្ត្រីយោធាដែលជាឧត្ដមសេនីយ៍ទាំងអស់ ដែលមានលុយទិញឡានជិះត្រូវបង់ពន្ធឲ្យរដ្ឋផងដែរ។ ការអនុវត្តបង់ពន្ធចំណូលចូលរដ្ឋ គឺជាការបង្កើតលទ្ធភាពដល់រាជរដ្ឋាភិបាលក្នុងការដំឡើងប្រាក់ខែដល់កងកម្លាំងប្រដាប់អាវុធ មន្ត្រីរាជការស៊ីវិល រួមទាំងលទ្ធភាពសម្រាប់បង្កើនការវិនិយោគនិងរៀបចំហេដ្ឋារចនាសម្ព័ន្ធ ក្នុងដំណើរការអភិវឌ្ឍប្រទេស៕

អត្ថបទ៖ សិរីវឌ្ឍនៈ

សូមចុចអាន៖ គម្រោងអភិវឌ្ឍន៍ប្រព័ន្ធចម្រោះទឹកខ្វក់នៅភ្នំពេញ មានសមត្ថភាពចម្រោះ ៥ ពាន់ម៉ែត្រគូប ក្នុង ១ ថ្ងៃ